Read Uab Meto 1 TAWARIKH 22 Bible Online

1 TAWARIKH 22 - Uab Meto bible

1 TAWARIKH 22

¹Es nane te Nai Daud nak, “Anbi bale le i mes nahakeb Ume UISNENO. Ma anbi baki tulu le i to Israel sin mes natulu fua tulu mnotu neu UISNENO.”

²Kesel Nai Daud anlenu nabuab atoni anao amnemat le namaika anbi pah Israel, oke te in anlenu sin ma anmepun. Bian na'ko sin anto'i fatu he nahakeb Ume UISNENO.

³Nai Daud in nabuab besi namfau, hen mo'e kusat ma kusat malaub neu eno-eno naek Ume UISNENO nane. In amsa nabuab noni molo namfau, talan te kan tai nabe'i fa.

⁴Na'ko Tirus ma Sidon in antoti aijob Libanon amfau le'uf amsa.

⁵Nai Daud in anmo'e ale nane ok-oke natuin in natenab on i: “Au mes he uloitan ale sa' neu he nahakeb Ume UISNENO. Natuin Nai Salomo au anmone fe' munif, ma in mahinen fe kan menua fa leko, mes Ume UISNENO le of in nahakeb nane mes he namas anae le'uf kun ma mateka kun anbi pah pinan ok-oke.” Fun Nai Daud fe ka nasaebon fa, in naloitan ale sa'-sa' amfau le'uf kun neu he nahakeb ume nane.

⁶Nai Daud in no'en in anmone, Nai Salomo, ma anlenu in he nahakeb ume neu UISNENO le nonot Israel naluli nabes neune.

⁷Nai Daud nak neu Nai Salomo nak, “Au anmone, au utenab ulali a'lo le'uf kun he uhakeb ume mese neu he uliatas UISNENO au Uisneno.

⁸Mes UISNENO nakua a'an nak au aiti ulali lasi makenat ma manuat anae le'uf kun ma au umate ulali atoni amfau le'uf kun. Es nane te In ka nafetin kau fa he uhakeb ume neu In.

⁹Maski onane amsa, In anfe nalali neu kau lasi manta'en i: ‘Of ho mupeni anmone mese le of naplenat nok tainine, natuin of Au bab in talan te katit fa musu le hen ken in. Of nakanab in Nai Salomo natuin leka in naplenat, of Au fe tainine neune ma lasi halan anbi Israel ok-oke.

¹⁰Ho anmone nane es of nahakeb ume neu Kau. In of anfani Au anah ma Au of a'fani in Amaf. Toko plenat Israel of nabalah anbi in sanut mofut sin talan te nabal-bal.’ ”

¹¹Oke te Nai Daud namolok anteni nak, “Es nane, au anmone, so nati' UISNENO hi Uisneno anbab ko piut. Ma so nati' ho mis kum ma muhakeb ume neu UISNENO onle In anba'an nalali.

¹²Ma so nati' UISNENO ho Uisneno anfe neu ko nek mahine ma nek keon he muplenat Israel anmatom nok In plenat-plenat sin.

¹³Kalu ho mutuin ale In plenat sin le UISNENO anfe nani neu Nai Musa he natiaba nani neu Israel, of ho mis kum. Ho mes he muteb ma amhataniom nai. Kais mumtau leka hom tumatan lasi sa'-sa' amsa.

¹⁴Antom Ume UISNENO nane au uhelnok ulali nok matani ma au ubuab ulali noni mnatu ton 3.400 ma noni muti anesi na'ko ton 34.000. Ma anesi na'ko nane anmu'i noni molo ma besi le amfaune ka maso'ik fa. Hau ma fatu amsa au uloitan ulali, mes of ho amsato amteni.

¹⁵Ho mu'i ameput namfau. Bian anmepu anbi hani fatu, anmu'i afae hau, apae fatu ma amakoet namfau le nahin ma anmepu mnatu,

¹⁶noni muti, noni molo ma besi. Es nane te, amfen nai, ma amepu nai lab-lab! So nati' UISNENO anbab ko.”

¹⁷Oke te Nai Daud anlenu ale nakaf Israel sin he nati' sin anbab Nai Salomo.

¹⁸Fun in nak, “UISNENO, hi Uisneno anbab nalali ki, ma anfe ki halan ma tainine anbi pah ok-oke. In anfe nalali neu kau ma au is ma be'u ale uf le afi sin natua anbi pah i. Muni i sin nausi neu ki ma neu UISNENO.

¹⁹Es nane te, so nati' him atenom neu UISNENO meki hi smanam ma hi monim. Neu nai mihakeb nai ume neu UISNENO, he nati' In Peti Fef bela ma ale In bale' bian le anpake nateta sin neu luli besa nabe'i nabela sin anbi nane.”