Read Uab Meto 1 TAWARIKH 24 Bible Online

1 TAWARIKH 24 - Uab Meto bible

1 TAWARIKH 24

¹Nai Harun anmu'i anmone ha: Nai Nadab, Nai Abihu, Nai Eleazar ma Nai Itamar. Nai Nadab ma Nai Abihu sin anmate nahun na'ko sin amaf ma sin kan mu'i fa anah. Es nane te Nai Eleazar ma Nai Itamar sin anfani Ana' fuat knino. Nai Daud anbati sanut mofut Nai Harun anbi pukan fauk-fauk natuin sin mepu. Anbi mepu pukan mese-mese nane Nai Zadok sanut mofut Nai Eleazar ma Nai Ahimelekh sanut mofut Nai Itamar sin anbab Nai Daud.

⁴Sanut mofut Nai Itamar anbati sin anfani pukan fanu, ma sanut moftut Nai Eleazar anbati sin anfani pukan bo'es am ne, natuin anbi sanut mofut Nai Eleazar anmone namfau anesi anfani nakaf ume nanan.

⁵Natuin anbi sanut mofut Nai Eleazar ma sanut mofut Nai Itamar anmu'i ameput-ameput Ume UISNENO ma nakaf-nakaf lasi knino, es nane te anbati mepu nanaob nok sin anhelan sulat.

⁶Sanut mofut Nai Eleazar ma sanut mofut Nai Itamar maakatuin ma anhelan sulat, oke te sin kanken lultunis Nai Semaya Nai Nataneel anmone atoni Lewi in es antui sin. Ale nane ok-oke anmo'e nani sin anbi kesel matan nok ale in ameput-ameput sin, Ana' Fuat Knino Nai Zadok, Nai Ahimelekh Nai Abyatar anmone ma nakaf-nakaf ume nanan na'ko Ana' fuat knino ma nakaf-nakaf ume nanan na'ko Nai Lewi.

⁷I kanaf le anmaakatuin neu mepu le sin napeni na'ko anhelan sulat neu pukan bo'nua am ha nane: 1. Nai Yoyarib — 13. Nai Hupa 2. Nai Yedaya — 14. Nai Yesebeab 3. Nai Harim — 15. Nai Bilga 4. Nai Seorim — 16. Nai Imer 5. Nai Malkia — 17. Nai Hezir 6. Nai Miyamin — 18. Nai Hapizes 7. Nai Hakos — 19. Nai Petahya 8. Nai Abia — 20. Nai Yehezkiel 9. Nai Yesua — 21. Nai Yakhin 10. Nai Sekhanya — 22. Nai Gamul 11. Nai Elyasib — 23. Nai Delaya 12. Nai Yakim — 24. Nai Maazya

¹⁹Kanaf atoni-atoni le antek sin nane antui sin natuin sin mepu hen tam neu Ume UISNENO ma nanaoba mepu luli besa le Nai Harun, sin amaf nane, natetab nalali anmatom nok plenat UISNENO, Uisneno atoni Israel.

²⁰Anesi na'ko nane anbi sanut mofut Nai Lewi sin antam nakaf-nakaf ume nanan on i: Nai Yehdeya, sanut mofut Nai Amram na'ko Nai Subael ume nanan; Nai Yisia, Nai Rehabya ume nanan, Nai Yahat, na'ko Nai Yizhar Nai Selomot ume nanan, Nai Yeria, Nai Amarya, Nai Yahaziel ma Nai Yekameam Nai Hebron in anah sin maakatuin natuin sin ton; Nai Samir, Nai Uziel ume nanan na'ko Nai Mikha ume nanan; Nai Zakharia, Nai Uziel ume nanan na'ko Nai Yisia Nai Mikha in biaf; Nai Mahli, Nai Musi ma Nai Yaazia, ume nanan Nai Merari.

²⁷Nai Yaazia anmu'i anmone tenu: Nai Syoham, Nai Zakur ma Nai Hibri.

²⁸Nai Mahli anmu'i anmone nua: Nai Eleazar ma Nai Kish. Nai Eleazar kan mu'i fa anmone, mes Nai Kish anmu'i anmone mese kanan Nai Yerahmeel.

³⁰Nai Musi anmu'i anmone tenu: Nai Mahli, Nai Eder ma Nai Yerimot. Nane uf Lewi in ume nanan sin.

³¹Leka tabu sin hen mepu, hae mese te nakaf ume nanan nok in olif anmone mese sin anhelan sulat onle sin biaf sin anmo'e, esle' Ana' fuat knino sanut mofut Nai Harun. Lasi hel sulat nane nanaoba anbi Kesel Nai Daud in matan nok Nai Zadok, Nai Ahimelekh ma ale nakaf ume nanan na'ko ale Ana' fuat knino sin na'ko atoni Lewi.