Read Uab Meto 1 TAWARIKH 28 Bible Online

1 TAWARIKH 28 - Uab Meto bible

1 TAWARIKH 28

¹Kesel Nai Daud anfe plenat he nati' ale nakaf Israel nabua anbi Yerusalem. Es nane te ale nakaf uf sin, ale anaet ana' aplenat, ale nakaf nonot sin, ale apaot a'maus ma kesel in mu'it sin fun ale kesel in anmone sin — fun ale anaet sonaf nanan, ale solalus nakaf ma atoni atomatas sin, al-al sin nabua anbi Yerusalem.

²Nai Daud anhake anbi sin matken ma nak, “Au bia ki al-al ki pah ma uf mese, amnen nai! Au utenab ulali a'lo le'uf he uhakeb ume amasat mese neu Peti Fef Bela, UISNENO hit Uisneno In haen benan anteli anbine. Au uloitan ulali he uhakeb ume mese bale luli besa neu In.

³Mes UISNENO nakain kau he mo'e lasi nane natuin au solalus kau le au uopan na' anae le'uf.

⁴UISNENO, Uisneno le Israel naluli ma nabes neune, anbeti nalali kau ma au sanut mofut he uplenat Israel talan te nabal-bal. Neu he nati' In naloitan kesel mese In anbeti uf Yehuda, ma na'ko uf nane In anbeti au ama ume nanan. Ma na'ko au ama ume nanan In anlomi ma anbeti ma naiti kau fani kesel neu Israel ok-oke.

⁵In anfe neu kau anah namfau ma na'ko ale au anah sin nane In anbeti Nai Salomo he naplenat Israel, UISNENO In aplenat.

⁶UISNENO nakua a'an neu kau nak on i, ‘Nai Salomo ho anmone es of nahakeb ume nane neu Kau. Au beti ulali in anfani Au anah, ma Au fani in amaf.

⁷Kalu in nok namneo-namneo natuin Au a'ak piut ma Au plenat sin onle in anmo'e tabu i, of Au umepan in aplenat talan te nabal-bal.”

⁸Oke te Nai Daud in namolok anteni nak, “Es nane te, hoi au to amfen nai anbi tabu le i, anbi hit Uisneno In human In matan ma anbi buat Israel ok-oke sin human, nonot UISNENO i, au toti ki nok namneo-namneo mituin ale plenat UISNENO hit Uisneno. Nok nane te hi of nabe'i ampal pah alekot i piut ma amfe mani neu hi sufam talan te nabal-bal.”

⁹Oke te Nai Daud nak neu Nai Salomo nak, “Au anmone, so nati' Uisneno le ho ama naluli ma nabes neune, ho muteb neune on ho Uisneno. Ho mes ma atenom meu In nok ho nekam amneot ma ho nekam oke. Natuin In nahin ale hit tenab ma ale hit nek salit. Kalu ho mami In, of ho mupeni In, mes kalu ho musaitan In, In of nasaitan ko talan te nabal-bal.

¹⁰Mumnau lek-leko nak UISNENO anbeti nalali ko he muhakeb ume le alekot kun neu In. Nah, amepu nai esle' i nok nek lomit le matani kun.”

¹¹Oke te Nai Daud nana'at neu Nai Salomo lulat Ume UISNENO, ma ale ume maus, ale in ke'an sin, ma Ke'an Knino le'uf, bale sako sanat.

¹²Nai Daud amsa nana'at ale lulat le in natenab nalali neu ume po'an nok in ke'an sin anfun natef, ma neu ume-ume maus Ume UISNENO nane ma ume-ume maus bale he nabela ale atnatas neu UISNENO.

¹³Onane amsa in nana'at lekat lulut antom pukan Ana' fuat knino ma atoni Lewi, neu mepu-mepu le mes sin hen mepu, nane sin mepu anbi Ume UISNENO ma hen panat ale bale luli besa.

¹⁴In anfe lekat lulut neu mepu hen mepu mnatu ma noni muti neu hen mo'e ale bale',

¹⁵neu paku mese-mese ma paku haen,

¹⁶neu ale mei na'ko noni muti, ma neu mei mnatu mese-mese bale utunu' he nabalab neu Uisneno.

¹⁷Onane amsa lekat lulut antom mnatu nesaf in amfaun le mes hen pake hen mo'e kato', a'mako ma botil, ma antom noni muti ma mnatu in amfaun hen moe ale a'pika,

¹⁸antom mnatu nesaf in amfaun neu hen mo'e baki tulu bale mnotu atu fomeni ma hen mo'e aklet in human ahake neno tunan sin le sin kub UISNENO In Peti Fef Bela.

¹⁹Oke te Kesel Nai Daud nak, “Ale nane ok-oke matui anbi sulat mese le au tui ulali anmatom nok lekat lulut le UISNENO anfe nani neu kau he nati' tanaoba tani.”

²⁰Nalali te Kesel Nai Daud namolok anteni neu Nai Salomo in anmone nak, “Ho mes he muteb ma amhataniom nai. Mepu nai mepu nane ma kais mumtau neu sa' es amsa. UISNENO le au ululi ma ubes neune of anbab ko. In mes ka nasaitan ko fa. In mes nok ko talan te mepu nane in namsopu.

²¹Anbati mepu luli besa anbi Ume UISNENO natetab nalali sin neu ale Ana' fuat knino ma atoni Lewi. Ameput-ameput mahine anbi mepu mese-mese of anbab ko nok nek malinat, ma ale anakaf nok ale to ok-oke of natuin ho plenat.”