Read Uab Meto 2 RAJA-RAJA 7 Bible Online

2 RAJA-RAJA 7 - Uab Meto bible

2 RAJA-RAJA 7

¹Nai Elisa natae nak, “Amnen nai sa' le UISNENO sa' le UISNENO he nakua In a'an! Noka fa, oni tabu onle i, atoni nabe'i ansos ane kase alekot abainesit kilo tenu ai ane kase bian anteni kilo ne neki noni muti pisa mese.”

²Mes solalus nakaf apanat kesel in ansuli nak, “Lasi nane hen bol onme! Lasi nane of kan bol fa, maski anbi tabu le i amsa UISNENO nasanut ulan anaek na'ko neno tunan!” Nai Elisa natae nak, “Of ho mit lasi nane anbol, mes ho of kam naben fa mnahat nane in minan akle'o amsa.”

³Anbi neno nane anmu'i atoni men poko ha le neki mainisit sin anbi eno naek Samaria kotin. Sin anmauaben es nok es nak, “Maota sa' ka hit atoko tamaika atbi i atpao neu het mate ka?

⁴Leka hit atam teu kot nanan, hit of atmaten amnahas; ma leka hit tamaika piut atbi i, hit of atmate amsa. Leko nesi hit atnao teu um-ume atoni Siria. Lo of sin namate kit. Mes oni sin kan mo'e fa sa'-sa' neu kit amsa.”

⁵Leka names'ok sin anao neu atoni Siria sin um-ume, mes sin ka nit fa atoni mese amsa anbi nane.

⁶Natuin, UISNENO anmo'e atoni Siria sin nen aslutuf onle solalus pukan anaek mese neki bikase pukan anaek mese ma aklet nem antaman sin. Atoni Israel sin natenab nak Kesel Israel in ansebe nalali Kesel Het ma Kesel Mesir nok sin solalus sin he nape' ma anken sin.

⁷Es nane te anbi fai nane amsa sin naen nafetin sin aoken, ma nasaitan sin um-ume, sin bikase, ma sin bikase luke mnanu anbi sin um-ume nane.

⁸Atoni men poko ha en nane sin nem antia um-ume nane ninen, ma sin antam neu um-ume mese. Sin nah ma ninu anbi nane, ma sin naiti noni mnatu, noni muti ma ale blua pake oke te sin anao ma natolo' sin. Nalali onane te sin anfani anteni ma sin antam anteni neu um-ume bian, oke te sin anmo'e lasi papmese on lelon.

⁹Sin anmauaben es nok es nak, “Hit taos ma hit mo'et le i ka leko fa. Lasi le i lasi alekot ma namneo-namneo hit mes he taton tani! Leka hit atpao talantia neno noka fa, namneo mes ankas kit. Leko nesi hit taton lasi nane neu kesel sonaf.”

¹⁰Es nane te sin neki anfani neu Samaria ma ankoa neu apaot eno naek kot nak, “Hai amnao milali neu atoni Siria sin um-ume, ma katit fa atoni anbi nane. Sin bikase ma bikase luke mnanu hai mipeni sin fe anfutnok anbi bale nane, ma sin um-ume sin nasaitan sin onle nane.”

¹¹Ale apaot sin nabeno lasi nane, talantia atoni natiaba nani neu kesel sonaf.

¹²Anbi tabu nane fe kan meu fa, mes kesel anpoi amsa na'ko in bale tupa ma in nak neu in ameput sin nak, “Amnen fe'! Au uhin salit atoni-atoni Siria nane! Sin nahin neu hit fe atbi amnahas in nanan, es nane te sin nasaitan sin um-ume ma sin anao natolo' anbi mnela hen fuli kit het poi he tami mnahat. Oke onane te sin of anheke kit ma nasik nan hit kot.”

¹³Kesel in ameput mese nak, “Usi, hit le fe atmoni atbi kot nanan hit monik papmese nok sin le anmate nalali. Es nane te leko hit atlenu atoni fauk sin ansae neu bikase nim na'ko bikase le fe anmoni, ma sin anao neu bale nane hen kiso sa' le anbol nalali.”

¹⁴Es nane te sin anbeti nan atoni fauk, oke te kesel anlenu atoni-atoni nane sin ansae neu aklet makenat nua ma sin anao hen kiso nalek-leko sa' le anbol nalali antom solalus Siria.

¹⁵Sin anao antia Noe Yordan. Anbi lanan atnanan sin nit blua pake ma ale blua bian nasan'ok anbi nane. Ale bale nane atoni Siria sin anpolin sin ok-oke leka sin naen nafetin sin aoken. Ale haefen nane sin neki anfani ma naton lasi nane neu kesel.

¹⁶Es nane te tuafen Samaria sin naen anpoi na'ko kot ma sin nasik sa'-sa' anbi um-ume atoni Siria. Lasi nane anmatom nok sa' le UISNENO nakua nalali In a'an, of anbol nak ane kase alekot abainesit kilo tenu ai ane kase bian in osan alaha noni muti pisa mese.

¹⁷Namnes nok anbi tabu nane solalus nakaf apanat kesel, in anhake anpanat eno naek kot nane. In anmate anbi nane natuin to anteli naklati in. Lasi nane anbol natuin sa' le afi Nai Elisa naton nalali neu kesel anbi tabu kesel nem neu in.

¹⁸Nai Elisa naton nalali nak oni noka fa tabu onle i, ane kase alekot abainesit kilo tenu ai ane kase bian kilo ne of nasosa anbi Samaria neki osan noni muti pisa mese.

¹⁹Ma anbi tabu nane solalus nakaf apanat kesel nane namolok nalali nak, “Lasi nane hen bol onme! Lasi nane of kan bol fa, maski anbi tabu le i amsa UISNENO nasanut ulan anaek na'ko neno tunan!” Oke te Nai Elisa natae nak, “Of ho mit lasi nane anbol, mes ho of kam naben fa mnahat nane in minan akle'o amsa.”

²⁰Onle nane lasi nane anbol neu atoni nane — in anmate natuin to anteli nis in anbi kot in eno naek.