Read Uab Meto 1 TAWARIKH 23 Bible Online

1 TAWARIKH 23 - Uab Meto bible

1 TAWARIKH 23

¹Leka Nai Daud in namnasi anae le'uf in naiti Nai Salomo anfani Kesel Israel.

²Kesel Nai Daud nabuab ale nakaf Israel sin, ale Ana' fuat knino ma atoni Lewi sin,

³oke te in anso'i ale atoni uf Lewi le uan ton bo'tenu nekin sae ok-oke atoni 38.000.

⁴Oke te atoni 24.000 anbi sin in anfe neu sin mepu he nati' sin anpao mepu anbi Ume UISNENO, atoni 6.000 anpao mepu tuis sulat ma nafek ale lasi,

⁵atoni 4.000 neu mepu apaot, ma atoni 4.000 anteni he naliatas UISNENO neki ale bale sit pules le naloitan nalali sin.

⁶Nai Daud anbeti atoni-atoni Lewi nane anbi pukan tenu natuin sin ume toko, esle' ume Nai Gerson, Nai Kehat ma Nai Merari.

⁷Nai Gerson anmu'i anmone nua: Nai Ladan ma Nai Simei.

⁸Nai Ladan anmu'i anmone nua: Nai Yehiel, Nai Zetam ma Nai Yoel.

⁹Sin le nane anfani nakaf neu Nai Ladan ume nanan. (Nai Simei anmone sin es Nai Selomit, Nai Haziel ma Nai Haran.)

¹⁰Nai Simei in anmone ha sin maakatuin natuin sin uan ma sin ton: Nai Yahat, Nai Ziza, Nai Yeus ma Nai Beria. Sanut mofut Nai Yeus ma Nai Beria ka namfau fa, es nane te nabuab sin ume mese.

¹²Nai Kehat anmu'i anmone ha: Nai Amram, Nai Yizhar, Nai Hebron ma Nai Uziel.

¹³Nai Amram nane Nai Musa ma Nai Harun sin amaf. (Nai Harun nok in ume nanan sin talan te nabal-bal anbeti nalali sin hen panat bale luli besa, notu atu fomeni neu UISNENO, antuthae UISNENO ma anfe tetus neu to anbi UISNENO In kanan.

¹⁴Nai Musa ate Uisneno nane in anmone sin antam neu uf Lewi.)

¹⁵Nai Musa anmu'i anmone nua, Nai Gersom ma Nai Eliezer.

¹⁶Le anfani nakaf neu Nai Gersom in anah sin Nai Sebuel.

¹⁷Nai Eliezer al in anmu'i anmone mese, kanan Nai Rehabya. Mes Nai Rehabya in anmu'i anah amfau le'uf.

¹⁸Nai Yizhar Nai Kehat anmoen nua nane, anmu'i anmone kanan Nai Selomit; in anfani nakaf ume nanan.

¹⁹Nai Hebron Nai Kehat anmoen tenu nane, anmu'i anmone ha: Nai Yeria le anfani mnasi, ma Nai Amarya, Nai Yahaziel ma Nai Yekameam.

²⁰Nai Uziel, Nai Kehat anmoen ha nane, anmu'i anmone nua: Nai Mikha le anfani mnasi ma Nai Yisia.

²¹Nai Merari anmu'i anmone nua Nai Mahli ma Nai Musi. Nai Mahli anmu'i anmone nua, esle' Nai Eleazar ma Nai Kis,

²²mes Nai Eleazar anmate kan mu'i fa anmone; al anfeto le anmamone nok sin naof bian sin, Nai Kis in anmone sin.

²³Nai Musi, Nai Merari anmoen nua nane, anmu'i anmone tenu: Nai Mahli, Nai Eder ma Nai Yeremot.

²⁴Nane kanaf-kanaf sanut mofut Nai Lewi le antui sin natuin kanaf ume nanan ma sin in-ini kun mese-mese. Sin uan ton bo'nua nekin sae ma sin napeni mepu anbi Ume UISNENO.

²⁵Nai Daud in nak, “UISNENO, Uisneno atoni Israel anfe nalali tainine neu In nonot, ma In kun natua anbi Yerusalem talan te nabal-bal.

²⁶Es nane te, Um-ume UISNENO ma ale bale le anpake sin neu lasi luli besa ka nabe'i fa atoni Lewi hen loi anteni.”

²⁷Natuin plenat amsoput na'ko Nai Daud, ale atoni Lewi, leka sin uan ton bo'nua, mes antui sin hen mepu.

²⁸Sin mes hen bab ale Ana' fuat knino sanut mofut Nai Harun leka nabalab lasi luli besa anbi Ume UISNENO, hen pao po'an ma ke'an-ke'an anbi Ume UISNENO nane, ma anpanat he nati' ale sa'-sa' le anbeti nateta nani neu UISNENO ka namle'u fa.

²⁹Sin amsa ansutai lasi i: utunu' le natulu neu Uisneno, ut le anpake he natulu neu UISNENO, kokis manihis le anmo'e kan pake fa lalu haef, fua tulu le anse'i, ma ut le anselo nok mina bub fua mina. Sin amsa mes antai ma ansu' ale fua tulu le neki neu Ume UISNENO.

³⁰Anesi na'ko nane te sin mes hen si sit he naliatas UISNENO anbi nok-noka ma anbi neno anmabe;

³¹onane amsa anbi ale tabu leka anmu'i fua tulu le amnotu neu UISNENO anbi neno Snasat, anbi Neno Naek Fun Fe'u, ma anbi neno naek bian anteni. Fun antom atoni Lewi sin amfaun le hen mepu neno-neno, anmo'e nalali in lekat lulut sin. Talan te nabal-bal atoni Lewi mes he nanaoba mepu nane.

³²Anfe neu sin amsa lasi sutais hen panat Um-ume UISNENO ma Ume UISNENO ma hen bab sin biaf sin, ale Ana' fuat knino sanut mofut Nai Harun, he naloitan ma nabalab luli besa anbi bale nane.