Read Uab Meto 1 TAWARIKH 26 Bible Online

1 TAWARIKH 26 - Uab Meto bible

1 TAWARIKH 26

¹I bati mepu neu atoni-atoni Lewi apanat ma apaot Ume UISNENO. Na'ko Nai Korah ume nanan anlek Nai Meselemya Nai Kore anmone na'ko Nai Ebyasaf ume nanan.

²In anmu'i anmone 7 le antui sin anmaakatuin natuin sin ton: Nai Zakharia, Nai Yediael, Nai Zebaja, Nai Yatniel,

³Nai Elam, Nai Yohanan, Nai Elyoenai.

⁴Oke te anlek Nai Obed-Edom. Uisneno anfe tetus neu in ma in napeni anmone 8 le antui sin maakatuin natuin sin ton: Nai Semaya, Nai Yozabad, Nai Yoah, Nai Sakhar, Nai Netaneel,

⁵Nai Amiel, Nai Isakhar ma Nai Peuletai.

⁶Nai Semaya Nai Obed-Edom anmone anaet in anmu'i anmone 6: Nai Otni, Nai Refael, Nai Obed, Nai Elzabad, Nai Elihu ma Nai Semakhya; sin al-al sin atoni kan mateka anbi sin ume nanan natuin sin nabe'i ma anmatani, nes-nesi Nai Elihu ma Nai Semakhya.

⁸Neu mepu panat ma paot nane Nai Obed-Edom ume nanan anfe atoni 62 le abe'it ma matani kun.

⁹Nai Meselemya anfe na'ko in ume nanan atoni 18 abe'it ma matani kun.

¹⁰Na'ko ume nanan Nai Merari anlek Nai Hosa. In anmu'i anmone ha: Nai Simri (in ka anmone anaet fa, mes in amaf naiti in anfani nakaf),

¹¹Nai Hilkia, Nai Tebalya ma Nai Zakharia. Nai Hosa in ume nanan sin ok-oke 13 es anfani apanat ma apaot Ume UISNENO.

¹²Ale apanat ma apaot Ume UISNENO nane anbati sin pukan-pukan natuin sin ume nanan. Anfe neu sin amsa mepu-mepu bian anbi Ume UISNENO on atoni Lewi bian sin.

¹³Ume mese-mese he naek ai he na'bau, anhelan sulat he nahin anbi eno naek me es mes sin hen mepu.

¹⁴Nai Selemya napeni eno naek aonbian neno saen. Nai Zakharia in anmone, le anfe fainekat alekot piut, napeni eno naek aonbian neno a'li.

¹⁵Nai Obed-Edom napeni eno naek aonbian neno a'ne'u ma in anah sin napeni mepu anpanat ma anpao ume-ume maus.

¹⁶Nai Supim ma Nai Hosa sin napeni eno naek aonbian neno tesan ma eno naek aonbian Syalekhet le anbi lal saet. Mepu panat ma paot anlek nani nok alekot talan te apanat ma apaot sin anpanat ma anpao piut anbi eno naek.

¹⁷Fun neno-neno te anmu'i apanat ma apaot atoni 6 anbi aonbian neno saen, anbi aonbian neno a'li apanat ma apaot atoni 4 ma anbi aonbian neno a'ne'u apanat ma apaot atoni 4. Ume-ume maus amsa atoni 4 anpanat ma anpao sin: atoni 2 anpanat ma anpao ume maus mese.

¹⁸Anbi ume ana' aonbian neno a'li antao apanat ma apaot atoni 4 anbi lanan ma anbi ume ana' nane antao apanat ma apaot atoni 2 neune.

¹⁹Onle nane anbati mepu panat ma paot neu Nai Korah in ume nanan sin ma Nai Merari in ume nanan sin.

²⁰Atoni-atoni bian anbi uf Nai Lewi anfe neu sin sutais neu maus Ume UISNENO ma neu ume maus bale bela he nabela ale fua tulu neu Uisneno.

²¹Nai Ladan nane Nai Gerson in anmone mese; in neki atoni pukan fauk-fauk, Nai Yehiel anmone in ume nanan.

²²Nai Yehiel in anmone sin, Nai Zetam ma Nai Yoel, anfe neu sin sutais hen panat ma anpao ume-ume maus ma noni Ume UISNENO.

²³Sanut mofut Nai Amram, Nai Yizhar, Nai Hebron ma Nai Uziel amsa anbati neu sin mepu.

²⁴Nai Sebuel na'ko ume Nai Gersom, Nai Musa anmone, anpanat ma anpao ale maus Ume UISNENO.

²⁵In anmu'i malutas ume nanan nok Nai Selomit nanete natuin Nai Eliezer Nai Gersom in biaf. Sanut mofut Nai Eliezer talan te Nai Selomit nane on i: Nai Eliezer, Nai Rehabya, Nai Yesaya, Nai Yoram, Nai Zikhri, Nai Selomit.

²⁶Nai Selomit ma in biaf benuf sin ansutai neu ale tnatas le Kesel Nai Daud natulu, ale nakaf ume nanan, ma nakaf-nakaf nonot, ma ale solalus nakaf amnanut le sin natulu nani.

²⁷Ale tnatas nane bian na'ko bale' le nasik nan sin anbi makenat ma le sin natulu hen pake al anbi Ume UISNENO.

²⁸Fun nane nok lasi pala' te, Nai Selomit nok in ume nanan sin ansutai neu ale sa'-sa' le nana'at nalali sin hen pake al anbi Ume UISNENO, fun nane fua tulu le Kesel Nai Saul, Nai Abner Nai Ner anmone, ma Nai Yoab Nai Zeruya anmone, nana'at nalali sin neu Mafefa Knino Nai Samuel.

²⁹Sanut mofut Nai Yizhar, es Nai Kenanya ma in anah sin, nana'at neu sin mepu tuis sulat pah nanan ma nafek lasi anbi Israel.

³⁰Ale mepu lasi knino ma mepu lasi plenat anbi Israel aonbian neno tesan Noe Yordan nana'at neu Nai Hasabya, ma neu in biaf sin anah-anah sin atoni 1.700; sin al-al sin atoni atomatas sanut mofut Nai Hebron.

³¹Nakaf sanut mofut Nai Hebron es Nai Yeria. Anbi ton bo'ha Kesel Nai Daud in ana' aplenat antae ma anpe'o sanut mofut na'ko Nai Hebron. Ma napeni anbi sin ale solalus abe'it ma matani le sin natua anbi Yazer anbi pah Gilead.

³²Ale mepu lasi knino ma plenat anbi Israel aonbian neno saen Noe Yordan — pah uf Nai Ruben, Nai Gad ma uf Manasye bian — nana'at neu atoni 2.700 nakaf ume nanan Nai Yeria, sin al-al sin atomatas le Kesel Nai Daud anbeti nani sin.