Read Uab Meto 1 TAWARIKH 12 Bible Online

1 TAWARIKH 12 - Uab Meto bible

1 TAWARIKH 12

¹Leka Nai Daud in naen na'ko Kesel Nai Saul, in natnani neu Ziklag. Amakenat namfau ma le na'ki ma anmanoe anbi makenat sin nem nabua nok Nai Daud.

²Sin na'ko uf Benyamin on Nai Saul. Sin naklao nahinan ma na'finu nahin — leko neki niman a ne'u ai nok niman a'li.

³Sin nakaf es Nai Ahiezer ma Nai Yoas Nai Semaa na'ko Gibea in anmone sin: I meo pa'e sin esle' nane: Nai Yeziel ma Nai Pelet Nai Azmawet in anah-anah sin Nai Berakha ma Nai Yehu atoni Anatot Nai Yismaya atoni Gibeon, meo pa'e mateka mese le anfani nakaf mese na'ko abuat “Tridasawira”. Nai Yeremia, Nai Yehaziel, Nai Yohanan ma Nai Yozabad atoni Gedera Nai Eluzai, Nai Yerimot, Nai Bealya, Nai Semarya ma Nai Sefaca atoni Harufi Nai Elkana, Nai Yisia, Azareel, Nai Yoezer ma Nai Yasobam na'ko ume Nai Korah Nai Yoela ma Nai Zebaja Nai Yeroham in anah-anah sin atoni Gedor.

⁸Anbi tabu Nai Daud anbi bale kot mabaki lape anbi mnela snaen, amakenat atomatas ma ahinet anbi makenat na'ko uf Gad sin nem nabua nok Nai Daud. Sin le nane meo pa'e le ahinet anae le'uf anpake ben besi tika ma auni; sin abe'it ma matani atkiso sin onle asu fui ma sin a'naoken manoe le'uf onle lua.

⁹I sin kanken le antui sin maakatuin kanaf amnanut ma apalat: Nai Ezer, Nai Obaja, Nai Eliab, Nai Mismana, Nai Yeremia, Nai Atai, Nai Eliel, Nai Yohanan, Nai Elzabad, Nai Yeremia, Nai Makhbanai.

¹⁴Bian na'ko atoni-atoni Gad nane sin solalus nakaf amnanut le sin anfani nakaf neu atoni 1.000; bian anteni solalus nakaf le anfani nakaf neu atoni 100.

¹⁵Hae mese anbol anbi fun mese, leka Noe Yordan fe ansako solalus nakaf sin nane anlak noe nane ma anli'u tuafen nonof nane anbi aon neno saen ma anbi aon neno tesan noe nane.

¹⁶Anbi hae mese atoni pukan mese na'ko uf Benyamin ma Yehuda sin anao neu kot mabaki lape bale Nai Daud natua anbine.

¹⁷Nai Daud naeku nok sin ma nak, “Kalu hi aim on biaf-benuf hem bab kau, au hone ki he hi mibua mok kau. Hai amsimo ki meki nekaf amalinat. Mes kalu hi mitenab hem aneb kau neu musu, maski au ka mo'e fa amle'ut neu ki, Uisneno le hit amaf sin naluli ma nabes neune In nahin kun ma In of anfe neu ki kasat.”

¹⁸Mes es na'ko sin, Nai Amasai, le namuni te anfani nakaf neu abuat le antek nak “Tridasawira”, Smanan Knino Uisneno natua in ma in nak, “Koi Nai Daud, Nai Isai anmone! Haim bab ko! So nati' ho ma sin le anbab ko nati' sin nis ma anbe'u. Uisneno anpesi ko.” Onane te Nai Daud ansimo sin ma naiti sin anfani solalus nakaf anbi in ana' aikan.

¹⁹Leka Nai Daud nok atoni Filistin sin anken Kesel Nai Saul, solalus bian na'ko Manasye sin anlak ma anpesi Nai Daud. Namneo Nai Daud in kan bab fa atoni-atoni Filistin nane. Ale nakaf atoni Filistin anlenu in hen fani neu Ziklag natuin sin namtau in of anlak neu Kesel Nai Saul ma an aneb sin.

²⁰I kanaf-kanaf meo pa'e na'ko uf Manasye le anlak ma anpesi Nai Daud leka in anfani neu Ziklag: Nai Adnah, Nai Yozabad, Nai Yediael, Nai Mikhael, Nai Yozabad, Nai Elihu ma Nai Ziletai. Sin mese-mese anfani nakaf neu solalus 1.000.

²¹Sin meo pa'e abe'it ma matani sin anbab Nai Daud hen laban pukan abulalut. Anbi neno namuni te sin anfani solalus nakaf anbi ana' aikan Israel.

²²Ale kle'ot neno-neno te anmu'i atoni fe'u le nem nabua nok Nai Daud, talantia ka lo fa te pukan solalus Nai Daud anfani anae le'uf kun.

²³Leka Nai Daud anbi Hebron anmu'i amakenat namfau le ahinet kun sin nabuabok nok in. Sin anbab in he nati' nabe'i in anfani kesel anseka Nai Saul, anmatom nok lasi manba'an UISNENO. Sin amfauken onle i: Na'ko uf Yehuda: atoni 6.800, sin neki nani sin ben besi tika ma auni. Na'ko uf Simeon: atoni 7.100 le mahine anbi makenat. Na'ko uf Lewi: atoni 4.600. Nai Yoyada nakaf sanut mofut Nai Harun nok in-ini sin atoni: 3.700. Nai Zadok, atoni munif meo pa'e mese la abe'it ma matani nok in biafen: atoni 22 — sin al-al sin nakaf ume nanan. Na'ko uf Benyamin (uf Kesel Nai Saul): atoni 3.000; namfau Na'ko uf Benyamin sin na'ki nabalah nok Nai Saul. Na'ko uf Efraim: atoni 20.800 le makana anbi sin ume mese-mese. Na'ko uf Manasye le anbi aon neno tesan Noe Yordan: atoni 18.000 le anlek sin hen bab Nai Daud hen fani kesel. Na'ko uf Isakhar: nakaf 200 nok sin to sin; nakaf-nakaf i sin natetab nahin sa' le mes to Israel hen mo'e anmatom nok in tabu.</(...)

³⁸Ale meo pa'e nane sin anao neu Hebron le sin naloitnok hen maken ma nahelnok he naiti Nai Daud hen fani kesel neu Israel ok-oke. Ma ale atoni Israel bian amsa sin nekaf mese neu hen mo'e lasi nane.

³⁹Ale meo pa'e nane sin namaika anbi nane neno tenu nok Nai Daud ma sin anmo'e fesat ma sin anbukae ma ninu ale bukae ma mninut le atoni Israel bian sin naloitan nani neu sin.

⁴⁰Na'ko uf-uf neno aon bian a'li le na'lo amsa na'ko uf Isakhar, Zebulon ma Naftali, sin nem neki bikase luke mnanu, bikase paha snaen, bikase bian anteni, ma bijae le nasaeb neki bukae: ut, bub fua, tua min kase fuan le anmeto, tua mina mtasa ma mina bub fua mina. Sin neki amsa bijae ma bibi kase neu hen lolo he sin anbukae. Lasi nane nalile ma naton nak to anbi Israel ok-oke sin namlil anae le'uf.