Read Uab Meto 2 RAJA-RAJA 4 Bible Online

2 RAJA-RAJA 4 - Uab Meto bible

2 RAJA-RAJA 4

¹Anbi neno mese bife banu mese na'ko Mafefa knino mese in anao neu Nai Elisa ma nak neune nak, “Ama, au mone anmate nalalien! Ma Ama ho muhin neu in amsa atoni mese le natuin Uisneno In aplenat, mes in natus anbi atoni mese. Ma atoni nane in nem he naiti au anah nua sin ma hen mo'e sin on ate anfani baen tusa neu tusa le afi au mone amates in natus.”

²“Au he bab ko onme Ain!” onane Nai Elisa in natoti. “Ho mu'i sa' es ho ume Ain?” “Au ka mu'i fa sa'-sa',” onane bife nane in natae, “alaha mina bub fua mina botil an-ana mese.”

³Nai Elisa nak, “Amnao nai ma amtoti botil luman amfaune fauk-fauk na'ko ume atnoes le natnoe nok Aina.

⁴Oke onane te Aina mok ho anah-anah sin amtam meu ume nanan ma am ek ume eno. Oke te amtosi mina na'ko botil ana nane neu botil luman sin le nane, ma ambeti muteta botil le nahenu nalali.”

⁵Ma bife nane in anfani neu in ume. Leka in nok in anah sin antam ma an'ek sin ume eno, in naiti botil an-ana le matua nok mina bub fua mina nane, oke te in antosi mina nane neu botil-botil le in anah sin anfe neune.

⁶Leka botil-botil nane nahenu ok-oke, in antoti botil mese anteni. Mes in anah mese na'ko in anah sin in natae nak, “Katit fa anteni.” Onane te mina nane kan sai anteni fa.

⁷Nalali te bife nane in anao anteni neu Mafefa Knino Nai Elisa ma Nai Elisa nak neune nak, “Musosa mina nane he nati' hom baen Aina ho tusa, ma in nesin nane neu he munokab Aina ho monim ma Aina ho anah-anah sin.”

⁸Anmu'i bife amu'it mese le in natua anbi Sunem. Anbi neno mese leka Nai Elisa anao neu Sunem, bife nane anhone in hen bukae anbi in ume. Na'ko tabu nane leka Nai Elisa in anao nok Sunem in anbukae anbi bife nane in ume.

⁹Nalali te bife nane nak neu in mone nak, “Au uhin amnemat le nem ma ansenu kit piut anbi bi i nane namneo-namneo in le nane ate Uisneno mese.

¹⁰Leko hit atmo'e ke'an ana' mese anbi hit ume in ke'an fafon, ma oke te hit atao bale tupa, mei, toko, ma paku he nati' in antup anbi ke'an nane leka in nem ma ansenu kit.”

¹¹Anbi neno mese anteni Nai Elisa in nem anteni anbi Sunem. Leka in ansae neu in ke'an he nasnas,

¹²in anlenu Nai Gehazi, in ameput, anao he no'en bife nane. Leka bife nane in nem,

¹³Nai Elisa nak neu Nai Gehazi nak, “Ho mutoti in au he seunbanin sa' neune natuin in lasi haet neu kit. Oni in anlomi he au nao eu kesel ai neu solalus nakaf amnanut ma au umolok ok sin antom sin amonin.” Bife nane natae nak, “Au umaika a'bi au ume nanan sin atnanan ma au ka labu' fa sa'-sa'.”

¹⁴Es nane te Nai Elisa natoti Nai Gehazi nak, “Kalu onane, of au he mo'e sa' ka neu bife nane?” Nai Gehazi natae nak, “In kan mu'i fa anah, Ama, ma in mone namnasien.”

¹⁵Nai Elisa nak, “Ho mo'en bife nane.” Bife nane in nem ma anhake anbi eno.

¹⁶Oke te Nai Elisa nak neune nak, “Ton amnemat, anbi tabu onle i, Aina of ho muskau li'anmone mese.” “Ama, kais ho mu'moe!” bife nane in nak onane. “Ama ho le i ate Uisneno ko!”

¹⁷Mes sa' le Nai Elisa namolok nane lo namneo kun. Anbi ton amnemat, oni papmese onle afi Nai Elisa namolok bife nane in nahonis li'anmone mese.

¹⁸Leka li'ana nane nanae, anbi neno mese li'ana nane in anao neu in amaf le anbi lene nok ale a'abul sin.

¹⁹Nok askeken li'ana nane in anbai neu in amaf nak, “Ama! Au nakak namen anae le'uf!” In amaf nak neu in ameput mese nak, “Meki li'ana i neu in ainaf.”

²⁰Sin neki li'ana nane neu in ainaf, oke te in ainaf naif in. Ma anbi neno anmabe li'ana nane anmate.

²¹In ainaf neki in neu ke'an fafon, neu Nai Elisa in ke'an, ma natupa in anbi bale tupa. Oke onane te in anpoi ma an ek eno,

²²oke te in anao no'en in mone. In nak, “Amlenu ameput mese nem neu i neki bikase luke mnanu mese. Au he nao lab-labah neu Mafefa Knino Nai Elisa, ma of au fani aum labah amsa.”

²³“Nansa' es ho hem nao es le i?” onane in mone natoti neune. Neno i ka neno Snasat fa ma ka neno Naek Funan Fe'u fa.” In natae nak, “Ka sa' fa.”

