Read Uab Meto 1 TAWARIKH 21 Bible Online

1 TAWARIKH 21 - Uab Meto bible

1 TAWARIKH 21

¹Nitu anlomi he nale'un atoni Israel; es nane te in anfuli Nai Daud he nati' anso'i smanaf.

²Fun Nai Daud nak neu Nai Yoab nok ale in solalus nakaf sin nak, “Amso'i nai smanaf anbi Israel ok-oke talan te bale me-me, natuin au he uhin to Israel sin amfaun.”

³Nai Yoab natae nak, “So nati' UISNENO ansato to Israel talan te hae natun mese na'ko sin amfauken anbi neno i. Koi Usi Apinat, ai ka naknino nalali fa nak sin nausi neu ko Usi? Nansa' talantia mes het no'i smanaf? Mes, natuin sanat nane, to ok-oke ansutai lasi amle'ut nane!”

⁴Mes kesel ana' nahel piut neu in lasi tfeka nane, es nane te Nai Yoab in anao neu Israel ok-oke, fun in anao antia bale me-me anbi Israel, oke te anfani nem neu Yerusalem,

⁵ma naton neu Kesel Nai Daud lasi so'i smanaf in amfaun. Atoni le nanokab lekat lulut hen tam solalus 1.100.000 le anbi Israel ma atoni 470.000 anbi Yehuda.

⁶Mes uf Lewi ma uf Benyamin kan tam fa anbi so'it nane. Nai Yoab in kan so'i fa smanaf anbi sin natuin in kan lomi fa he nanaob kesel in aplenat nane.

⁷Uisneno kan malin fa nok so'i smanaf nane ma In anfe kasat neu atoni Israel.

⁸Oke te Nai Daud in onen toti neu Uisneno nak, “Koi Uisneno, au usanab anae le'uf neu Ko! Amsako kau au sanat sin, fun natuin au taos ma au mo'et nane lasi amonot anae le'uf kun.”

⁹UISNENO nakua a'an neu Mafefa Knino Nai Gad, le anfani amnek a'an na'ko UISNENO neu Nai Daud nak,

¹⁰“Amnao nai ma nutonan Nai Daud mak Au a'fe neune lasi nono tenu he in anbeti. Sa' le in anbeti of Au mo'e ani.”

¹¹Oke te Nai Gad anao neu Nai Daud ma natiaba a'an UISNENO nane, nak, “Ho hem beti lasi me:

¹²Lasi amnahas nem neu pah i funan tenu, ai musu anli'u ko piut-piut funan tenu, ai UISNENO nale'un pah i neno tenu neki In suni anbi men le'uf, ma In ahake neno tunan neki amle'ut anbi me-me. Mufek nai anbi tabu i sa' mes au he utiaba neu UISNENO.”

¹³Nai Daud natae nak, “Koi, amle'ut neu kau! Mes leko nesi UISNENO anfe kau kasat, natuin In nek mamun anae le'uf kun, na'ko atoni pah pinan ankas kau.”

¹⁴Ma UISNENO nasanut menas amle'ut neu atoni Israel talan te atoni 70.000 na'ko sin anmate.

¹⁵Oke te UISNENO ansonu ahake neno tunan mese he nale'un Yerusalem. Mes leka ahake neno tunan nane in nem anhaumak bale teli ane kase Nai Arauna atoni Yebus in-ini, UISNENO nabaina In lasi tfeka hen fe kasat neu to nane. In nakua a'an neu ahake neno tunan nane nak, “Namautu nai! Musnas nai!”

¹⁶Nai Daud in nit ahake neno tunan nane naplel anbi neno tunan ma pah pinan atnanan. In neki suni anbi in niman, ahake neno tunan nane in naloitan he nale'un Yerusalem. Es nane te Nai Daud ma ale nakaf-nakaf to, le anbi tabu nane sin fe anpake kalo anfani ataka neu sin ansaneok, sin anbentok neu afu.

¹⁷Nai Daud in onen toti, nak “Koi Uisneno, au es anmo'e sanat. Au es a'lenu ma anso'i to nane. To i namneo-namneo sin ka nasanab fa! Koi UISNENO, au Uisneno, amkas kau nai nok au ume nanan sin, mes muskotun lasi amle'ut i nai na'ko Ho nonot.”

¹⁸Oke te UISNENO In ahake neno tunan nane anlenu Nai Gad he natonan Nai Daud nak in mes hen sae neu bale teli ane kase Nai Arauna in-ini ma nahakeb baki tulu neu UISNENO anbi nane.

¹⁹Fun Nai Daud in anfen ma anao anmatom nok UISNENO In aplenat le Nai Gad natiaba nani neune.

²⁰Anbi bale teli ane kase nane Nai Arauna ma in anmone ha sin fe sin anteli ane kase. Leka sin nit ahake neno tunan nane Nai Arauna ma in anmone ha sin fun sin naenan ma natolo'.

²¹Leka Nai Arauna in nit Kesel Nai Daud ankoenon nem, in nem ma ansenu Nai Daud ma in nabes anbi in matan.

²²Nai Daud nak neune nak, “Au he uhakeb baki tulu anbi bale i neu UISNENO, he nati' menas amle'ut i nasnas. Es nane te musosa nain i neu kau. Muton neu kau in upan fauk, of au baen ani.”

²³Nai Arauna natae nak, “Koi, ho maiti nai, Usi, ma munaoba sa'-sa' le Usi hom naben leko kun. Ale bijae i neu fua tulu mnotu ma neu hau mnotu nabe'i Usi hom pake bena teli i. Fun amlomi te maiti ane kase neu fua tulu. Au fe ale nane oke, au Usi kais hom baen.”

²⁴Mes kesel natae nak, “Kaisa! Au lomi he sos eki upa le namneo. Au ka lomi fa he utulu neu UISNENO sa' le ho in-ini ai sa' le au upeni nok lum-luman.”

²⁵Fun Nai Daud in anbaen Nai Arauna in nain nane neki noni mnotu 600.

²⁶Oke te Nai Daud nahakeb baki tulu mese neu UISNENO, ma natulu fua tulu mnotu ma fua tulu halan anbi nane. Nalali te in onen toti ma UISNENO natae in onen totis nane ma nasanut ai na'ko neno tunan ma notu nani ale fua tulu anbi baki tulu nane in tunan.

²⁷Oke te UISNENO anlenu ahake neno tunan nane natap nafani in suni, ma ahake neno tunan nane anmo'e natuin UISNENO In aplenat nane.

²⁸Leka Nai Daud in nit nak UISNENO natae in onen totis natuin in fua tulu nane, onane te in natulu anteni fua tulu anbi baki tulu nane.

²⁹Anbi tabu nane Um-ume UISNENO le Nai Musa anmo'e anbi mnela snaen, ma baki tulu neu fua tulu mnotu fe nabalah anbi bale luli besa anbi Gibeon.

³⁰Mes Nai Daud in ka nabe'i fa he nao neu bale nane he namolok nok Uisneno, natuin in namtausan suni UISNENO le anbi ahake neno tunan nane in niman.