Read Uab Meto 1 TAWARIKH 10 Bible Online

1 TAWARIKH 10 - Uab Meto bible

1 TAWARIKH 10

¹Atoni Filistin sin anmakenan nok atoni Israel. Sin anmakenan anbi Neten Gilboa. Atoni Israel anmate namfau anbi nane, ma Kesel Nai Saul ma in anmone sin naen nafetin sin aoken.

²Mes atoni Filistin anli'u natuin sin ma sin namate Nai Saul anmone tenu, Nai Yonatan, Nai Abinadab ma Nai Malkisua.

³Fun makenat mataen le'uf kun anfun natef Nai Saul, ma musu as'anef antoman in talantia in napap.

⁴Es nane te Nai Saul nak neu atoni munif le neki in bale makenat sin nak, “Amhosu ho suni ma mupau kau he nati' atoni Filistin le ka nahin fa UISNENO nane kais sin nasi'u kau.” Mes atoni munif nane kan lomi fa he napau Nai Saul natuin in namtau nae le'uf. Es nane te Nai Saul naiti in suni ma in nabelat in aon napaunon neu suni nane.

⁵Leka atoni munif nane in nit nak Nai Saul anmaten, in amsa nabelat in aon napaunon neu in suni, oke te in amsa anmate.

⁶Nai Saul anmate nok in anmone tenu sin ma nok nane te in aplenat namsopu.

⁷Leka ale atoni Israel le sin natua anbi mnela Yizreel sin nen nak solalus Israel sin naen nafetin sin aoken, ma nak Nai Saul ma in anmone sin anmate nalali, sin naen nasaitan sin kot-kot sin. Ma atoni Filistin antok natua kokot nane.

⁸Leka noka fa atoni Filistin sin nem he nasik ale amates sin bale pake, sin napeni Nai Saul ma in anmone tenu sin anmate nalali anbi Neten Gilboa.

⁹Sin anpukai Nai Saul in bale pake makenat, ma an ote nafek in anakan, oke te sin neki anao. Nalali te sin ansonu haef neu pah Filistin ok-oke he natiaba lasi alekot nane neu to ma neu sin uisneno teta.

¹⁰Sobalu makenat Nai Saul nane sin nabela anbi sin ume le'u mese, ma in anakan sin nahoni anbi ume le'u Dagon nanan, sin uisneno teta.

¹¹Leka tuafen Yabes anbi Gilead sin nen sa' le atoni Filistin anmo'le neu Nai Saul,

¹²atoni-atoni abe'it ma matani anbi sin fun sin anao ma naiti Nai Saul aon ta'un nok in anmone sin, oke te sin neki sin neu Yabes. Sin ansub in anbi hau naek mese in un, nalali te sin nanahok neno hitu.

¹³Nai Saul anmate natuin in ka na'ki fa neu UISNENO, ma kan tao natuin fa In plenat-plenat sin. In kan toti fa fainekat na'ko UISNENO, mes na'ko smanaf-smanaf amates. Es nane te UISNENO ankas in ma nana'at in toko plenat neu Nai Daud Nai Isai anmone.