Read Uab Meto 1 TAWARIKH 13 Bible Online

1 TAWARIKH 13 - Uab Meto bible

1 TAWARIKH 13

¹Kesel Nai Daud namolok nok ale in solalus nakaf sin le anfani nakaf neu solalus 1.000 ma nakaf neu solalus 100.

²Oke te in nak neu sin nak, “Kalu au bia ki hi al-al ki him lomi, ma UISNENO, hit Uisneno anlomi, leko hit atsonu haef neu ale Ana' fuat knino ma atoni-atoni Lewi anbi sin kuan mese-mese, ma neu hit to bian ok-oke he toti sin nem nabua nok kit anbi i.

³Nalali te hit atnao he taiti Peti Fef Bela Uisneno, le in mapolin kun anbi tabu Kesel Nai Saul in fe' ana' aplenat.”

⁴Ale atoni Israel le sin nabua anbi nane sin anmalin natuin lasi nane ma sin ansimo lasi nane.

⁵Onane te Nai Daud in nibun nabuab to Israel anbi pah ok-oke, na'ko nakat nok Mesir anbi aon bian a'ne'u talantia anao neu Lanan Hamat anbi aon bian a'li he naiti Peti Fef Bela nane na'ko Kiryat-Yearim ma neki neu Yerusalem.

⁶Oke te Nai Daud anao nok sin neu kot Baala, neu Kiryat-Yearim, anbi pah uf Yehuda he naiti Peti Fef Bela Uisneno. Peti nane nakanab nak, “UISNENO antunon anbi ahake neno sin tunkenu.”

⁷Leka sin nem antia Baala, sin naiti Peti Fef Bela nane na'ko Nai Abinadab in ume, oke te nasaeb neu aklet fe'u mese. Nai Uza ma Nai Ahyo sin natuin aklet nane,

⁸fun Nai Daud ma to Israel ok-oke sin nabso' ma ansi nahenu nok amlilat amoket, sin naliatas Uisneno neki biola, bano na'pasa a'nai tobes niti molo nua ma anfu to'is.

⁹Leka sin nem antia bale teli ane kase Nai Kidon ini, bijae le anhel aklet nane anpastun, onane te Nai Uza in nenu in niman ma in ana' Peti Fef Bela nane he nati' kais anmofu.

¹⁰Anbi tabu nane amsa UISNENO nato'an Nai Uza natuin in mo'et nane anfani on lasi si'ut mese neu UISNENO. Oke te UISNENO namate Nai Uza anbi nane. Es nane te bale nane antek nak “Perez-Uza”. Nai Daud nato' natuin UISNENO namate Nai Uza.

¹²Mes Nai Daud namtau amsa neu Uisneno ma in nak, “Au he eki Peti Fef Bela nane onme ka anbi tabu i ka?”

¹³Es nane te Nai Daud ka neki fa Peti Fef Bela nane anfini neu Yerusalem, mes in nabela anbi Nai Obed-Edom, atoni Gad in ume.

¹⁴Peti nane nabalah anbi nane funan tenu ma UISNENO anfe tetus neu Nai Obed-Edom ume nanan ma ale sa' le in anmu'i.