Read Uab Meto 1 TAWARIKH 18 Bible Online

1 TAWARIKH 18 - Uab Meto bible

1 TAWARIKH 18

¹Tabu fauk-fauk namuni na'ko nane te Kesel Nai Daud anmaken ma anbe'u atoni Filistin ma nasik nan kot Gad nok ale kuan anfun natef bale nane.

²Nai Daud amsa nis ma anbe'u atoni Moab talan te sin atenok ma anbaen noni poni neu in.

³Namuni te Nai Daud nis ma anbe'u Nai Hadadezer, kesel anbi Zoba anhaumak Hamat anbi pah Siria. Anbi tabu nane Nai Hadadezer fe in anfen ma anao he naplenat pah anhaumak Noe Efrat.

⁴Nai Daud nasik nan aklet makenat 1.000, ma anheke nan solalus asae bikase 7.000 ma solalus le anao hae 20.000. In nale'un ale bikase, ma namaika bian, neu aklet makenat 100.

⁵Atoni Siria na'ko Damsyik ansonu solalus hen bab Kesel Nai Hadadezer, mes Nai Daud in nis ma anbe'u sin ma namate atoni 22.000.

⁶Nalali te in nahakeb ume solalus ma natokob solalus anbi sin pah ma sin atenok ma anbaen noni poni neu in. Anbi bale me-me le Nai Daud anmaken UISNENO anfe neune lasi mnisat.

⁷Nai Daud in nasik nan ale bena mnatu anini aof le solalus Nai Hadadezer anpake sin anbi makenat ma neki sin neu Yerusalem.

⁸Fun nesi na'ko nane te Nai Daud naiti neki niti molo amfau le'uf na'ko Tibhat ma Kun, kot-kot le afi Nai Hadadezer naplenat sin. (Anbi neno namuni te ale niti molo nane Nai Salomo anmo'e pik oe, ma ni ma bale luli besa anbi Ume UISNENO.)

⁹Kesel Nai Tou na'ko Hamat in anen nak Nai Daud nis ma anbe'u nalali solalus Nai Hadadezer.

¹⁰Es nane te in ansonu in anmone Nai Yoram he natiaba lasi alekot neu Kesel Nai Daud ma antek lasi aomina neune, natuin in lasi mnisat nane fun Nai Hadadezer anfoenanat anmaken nok Nai Tou. Nai Yoram in nem neu Nai Daud neki atnatas mnatu namfau, noni muti ma niti molo.

¹¹Kesel Nai Daud in natulu ale atnatas nane neu UISNENO he nati' anpake sin anbi lasi luli besa. Fun in anmo'e onane amsa neu ale bale' le in nasik nan sin na'ko Nai Hadadezer ma uf-uf le in nis ma anbe'u sin, uf Edom, Moab, Amon, Filistin ma Amalek.

¹²Nai Abisai (in ainaf kanan bi Zeruya) in nis ma anbeu ma namate atoni Edom 18.000 anbi Nonof Min mali.

¹³Oke te in nahakeb ume solalus anbi Edom ok-oke. Ma atoni-atoni Edom sin atenok neu Kesel Nai Daud. UISNENO anfe lasi mnisat neu Nai Daud leka in anmaken anbi me-me.

¹⁴Onle nane Nai Daud in naplenat Israel ok-oke ma in anpanat he nati' in to anmoni nok amneot ma alekot.

¹⁵I ana' aplenat amnanut sin le Nai Daud naiti sin: Solalus nakaf amnanut: Nai Yoab Nai Abisai in tataf. Lultunis sonaf: Nai Yosafat Nai Ahilud anmone. Ale Ana' Fuat Knino: Nai Zadok Nai Ahitub anmone ma Nai Ahimelekh Nai Abyatar anmone. Lultunis pah: Nai Sausa. Nakaf apaot apanat neu kesel: Nai Benaya Nai Yoyada anmone. Nai Daud in anmone sin, sin ana' mepu-mepu anaet anbi plenat in nanan.