Read Uab Meto 1 TAWARIKH 14 Bible Online

1 TAWARIKH 14 - Uab Meto bible

1 TAWARIKH 14

¹Kesel Nai Hiram na'ko pah Tirus ansonu in haefen neu Nai Daud, onane amsa hau aijob Libanon ma apakae hau ma apakae fatu he nahakeb sonaf.

²Es nane te Nai Daud in nahin nak UISNENO naki'ab nalali in on Kesel Israel ma nahelan in aplenat neu UISNENO In nonot kun.

³Anbi Yerusalem Nai Daud in naiti fenai fauk-fauk anteni anfani in fenai sin; ma napeni anah-anah anteni.

⁴In anmone sin le nahonis sin anbi Yerusalem es: Nai Syamua, Nai Sobab, Nai Natan, Nai Salomo,

⁵Nai Yibhar, Nai Elisua, Nai Elpelet,

⁶Nai Nogah, Nai Nefeg, Nai Yafia,

⁷Nai Elisama, Nai Beelyada ma Nai Elifelet.

⁸Leka atoni Filistin sin anen nak naiti nalali Nai Daud anfani kesel neu Israel ok-oke, sin nem hen heke in. Nai Daud anpoi ma anmaken nok sin.

⁹Fun anbi tabu nane atoni Filistin sin nem antia nalali anbi Anonof Refaim ma sin nabak ale sa'-sa' anbi anonof nane.

¹⁰Leka Nai Daud in anen lasi nane te in aniti Uisneno nak, “Koi UISNENO, au he nao ka he maken ok atoni-atoni Filistin nane ka? Hom fe neu kau lasi mnisat ka?” UISNENO natae nak, “Amnao nai, ma amken sin nai!” “Au of a'fe neu ko lasi mnisat!”

¹¹Onane te Nai Daud ma in solalus sin anao ma anken atoni-atoni Filistin nane anbi Baal-Perasim ma sin nis ma anbe'u sin. Nai Daud in namolok nak, “Uisneno anpake nalali kau he au upe' musu sin bale le nataunok anbine onle noe sako natseleb ale sa'-sa' anbi tabu smela mese.” Es nane te bale nane antek nak Baal-Perasim.

¹²Leka solalus Filistin sin naenan, sin kan mu'i fa sona he neki sin le'u mahuma sin uisneno teta. Nai Daud anlenu sin he nati' notu nani ale le'u mahuma nane.

¹³Fun ka lo fa onane te atoni Filistin sin nem ma nabak anteni anbi Anonof Refaim.

¹⁴Hae mese anteni Nai Daud antoti Uisneno, ma Uisneno natae in nak, “Kais mupe' sin na'ko i, mes amnao amfun sin ma amken sin na'ko aon bian, anhaumak hau murbae sin.

¹⁵Kalu hom nen aslutuf onle atoni haen anteli anbi hau nane sin tunken, hom nao mat nai, natuin Au of anao uhunun ko he is ma be'u solalus Filistin.”

¹⁶Nai Daud anmo'e natuin sa' le Uisneno anlenu neune. In ma in solalus sin anli'u na'aenab solalus Filistin na'ko Gibeon talantia Gezer.

¹⁷Nai Daud in kanan mateka anbi me-me, ma UISNENO anmo'e ale uf sin namtausan Nai Daud.