Read Uab Meto 2 RAJA-RAJA 5 Bible Online

2 RAJA-RAJA 5 - Uab Meto bible

2 RAJA-RAJA 5

¹Naaman nane solalus nakaf amnanut Siria le kesel Siria anek nisan ma natola in. Natuin, nanete natuin Naaman, UISNENO anfe lasi mnisat neu solalus Siria. Naaman solalus nakaf amnanut mese le abe'it ma matani, mes in namen men poko le neki manisit.

²Anbi tabu mese atoni Siria sin nape' ma anken pah Israel. Anbi makenat nane sin anheke nan li'anfeto Israel mese ma sin neki in, namuni te in anfani ate neu Naaman in fenai.

³Anbi neno mese ate nane nak neu Usif fenai nane nak, “Usif fenai, kalu onle au Usif in anao ma natef nok Mafefa knino le natua anbi Samaria, Mafefa knino nane of naleko au Usif.”

⁴Leka Naaman in nen lasi nane, in anao neu kesel ma naton neune sa' le li'anfeto nane naton nalali neune.

⁵Kesel nak, “Leko, amnao nai meu Kesel Israel. Of au sonu sulat neu Kesel Israel.” Ma Naaman anfen ma anao ma in neki noni muti 30.000, noni mnatu 6.000, ma blua pake alekot pasan bo'mese.

⁶Sulat le in neki nane in hanan nak on i: “Nanete natuin sulat i au lile ma uton au solalus nakaf amnanut, Naaman, neu Usif ko he nati' Usif ho muleko in na'ko in menas.”

⁷Leka Kesel Israel anso'i sulat nane, in anpisu nulat nane ma in anpisu in blua pake natuin in nekan namle'u, ma in nak, “Amle'ut, natuin sa' ka talantia kesel Siria nane antoti kau he uleko atoni i ka? Au ka Uisneno kau fa le au mu'i kuasat he u'moni ai u'mate atoni! Tebes kesel Siria he nami lasi huma- huma nokan kau!”

⁸Mafefa Knino Nai Elisa in amnen lasi nane, ma in ansonu hanaf i neu Kesel Israel nak, “Nansa' ho mumtau ka? Amlenu atoni nane nem neu kau he in nahin nak anbi Israel i anmu'i Mafefa knino mese!”

⁹Es nane te Naaman anfen ma nao neki in aklet bikase neu Nai Elisa in ume, ma in nasnas anbi eno matan.

¹⁰Nai Elisa ansonu in ate mese he namolok nak on i neu Naaman, “Usif hom nao nai ma muniu hae hitu ambi Noe Yordan, of Usif ho muleko teb-teb.”

¹¹Leka Naaman in nen lasi nane te, in nato' ma nak, “Au utenab ak in of neknon anpoi hen senu kau, ma in onen toti neu UISNENO, ma antao in niman neu au aok le amenat oke te au uleko.

¹²Noe Abana ma Parpar anbi Damsyik naleko nesi na'ko ale noe me amsa anbi Israel! Au nabe'i uniu bi nane ma au uleko!

¹³Mes in ate-ate sin anhaumak in ma nak, “Usif, kalu onle in anlenu ko Usif he ho mo'e sa' le mafena, namneo Usif of ho munaoba mani. Sa' anteni in al anlenu ko Usif he Usif ho muniu he nati' Usif ho muleko!”

¹⁴Es nane te Naaman in anao neu Noe Yordan, oke te in antam ma nalema in aon neu noe nanan hae hitu onle Nai Elisa anba'an neune. Ma Naaman in naleko kun. In aon naleko anfani on li'mone munif in aon.

¹⁵Oke te in ma ale in amnokten sin neki anfani neu Nai Elisa. Ma Naaman nak neu Nai Elisa nak, “Neno le i au uhin, nak anbi pah pinan i ok-oke alaha Uisneno mese, esle' Uisneno le to Israel sin naluli ma nabes neune. Es nane te nati' Usif hom lomi hem simo ale au tnatas sin.”

¹⁶Nai Elisa natae nak, “Natuin UISNENO amonit, le au tuthae In, au of ka simo fa tnatas sa' es amsa.” Naaman naseke Nai Elisa he nati' ansimo in atnatas sin le nane, mes Nai Elisa antite piut.

¹⁷Oke te Naaman nak, “Kalu Usif ho kam lomi fa amsa hem simo au tnatas sin, onane te mufetin kau he au eki afu na'ko Israel baut bikase luke mnanu pasan mese le nabe'i nani. Natuin na'ko neno i au of utulu ma atnat fua tulu alaha neu UISNENO, ma ka neu fa uisneno teta sin.

¹⁸Ma leka au mes he ok au kesel amnao hem onen anbi ume le'u Rimon uisneno teta Siria, so nati' UISNENO ansako au sanat.”

¹⁹Nai Elisa nak, “Amnao nai nok aomina.” Oke te Naaman in anao kun. Leka Naaman in anao fe ka lo fa,

²⁰Nai Gehazi Nai Elisa in ate, in natenab nak, “Ah, nansa' es nafetin in anao ma in kan baen fa? Namneo au Usif mes hen simo tnatas na'ko atoni Siria nane! Anbi UISNENO amonit, au mes li'u in ma upeni sa-sa' es na'ko in!”

²¹Oke te Nai Gehazi anli'u Naaman. Leka Naaman in nit anmu'i atoni le nem natuin sin, in ansanu na'ko in bikase ma natoti nak, “Anmu'i lasi sa' ka?”

²²Nai Gehazi natae nak, “Kais musesu kau, au Usif anlenu kau he uton neu ko Usif nak fe le i Mafefa knino munif nua sin nem na'ko pah neten Efraim. Au Usif antoti he nati' au Usif ko amfe fa noni muti 3.000 ma blua pake alekot pasan nua neu Mafefa knino munif nua en nane.”

²³“Namneo onane!” onane Naaman in natae, ma in naseke he nati' Nai Gehazi neki noni muti 6.000. Naaman an'amu noni nane anbi amut nua, ma naiti blua pake alekot pasan nua. Ale nane ok-oke in anfe nani sin neu in ate nua, le anlenu sin anao nahunun Nai Gehazi.

²⁴Leka sin nem antia neten bale Nai Elisa natua anbine, Nai Gehazi naiti noni ma blua pake nane na'ko ate-ate Naaman, nalali te in nabela sin anbi in ume nanan. Ate-ate nane in anlenu sin anfani,

²⁵oke te in antam anfani neu ume nanan. Nai Elisa natoti nak, “Ho mu'ko me ka?” “Au ka u'ko fa me, Usif!” in natae onane.

²⁶Mes Nai Elisa nak, “Au nekak anbi bale nane leka Naaman ansanu na'ko in aklet ma ansenu ko. Ka in tabu fa esle' i he tapeni noni ma het sos lene bub fua mina, lena tua min kase, bibi kase ma bijae ma ate-ate!

²⁷Natuin hom simo tnatas nane, onane te ho of amsimo Naaman in menas amsa. Ma anesi na'ko nane te ho sufam sin amsa of sin napeni menas nane!” Leka nai Gehazi anpoi na'ko nane, in napeni men poko — in pasun anfani muti kun ok-oke.