Read Uab Meto 1 TAWARIKH 19 Bible Online

1 TAWARIKH 19 - Uab Meto bible

1 TAWARIKH 19

¹Tabu fauk-fauk namuni na'ko nane te Nai Nahas kesel Amon anmate, ma Nai Hanun in anmone anfani kesel anseka in.

²Oke te Nai Daud in nak, “Nai Nahas nane au sob leko aki'at, es nane te au of he mo'e alekot amsa neu in anmone Nai Hanun.” Es nane te Nai Daud ansonu haef neu pah Amon hen fe neka mina neu in fun natuin in amaf anmate nalalien. Leka sin nem antia Amon,

³ale nakaf pah nane nak neu Kesel Nai Hanun nak, “Kais ho Usi mutenab mak Nai Daud in sonu in haefen nane natuin in lomi he nanaeb ho Usi ama! In ansonu atoni-atoni nane nem neu i he natnu' ma anmatkiso hit pah, he nati' in nasik nani!”

⁴Kesel Nai Hanun anheke Nai Daud in haefen nane, an eu aobia sin konon, anlefi sin abtais talan te sin pusun un, ma anlenu sin anao anfani.

⁵Mes sin namaebok he nao anfani, es nane te sin anao neu Yerikho. Leka naton lasi nane neu Nai Daud, in ansonu haef ma natonan sin he nati' haefen nane sin namaika anbi Yerikho talan te sin konon anmoni anfani anteni.

⁶Oke te Kesel Nai Hanun ma atoni Amon sin nahin nak sin taos nane anmo'e Nai Daud anmusu nok sin. Es nane te sin ansonu noni muti kilo 34.000 neu pah Mesopotamia Pa' Fafon, ma neu Maakha ma Zoba anbi Siria hen seb aklet makenat 32.000 ma solalus asae bikase. Ma solalus Kesel Nai Maakha sin nem nok ale sin aklet makenat le anseb sin nane ma nahakeb sin um-ume anhaumak Medeba. Atoni Amon amsa sin nem na'ko ale sin kot hen makenan.

⁸Leka Nai Daud in nen lasi nane in anlenu Nai Yoab nok ale in solalus ok-oke sin anfen ma anao mat ma anlaban musu.

⁹Atoni Amon anpoi ma nahakeb sin pukan solalus sin anbi eno naek Raba matan, sin ana' a'plenat kot, ma kesel sin le sin nem nalali hen bab sin, sin nahakeb sin pukan solalus anbi mnela.

¹⁰Nai Yoab in nit nak pukan solalus musu anhaklelat sin anbi mat ma koti nok. Es nane te in anbeti solalus mabeti sin ma nahakeb sin anmabaina nok pukan solalus Siria.

¹¹Ma solalus Israel nesin bian nane in nana'at sin neu in olif Nai Abisai, le nahakeb sin anmabaina nok solalus Amon.

¹²Nai Yoab nak neu in olif nane nak, “Kalu au ka ube'i teni fa he laban solalus Siria sin, nati' ho manap hem bab kau. Ai leka, kalu ho ka mube'i amteni fa hem laban solalus Amon sin, of au aum ma bab ko.

¹³Amhataniom nai! Aum he hit mabe'u nok matani neu hit to ma neu hit Uisneno In kot-kot sin. So nati' UISNENO anmo'e sa' le In anlomi.”

¹⁴Fun Nai Yoab ma in pukan solalus sin anfen ma anao mat ma anmaken, talan te solalus Siria sin naenan.

¹⁵Leka atoni Amon sin nit solalus Siria sin naenan, ain amsa naenan na'ko Nai Abisai ma naskotu antam neu kot. Leka sin anmaken sin nis ma anbe'u nalali atoni Amon, Nai Yoab anfani neu Yerusalem.

¹⁶Atoni Siria sin nahin nak atoni Israel sin nis ma anbe'u nalali sin. Es nane te sin no'en sin solalus sin le na'ko pah aon neno saen Noe Efrat ma anlenu in solalus sin hen makenan ma Nai Hadadezer kesel Zoba in solalus nakaf amnanut Nai Sobakh es ana' sin anbi makenat nane.

¹⁷Ma leka Nai Daud in nen lasi nane, Nai Daud nabuab pukan solalus Israel ok-oke, oke te sin anlak Noe Yordan ma nahakeb in pukan solalus sin anmabaina nok atoni Siria. Fun sin anmakenan,

¹⁸ma solalus Israel anli'u naaenab solalus Siria. Nai Daud nok in solalus sin namate atoni 7.000 le ana' aklet makenat ma solalus le anao hae atoni 40.000. Ma Nai Sobakh solalus nakaf amnanut sin namate in amsa.

¹⁹Leka ale kesel sin le Nai Hadadezer naplenat sin fun sin nit nak solalus Israel anbe'u nalali sin, sin antoti hen halan pah nok Nai Daud, ma sin atenon neu in. Oke te atoni Siria kan lomi fa hen bab anteni atoni Amon.