Read Uab Meto 2 RAJA-RAJA 8 Bible Online

2 RAJA-RAJA 8 - Uab Meto bible

2 RAJA-RAJA 8

¹Anbi tabu mese UISNENO nasanut lasi amnahas nem neu pah Israel anbi ton hitu in a'lon. Nahunu na'ko nane Nai Elisa naton nalali lasi nane neu bife na'ko Sunem le in namonib nafani in anmone. Nai Elisa amsa anlenu in he natnani nok in ume nanan sin neu pah bian.

²Bife nane in nanaoba sa' le Nai Elisa naton nalali neune, ma in fen ma anao neu pah Filistin he natua anbi nane.

³Leka ton hitu namsopu te in anfani neu Israel. Oke te in anao nok in anah neu kesel hen toti he nati' kesel anfe nafani in ume ma in lene neune.

⁴Anbi tabu nane Nai Gehazi Nai Elisa in ate kesel antoti in he nanu'un neune ale lasi mkakan le Nai Elisa anmoe nalali sin.

⁵Ma anmatom nok tabu nane bife na'ko Sunem in nem neu kesel he natiaba in han totis, Nai Gehazi fe nanu'un antom neu onme Nai Elisa namonib nafani li'ana mese le anmate nalali. Es nane te Nai Elisa nak, “Usif apinat, bife nane esle' i, ma in anah esle' i le Nai Elisa namonib nafani in!”

⁶Oke te kesel natoti ma bife nane nanu'un antom li'ana nane. Nalali te kesel no'en in ameput mese ma anfe plenat neune he nati' anfe nafani bife nane in amu'in, ma ale in lene afan ok-oke anbi ton hitu in a'lon tabu bife nane natua anbi pah Filistin.

⁷Anbi tabu mese Nai Elisa in anao neu Damsyik. Fun anbi tabu nane Kesel Nai Benhadad in fe namen. Leka kesel in nen nak Nai Elisa in es Damsyik,

⁸in nak neu in ameput mese kanan Nai Hazael nak, “Meki atnatas neu Mafefa knino nane, ma amtoti he nati' in natoti UISNENO neu of au uleko na'ko menas i ai kahaf.”

⁹Nai Hazael in neki bikase paha snaen bo'ha le in nasaeba neki ale pah afan maupa na'ko kot Damsyik, oke te in anao neu Nai Elisa. Leka in nem antia Nai Elisa in balan Nai Hazael nak, “Ho ate Kesel Nai Benhadad, ansonu kau he au utoti neu ko neu of naleko na'ko in menas ai kahaf.”

¹⁰Nai Elisa natae nak, “UISNENO naton neu kau nak in of anmate. Mes so ho muton neune mak in of naleko.”

¹¹Nalali te Nai Elisa ankiso na'ke' Nai Hazael nok matan naaik talantia Nai Hazael namtau. Ma nok askeken Nai Elisa in ankae.

¹²“Nansa' Usif hom kae?” onane Nai Hazael in natoti. “Natuin au uhin lasi amle'ut le of ho moe neu atoni Israel,” onane Nai Elisa in natae, “Ho of motu ale kot-kot mabaki lape, mumate in atoni munif alekot sin, ma amkil mis ale li'ana me' ma mupe' ale bife sin taiken le fe naapu.”

¹³“Ah, au le i atoni le ka maota kau fa,” onane Nai Hazael in natae, “onme ka au he upeni kuasat matani nane!” Nai Elisa natae nak, “UISNENO naton nalali neu kau nak of hom fani kesel Siria.”

¹⁴Leka Nai Hazael anfani neu sonaf, Nai Benhadad natoti nak, “Nai Elisa nak sa' ka?” Nai Hazael natae nak, “Nai Elisa in nak of ho muleko.”

¹⁵Mes noka fa onane Nai Hazael in naiti nan beti mese, ma in antao neu oe nanan oke te in ankub nahelan neu kesel human talantia kesel nas'unu ma anmate. Ma Nai Hazael anfani kesel anseka Nai Benhadad.

¹⁶Nai Yehoram Nai Yosafat anmone anfani Kesel Yehuda anbi tabu Kesel Nai Yoram Nai Ahab anmone in naplenat Israel ton nim.

¹⁷Anbi tabu nane Nai Yehoram in uan ton bo'tenu am nua, ma in naplenat anbi Yerusalem ton fanu.

¹⁸In anmafe nok Nai Ahab in anfeto, ma onle Nai Ahab sin ume nanan anmoe, in amsa nasanab neu UISNENO papmese onle ale Kesel Israel sin.

¹⁹Mes UISNENO kan lomi fa he nale'un Yehuda natuin In anmanba'an nalali neu In ate Nai Daud, nak in sufan of anfani kesel piut.

²⁰Anbi Nai Yehoram in aplenat, Edom anlaban Yehuda ma sin nahakeb aplenat anmes kun.

²¹Es nane te, Nai Yehoram anpoi neki ale in aklet makenat sin an ali Zair. Anbi nane solalus Edom aniusnan in, mes anbi fai nane in ma ale in solalus nakaf aklet makenat sin nape' ma napisu musu sin, ma in solalus sin naen nafetnon ma anfani neu sin ume mese-mese.

²²Na'ko neno nane Edom ka nausi anteni fa neu Yehuda. Anbi batan nane amsa kot Libna amsa anlaban Yehuda.

²³Lasi nu'un bian antom Nai Yehoram antui nalali anbi Sulat Anaof ale Kesel Yehuda.

²⁴In nasaebon ma ansub in anbi ale kesel sin naukel anbi Nai Daud in Kot. In anmone Nai Ahazia anfani kesel anseka in.

²⁵Nai Ahazia Nai Yehoram anmone anfani Kesel Yehuda anbi tabu Kesel Nai Yoram Nai Ahab anmone in ana' aplenat anbi Israel ton bo'es am nua.

²⁶Anbi tabu nane Nai Ahazia in uan ton bo'nua am nua, ma in ana' aplenat anbi Yerusalem tan mese. In ainaf kanan bi Atalya, Kesel Nai Ahab anah ma Nai Omri Kesel Israel upuf.

²⁷Natuin in lasi mafet nane, Nai Ahazia anmu'i malutas nok Kesel Nai Ahab in ume nanan. Nai Ahazia anmoe sanat neu UISNENO papmese onle Nai Ahab in ume nanan sin anmoe.

²⁸Kesel Nai Ahazia in nok anbi makenat nok Nai Yoram Kesel Israel anlaban Nai Hazael kesel Siria. Sin anmakenan anbi Ramot, pah Gilead. Nai Yoram napapa' anbi makenat nane,

²⁹oke te in anfani neu kot Yizreel hen paloli, ma Nai Ahazia anao ma ankiso in anbi nane.