²⁴Leka in ankap nalali in bikase luke mnanu nane, in nak neu in ameput nak, “Ambeso bikase luke mnanu i he nati' in naen lab-lab; kais amhelak in manoen leka au ka lenu ko fa.”

²⁵Ma bife nane in anao neu Tubu Karmel neu Nai Elisa balan. Na'ko a'lo Nai Elisa in nit nalali bife nane in nem. Nai Elisa nak neu Nai Gehazi nak, “Amkiso, bife na'ko Sunem nane in nem!

²⁶Amnao nai lab amsenu in ma mutoti in neu in ume nanan sin onme.” Bife nane nak neu Nai Gehazi nak, “Ale sa' leko ok-oke.”

²⁷Mes leka in nem antia Nai Elisa in matan, in anli'tu ma anho Nai Elisa in haen. Nai Gehazi hen tite in na'ko nane, mes Nai Elisa nak, “Mufetin in! Onle in nekan antu' anae le'uf. Mes UISNENO ka naton neu kau fa sa'-sa'!”

²⁸Bife nane nak, “Ama, au ka toti fa anah na'ko ko Ama. Au uton ulali neu ko amsa Ama he nati' kais hom fe neu kau panet ma fnekat luman.”

²⁹Nai Elisa in anik neu Nai Gehazi oke te in nak, “Labah nai! Maiti au tias ma amnao nai meu Aina i in ume. Kais musnas hem hosen es amsa le ho mutef anbi lanan. Kalu es anhosen ko, kais ampolin tabu he mutae in hosen nane. Manap nai ma leka hom tia ume nane, amtao au tias nane neu li'ana nane in aon.”

³⁰Bife nane nak, “Ama Elisa! Anbi UISNENO amonit ma Ama ho monim, au of ka usaitan ko fa Ama!” Es nane te Nai Elisa anfen ma anao nok bife nane neu in ume.

³¹Nai Gehazi in anao nahunun sin hen tao Nai Elisa in tias neu li'ana nane in aon, mes katit fa hanaf ai atakaf bian nak li'ana nane hen moni. Oke te Nai Gehazi in anao ma natef nok Nai Elisa ma in nak, “Li'ana nane in kan fen fa.”

³²Leka in nem antia bife nane in ume, Nai Elisa antam anmese neu in ke'an ma in nit li'ana nane in aon nitu nabel'on anbi hala tupa nane fafon.

³³Nai Elisa an ek eno oke te in onen toti neu UISNENO.

³⁴Oke onane te in anbenton neu li'ana nane oke te in naki'at in fefan, in matan ma in niman neu li'ana nane in fefan, in matan ma in niman. Natuin in anmo'e onane, es nane te li'ana nane anmaputu.

³⁵Nai Elisa anfen ma in anao neu am nem anbi ke'an nane nanan, nalali te in anbenton anteni neu li'ana nane in aon. Amsoput li'ana nane an esufani hae hitu, ma anfai in matan.

³⁶Nai Elisa anlenu Nai Gehazi no'en li'ana nane in Ainaf, ma leka bife nane antam nalali te, Nai Elisa nak neune nak, “Ho anmone es i Ain.”

³⁷Li'ana nane in Ainaf anli'tu anbi Nai Elisa in matan oke te in neki in anmone ma anpoi.

³⁸Anbi tabu mese lasi amnahas anaek anbol anbi pah ok-oke. Ma Nai Elisa in anfani neu Gilgal. Leka in fe nanoina mafefa pukan mese, in anlenu in ate naiti tasu naek mese ma nahan bukae neu sin.

³⁹Ma es na'ko Mafefa knino sin nane anpoi ma anao neu lene he nami utan, oke te in napeni boko fui mese. In anseu boko fui nane fuan namfau, ma in neki anfani neu ume. In ka nahin fa neu hau fua sa' es nane, in ansal ma natam neu nai nane nanan.

⁴⁰Leka namtas, in anbati neu ale Mafefa knino he nati' sin anbukae. Mes leka sin fe anaben bukae nane in minan, sin anbai neu Nai Elisa nak, “Ama, i laso!” Sin kan lomi fa hen bukae.

⁴¹Es nane te Nai Elisa anlenu naiti ut akle'o, oke te in ankaki neu tasu nane in nanan. Oke onane te in nak, “Ambati amteni bukae nane.” Namneo bukae nane ka neki fa amle'ut anteni.

⁴²Anbi tabu mese anteni, atoni mese nem na'ko Baal-Salisa. In neki neu Nai Elisa ane kase le fe anlefi nalali ma utunu' bo'nua le anmo'e na'ko ane kase nakan ahunut anbi abul ton nane. Nai Elisa anlenu in ate hen bati utunu' nane neu ale Mafefa knino nane,

⁴³mes ate nane nak, “Ka nanoka fa neu atoni natun mese!” Nai Elisa natae nak, “Ambati neu sin he nati' sin anbukae, natuin UISNENO nakua a'an nak sin of anbukae ma leka sin anbukae nalali te anmu'i in nesin fe.”

⁴⁴Ate nane anbati bukae nane neu sin, ma sin al-al sin anbukae. Leka sin anbukae nalali fe anmu'i in nesin onle UISNENO nakua nalali In a'an.