Read Uab Meto 1 TAWARIKH 11 Bible Online

1 TAWARIKH 11 - Uab Meto bible

1 TAWARIKH 11

¹Ale nakaf to Israel sin nem neu Nai Daud anbi Hebron ma sin nak, “Hai le i Usi ho in-ini kai.

²Na'ko afi ahunut, leka afi Nai Saul fe naplenat kai, ho es meki solalus Israel amnao ma amaken. Nesi na'ko nane te Usi ho UISNENO anmanba'an nalali nak Usi ho of es amtopu In nonot ma amfani kesel neu sin.”

³Es nane te Nai Daud anmo'e lasi manta'en nok ale nakaf-nakaf Israel nane. Oke te sin naiti in anfani Kesel Israel onle UISNENO anba'an nalali nanete natuin Nai Samuel.

⁴Anbi neno mese Kesel Nai Daud nok ale solalus Israel ok-oke sin anao ma nape' kot Yerusalem. Anbi tabu nane kot nane kanan Yebus, ma atoni Yebus sin es natua anbi nane, kot nane sin tuafen es sin.

⁵Atoni-atoni Yebus sin nak nalali neu Nai Daud, nak in of ka nabe'i fa hen tam neu kot nane. Mes Nai Daud nis ma anbe'u ma nasik nan sin kot baki lape le antek nak kot Sion. Anbi tabu nane Nai Daud naton nalali neu in ate sin nak atoni ahunut le namate atoni Yebus mese of in anfani solalus nakaf amnanut. Fun natuin Nai Yoab es ahun-hunut nape' ma anken atoni Yebus, es nane te naiti in anfani solalus nakaf amnanut. (Nai Yoab in ainaf bi Zeruya.) Leka nasik nan nalali kot baki lape Sion, Nai Daud natua anbi nane. Natuin lasi nane te na'ko neno nane kot baki lape nane antek nak “Kot Nai Daud.”

⁸Nai Daud nahakeb nafani kot nane nauba na'ko bale le namnanub neki nain anbi tubu aonbian neno saen; nalali te Nai Yoab anmepu mepu nane talantia nalali nani ok-oke.

⁹Nai Daud nabe'i ma anmatani piut, natuin UISNENO Akuasat Afin-finit anbab in.

¹⁰I kanaf-kanaf ale solalus nakaf Nai Daud le sin kanan mateka. Nok to Israel ok-oke, sin anmabe'u nalali he nati' Nai Daud anfani kesel onle UISNENO anba'an nalali. Ma sin antuntaku Nai Daud piut anbi in aplenat.

¹¹Solalus nakaf ahunut es Nai Yasobam atoni Hakhmoni, in nakaf neu “Triwira”. Anbi makenat hae mese in anlaban atoni 300 ma namate sin ok-oke neki in auni.

¹²Atoni le natuin Nai Yasobam anbi Triwira nane es Nai Eleazar Nai Dodo anmone na'ko ume Nai Ahohi.

¹³In es anpesi Nai Daud anbi makenat anbi Pas-Damim anlaban atoni Filistin. Leka solalus Israel sin naen nafetin sin aoken, in ma in solalus sin anhake nahelnok anbi lene ane kase atnanan ma anmaken ma anlaban atoni-atoni Filistin nane. Oke te UISNENO anfe lasi mnisat anaek neu sin.

¹⁵Anbi neno mese solalus nakaf 3 na'ko Nai Daud in solalus nakaf 30 le atomatas sin, sin anao ma naeku nok Nai Daud anbi baki lape mese anbi tubu fatu mese anhaumak Nuat Adulam. Anbi tabu nane atoni Filistin nahakeb sin um-ume anbi Anonof Refaim, ma atoni pukan mese na'ko sin antoko Betlehem.

¹⁷Nai Daud namnau in kuan ma in nak, “Ah, bait es anfe kau he inu oe na'ko oe mata anhaumak eno naek Betlehem.”

¹⁸Leka sin nen lasi nane, solalus nakaf tenu en nane sin antam anfini neu um-ume atoni Filistin oke te sin ansote oe na'ko oe mata nane, nalali te sin neki neu Nai Daud. Mes Nai Daud kan lomi fa he ninu, mes anopan oe nane on fua tulu neu UISNENO.

¹⁹Fun in namolok nak, “Anbi Uisneno In kanan, au ka nabe'i fa he inu oe i! Kalu au inu, onle au inu na' atoni-atoni le nana'at nalali sin monin!” Es nane te Nai Daud ka ninu fa oe nane. Nane solalus nakaf abe'it ma matani tenu en nane sin lasi-lasi alekot.

²⁰Solalus nakaf bo'tenu atomatas nane nakanab sin amsa nak “Tridasawira”. Nai Abisai Nai Yoab olif anfani nakaf neu sin. Hae mese in namate atoni 300 naki in auni, ma onane te in kanan mateka kun. Mes in be'in in matanin ka namnes fa nok solalus nakaf Triwira nane.

²²Solalus nakaf mese anteni le in kanan mateka es Nai Benaya Nai Yoyada anmone, atoni Kabzeel. In abe'it, ma matani nae le'uf kun. Meo pa'e naek nua na'ko Moab in namate nalali sin. Anbi neno mese nahenu nok ul sene-sene in antam neu bola' mese ma namate asu fui mese anbi nane.

²³In namate atoni Mesir mese amsa le in amnanun nane nesi na'ko meter nua ma nesi. Atoni nane anpake auni le nae le'uf kun, mes Nai Benaya anlaban in al neki hau tuka mese. Auni le anbi atoni Mesir nane in niman in nasik nan oke te in namate atoni nane neki auni nane.

²⁴Nane lasi-lasi alekot le Nai Benaya, in anmo'e, atoni mese na'ko solalus nakaf Tridasawira.

²⁵Anbi pukan nane, Nai Benaya in es atomatas, mes in ka namnes fa nok solalus nakaf tenu en nane. Nai Daud naiti in anfani nakaf apanat ma apaot neu in aon kun.

²⁶Maakatuin le i ale solalus nakaf bian sin le sin kan mateka: Nai Asael Nai Yoab olif Nai Elhanan Nai Dodo anmone atoni Betlehem Nai Samot atoni Harod Nai Heles atoni Peloni Nai Ira Nai Ikes anmone atoni Tekoa Nai Abiezer atoni Anatot Nai Sibkhai atoni Husa Nai Ilai atoni Ahohi Nai Maharai atoni Netofa Nai Heled Nai Baana anmone atoni Netofa Nai Itai Nai Ribai anmone atoni Gibea anbi pah uf Benyamin Nai Benaya atoni Piraton Nai Hurai atoni nonof-nonof Gaas Nai Abiel atoni Araba Nai Azmawet atoni Bahurim Nai Elyahba atoni Saalbon Nai Hasyem atoni Gizon Nai Yonatan Nai Sage anmone atoni Harari Nai Ahiam Nai Sakhar anmone atoni Harari Nai Elifal Nai Ur anmone Nai Hefer atoni Mekherati Nai Ahia atoni Peloni Nai Hezrai atoni Karmel Nai Naarai Nai Ezbai anmone Nai Yoel Nai Natan olif Nai Mibhar Nai Hagri anmone Nai Zelek ato(...)