Read Uab Meto 1 TAWARIKH 17 Bible Online

1 TAWARIKH 17 - Uab Meto bible

1 TAWARIKH 17

¹Leka Kesel Nai Daud antoko na'ki anbi in sonaf, anbi neno mese in no'en Mafefa Knino Nai Natan ma nak, “Amkiso, au utua anbi sonaf le anmo'e neki hau aijob Libanon, mes Peti Fef Bela UISNENO al anbi um-ume!”

²Nai Natan natae nak, “Munaoba nai ho Usi salit natuin Uisneno anbab ko Usi.”

³Mes anbi fai nane Uisneno nakua a'an neu Nai Natan nak,

⁴“Amnao nai ma mutiaba Au a'ak i neu Au ate Nai Daud mak, ‘Ka ho fa es of he muhakeb ume neu Kau.

⁵Na'ko afi Au ufetin Israel na'ko Mesir talan te neno i, Au fe ka utua it fa anbi ume mese. Fun Au uonisok piut ma Au utua a'bi um-ume mese.

⁶Leka Au uonisok ok Israel Au fe ka utoti it fa neu ale nakaf le Au beti ulali sin, nansa' sin ka nahakeb fa ume mese neu Kau neki hau aijob Libanon.’

⁷Es nane te, Natan, mutonan Au ate Nai Daud mak Au, UISNENO Akuasat Anesit Afinit, Au ukua Au a'ak neune ak, ‘Au beti ulali ko na'ko ho mepu le mutuku ho bibi kase sin anbi mnela, ma Au aiti ko amfani kesel neu Au nonot Israel.

⁸Au bab ulali ko leka ho amnao ambi me-me amsa, ma ale ho musu sin Au ule'un sin anbi tabu ho amaken ma amanua mok sin. Au of anmo'e ho kanam mateka onle anaet-anaet anesit anbi pah pinan.

⁹Neu Au to Israel uloitan ulali bale hen fani sin pah ma sin nifu he nati' sin anmoni nok tainine ma ka naunu fa sin anteni. Na'ko afi sin nem neu pah i, ma afi le sin fe kan mu'i fa kesel, fun atoni abulalut sin nem nape' ma anken sin. Mes lasi nane of kan bol anteni fa. Au manba'an of Au is ma be'u hi musu sin, ma of Au fe sanut mofut neu ki.

¹¹Leka antia in tabu, ma ho uam namsopu ma ansub ko anbi ho amaf sin naukel, mese na'ko ho anah sin of Au aiti in anfani kesel. In es of nahakeb ume neu Kau. In aplenat of Au uki'ab ani, ma es na'ko in sufan of anfani kesel talan te nabal-bal.

¹³Au of a'fani amaf neu in ma in of anfani Au anmone. Au of anmo'e alekot piut neu in anmatom nok Au lasi manba'an. Au lasi manba'an neu in Au of ana' piut, ka onfa le Au mo'e neu Nai Saul le Au utnanib in na'ko in a'toko plenat he nati' nabe'i ho amfani kesel.

¹⁴Ho anmone le Au beti nane Au of aiti in anfani kesel neu Au nonot ma neu Au plenat talan te nabal-bal, ma in anah-anah sin na'ko batan neu batan of sin ana' aplenat on kesel.’ ”

¹⁵Nai Natan natonan Nai Daud ale lasi le Uisneno naton nalali neune.

¹⁶Oke te Kesel Nai Daud antam neu Um-ume UISNENO. In antoko ma anonen toti nak, “Koi UISNENO au Uisneno, au ma au ume nanan sin hai kam tamaf ota hem simo ale lasi alekot le Ho mulile neu kau talan te neno i.

¹⁷Ho mo'e lasi alekot anesi na'ko nane; Ho mo'e mulali lasi manba'an antom au sanut mofut sin neu neno amnemat. Fun nesi na'ko nane Ho mo'e kau on atoni anaet mese.

¹⁸Sa' anteni ka le nabe'i au he mo'e neu Ko, koi UISNENO, au Uisneno? Ho muhin au lasi ok-oke antom Ho ate kau le i, mes Hom fe lasi tola neu kau.

¹⁹Natuin Ho lomim kun ma neu au monik Ho mo'e ale lasi naek i nok mat-mat.

²⁰Ale Ho mes kum Uisneno, katit fa esle' he namnes nok Ko. Hai mihin lasi nane fun afi naton nalali neu kai.

²¹Anbi pah pinan ok-oke katit fa uf mese onle Israel. Israel nane lo in uf mese kun le Ho mufetin mulali na'ko lasi an-atenon hen fani Ho nonot kun. Ale Ho taos ma Ho mo'et anaet ma amkakat le Ho mo'e neu sin anmo'e Ho kanam mateka anbi pah pinan ok-oke. Ho mufetin Ho nonot na'ko Mesir, ma amli'u uf-uf bian anbi tabu Ho nonot anao mat hen makan ma anmanua.

²²To Israel Ho mo'e mulali sin anfani Ho nonot talan te nabal-bal. Ma Ho, koi UISNENO, ma Hom fani Uisneno neu sin.

²³Es nane te, koi UISNENO au Uisneno, so Ho muki'ab nai Ho lasi manta'en le Ho muton mulali antom au aok ma au sanut mofut sin so Ho munaoba nai sa' le Ho manta'en mulali nane.

²⁴Of nanaeb Ho kanam anbi me-me ma of sin namolok nak, ‘UISNENO Akuasat Anesit Afinit nane Uisneno neu atoni Israel kun. Of antia nabal-bal es na'ko au sanut mofut of in ana' aplenat on kesel.

²⁵Au uhelan au aok ma au usaeba onen totis i neu Ko, koi Uisneno, natuin Ho mekinom muton mulali neu kau mak au anah sin batan-batan of Ho maiti sin anfani kesel neu to i.

²⁶Ma ho, UISNENO, Ho Uisneno Ko, fun lasi alekot nane Ho manta'en mulali neu kau.

²⁷Es nane te, au toti neu Ko, so nati' Hom fe tetus neu au sanut mofut sin he nati' sin anaben Ho manekam piut talan te nabal-bal. Natuin, Hom fe mulali tetus neu Ho nonot, koi UISNENO, es nane te of Hom fe neu sin tetus talan te nabal-bal.