Read Uab Meto 1 TAWARIKH 15 Bible Online

1 TAWARIKH 15 - Uab Meto bible

1 TAWARIKH 15

¹Nai Daud nahakeb ume neu in aon anbi kot Kot Nai Daud, ma naloitan bale neu Peti Fef Bela Uisneno oke te antao um-ume neu Peti Fef Bela nane.

²Nai Daud in nak, “Al atoni Lewi anmese nabe'i naiti Peti Fef Bela UISNENO, natuin UISNENO anbeti sin hen loi Peti nane talantia nabal-bal.”

³Es nane te Nai Daud in no'en atoni Israel ok-oke nem neu Yerusalem he natnanib Peti Fef Bela UISNENO neu bale le in naloitan nalali.

⁴Oke te Nai Daud anlenu sanut mofut Nai Harun ma atoni Lewi sin nabua.

⁵Na'ko ume Nai Kenat, uf Lewi, Nai Uriel es antomat anfani nakaf neu in ume sin 120.

⁶Na'ko ume Nai Merari Nai Asaya es antomat anfani nakaf neu atoni 220.

⁷Na'ko ume Nai Gerson Nai Yoel es antomat anfani nakaf neu atoni 130.

⁸Na'ko ume Nai Elsafan Nai Semaya es antomat anfani nakaf neu atoni 200.

⁹Na'ko ume Nai Hebron Nai Eliel es antomat anfani nakaf neu atoni 80.

¹⁰Ma na'ko ume Nai Uziel Nai Aminadab es antomat anfani nakaf neu atoni 112.

¹¹Oke te Nai Daud no'en Ana' Fuat Knino Nai Zadok ma Ana' Fuat Knino Nai Abyatar ma atoni Lewi ne en nane, es: Nai Uriel, Nai Asaya, Nai Yoel, Nai Semaya, Nai Eliel ma Nai Aminadab.

¹²Nai Daud nak neu sin nak, “Hi nakaf ume nanan ki neu uf Lewi. Es nane te, nati' hi ma atoni Lewi bian anteni miknino hi aom he nati' nabe'i hi mitnanib Peti Fef bela UISNENO, atoni Israel sin Uisneno, neu bale le au uloitan ulali.

¹³Afi leka Peti anne natnanib anbi hae ahunut, he kam bi fa bale nane he nati' hi meki mani. Es nane te UISNENO, hit Uisneno, anfe kasat neu kit natuin kit taluli neu In kan matom fa nok In lomin.”

¹⁴Es nane te, ale Ana' fuat knino ma atoni Lewi miknino hi aom he nati' nabe'i hi mitnanib Peti Fef Bela UISNENO, atoni Israel sin Uisneno.

¹⁵Ma anbi tabu natnanib Peti nane, sin anloi neki hau loi' anbi sin benken, natuin lekat lulut le UISNENO anfe nani neu Nai Musa.

¹⁶Nai Daud amsa anlenu ale nakaf atoni Lewi sin he nati' natetab atoni fauk na'ko sin uf he nati' sin ansi ma anleku biola ma na'pasa nai tobes niti molo nua ma ansi sit amlilat fauk-fauk.

¹⁷Na'ko ume nanan asit sin, sin anbeti atoni-atoni le i sin na'pasa nai tobes niti molo es: Nai Heman Nai Yoel anmone nok in biafen Nai Asaf Nai Berekhya anmone, ma Nai Etan Nai Kusaya anmone na'ko Nai Merari ume nanan. He nati' natuin sin ma hen leku biola han amnanut anbeti atoni-atoni i: Nai Zakharia, Nai Yaaziel, Nai Semiramot, Nai Yehiel, Nai Uni, Nai Eliab, Nai Maaseya ma Nai Benaya. He nati' sin anleku biola han amnebet anbeti atoni-atoni Lewi i: Nai Matica, Nai Elifele, Nai Mikneya, Nai Azazya, ma atoni apao Ume UISNENO sin nua, Nai Obed-Edom ma Nai Yeiel.

²²Anbeti Nai Kenanya anfani nakaf neu ale asit na'ko uf Lewi, natuin in ahinet anbi lasi sit.

²³Nai Berekhya ma Nai Elkana nok Nai Obed-Edom ma Nai Yehia anbeti sin anfani apaot neu Peti Fef Bela UISNENO. Fun anbeti ale Ana' fuat knino i: Nai Sebanya, Nai Yosafat, Nai Netaneel, Nai Amasai, Nai Zakharia, Nai Benaya ma Nai Eliezer anbeti sin hen fu to'is anbi Peti nane in matan.

²⁵Ma Kesel Nai Daud nok ale nakaf Israel ma solalus nakaf sin anao neu Nai Obed-Edom in ume he naiti Peti Fef bela nane nok malinat anaek.

²⁶Natulu bijae keso hitu ma bibi kase hitu neu Uisneno natuin In anbab nalali atoni Lewi le sin naiti Peti Fef Bela nane.

²⁷Anbi tabu nane Nai Daud anpake sobalu bet kone na'ko pilu muti mnutu, onane amsa ale asit sin ma sin nakaf Nai Kenanya ma atoni-atoni Lewi le anloi Peti Fef Bela nane. Nai Daud amsa anpake sobalu Efod.

²⁸Nonot Israel ok-oke sin anao natuin Peti Fef Bela nane talantia Yerusalem nok a'baf amlilat, to'is hanan, knit hanan, na'pasa nai tobes niti molo ma biola.

²⁹Leka fe neki Peti nane antam neu kot, bi Mikhal Nai Saul anfetnai ankiso nao nok eno kiso ma in nit Kesel Nai Daud nabso' ma namlil namoke kun. Bi Mikhal in anaben anmanisi kun leka in nit Nai Daud onane.