Read Uab Meto 1 TAWARIKH 25 Bible Online

1 TAWARIKH 25 - Uab Meto bible

1 TAWARIKH 25

¹Neu he na' ma antopu ale lasi luli besa Kesel Nai Daud ma ale nakaf atoni Lewi anbeti Nai Lewi in ume nanan sin on i: Nai Asaf, Nai Heman ma Nai Yedutun. Sin napeni mepu he natiaba a'an na'ko Uisneno neki biola hanan, a'heo hanan ma niti mahana hanan. Neu he na' ma antopu lasi luli besa nok ale in lekat lulut sin, anbeti ameput pukan-pukan on i:

²Nai Asaf in anmone ha sin: Nai Zakur, Nai Yusuf, Nai Netanya ma Nai Asarela. Sin nakaf es Nai Asaf, le natiaba a'an na'ko Uisneno, leka kesel anlenu in.

³Nai Yedutun in anmone ne sin: Nai Gedalya, Nai Zeri, Nai Yesaya, Nai Simei, Nai Hasabya ma Nai Matica. Sin amaf es ana' ma antopu sin, sin natiaba a'an na'ko Uisneno neki biola hanan, ma sin ansi sit pules ma onen totis neu UISNENO.

⁴Nai Heman in anmone bo'es am ha sin: Nai Bukia, Nai Matanya, Nai Uziel, Nai Sebuel, Nai Yerimot, Nai Hananya, Nai Hanani, Nai Eliata, Nai Gidalti, Nai Romamti-Ezer, Nai Yosbekasa, Nai Maloti, Nai Hotir ma Nai Mahaziot.

⁵Nai Heman nane kesel in Mafefa knino kun. UISNENO anfe neu Nai Heman anmone bo'es am ha ma anfeto tenu natuin UISNENO anmanba'an nalali hen fe neune toko amnanut.

⁶Nai Heman in anah sin ok-oke nane sin na'bae niti mahana, biola ma a'heo fun sin amaf es anfani nakaf neu sin he natuin lasi luli besa anbi Ume UISNENO. Nai Asa, Nai Yedutun ma Nai Heman sin napeni mepu anmatom nok lekat na'ko kesel.

⁷Sin anmone sin bo'nua am ha ma sin biaf benuf sin nane sin nahin sit lek-leko. Sin ok-oke atoni 288.

⁸Fun he natetab sin tabu mepu, sin al-al sin anhelan sulat — he munif ma mnasi nok, he ameput ahinet ai le fe nanoina hen mepu.

⁹Atoni 288 nane anbati sin anbi pukan 24 natuin sin ume nanan mese-mese. Pukan mese te atoni 12 ma mese anfani nakaf neu sin. Sin kanken anmaakatuin natuin anhelan sulat: 1. Nai Yusuf na'ko Nai Asaf ume nanan — 13. Nai Subael 2. Nai Gedalya — 14. Nai Matica 3. Nai Zakur — 15. Nai Yeremot 4. Nai Yizri — 16. Nai Hananya 5. Nai Netanya — 17. Nai Yosbekasa 6. Nai Bukia — 18. Nai Hanani 7. Nai Yesarela — 19. Nai Maloti 8. Nai Yesaya — 20. Nai Eliata 9. Nai Matanya — 21. Nai Hotir 10. Nai Simei — 22. Nai Gidalti 11. Nai Azareel — 23. Nai Mahaziot 12. Nai Hasabya — 24. Nai Romamti-Ezer