Read Uab Meto 1 TAWARIKH 29 Bible Online

1 TAWARIKH 29 - Uab Meto bible

1 TAWARIKH 29

¹Oke te Kesel Nai Daud nak neu ale to le sin nabua anbi nane nak, “Na'ko ale au anmone sin, Uisneno es anbeti Nai Salomo. Mes in fe munif ma in mahinen fe kan menua fa leko, mes mepu nane anae le'uf kun. Anesi na'ko nane te ume le he nahakeb nane ka sonaf fa neu atoni pah pinan, mes Ume neu UISNENO.

²Au nibun ubuab ale sa' natuin au be'ik neu ume nane nok in bale' sin. Au uloitan ulali mnatu, noni muti, niti molo, besi, hau, ale fatu maupa, ma ale fatu me', ale fatu huma-huma namfau neu pake noas ma fatu muti klima amfau le'uf.

³Mes natuin au nek lomit neu au Uisneno In Ume nane au una'at ulali amsa noni muti ma mnatu na'ko au mu'ik:

⁴mnatu alekot ton 100 ma anesi, ma noni muti nesaf oni ton 240 he nati' anlape klipit Ume UISNENO, ma neu ale bale' le mes atoni ahinet sin anmepu. Nah, sekau anteni anbi neno i anlomi hen fe in a'tulu neu UISNENO nok nek amalinat?”

⁶Fun ale nakaf ume nanan, ale nakaf uf, ale solalus nakaf ma ale asutais neu kesel in a mu'in sin naton nak sin anlomi he sin anfe amsa.

⁷Oke te sin anfe ale i neu he nafena Ume UISNENO nane: mnatu ton 170 manesi, noni muti ton 340 manesi, niti molo ale kle'ot ton 620, ma besi ton 3.400 manesi.

⁸Ma atoni-atoni le anmu'i fatu me' sin anfe nani neu Nai Yehiel he natam sin neu kas Ume UISNENO. (Nai Yehiel nane atoni Lewi na'ko nonot Nai Gerson.)

⁹To anfe nok nek lomit kun neu UISNENO ma sin anmalin natuin sin anfe nalali amfaunen. Kesel Nai Daud amsa anmalin anae le'uf.

¹⁰Oke te Kesel Nai Daud anpules naliatas UISNENO anbi to ok-oke sin matan nak, “Koi UISNENO le Nai Yakub hai amaf naluli ma nabes neune, so nati' nanaeb Ko talan te nabal-bal!

¹¹Namneo-namneo Ho anaet Ko. Ho ahinet Ko, akuasat Ko ma amnanut Ko. Ale sa' abit neno tunan ma pah pinan Ho ini kun. Ho kesel makana ko, akuasat neu ale sa'.

¹²Ale mu'if ma alekot nem na'ko hai Usi ko; ma Ho muplenat ale sa'-sa' nok Ho be'im Ho matanim ma Ho tetus; Ho mu'i kuasat he mo'e sekau ma sekau hen fani anaet ma abe'it.

¹³Es nane te tomas i, hai miliatas Ko, koi hai Uisneno, ma hai minaeb Ho kanam amnanut.

¹⁴Au ma to sin le namneo-namneo ka nabe'i fa hai hem fe sa'-sa' neu Ko, natuin ale nane ok-oke Ho es amfe ma sa' le hai amfe le i nane Ho ini kun amsa.

¹⁵Koi UISNENO, Ho muhin, fun on hai amaf sin, hai amsa anbi hai monim i on anao amnemat ma on atoni le nem na'ko pah bian. Hai monim onle mafon le anfini ma ankono, ma hai ka nabe'i mifetinom fa na'ko lasi maten.

¹⁶Koi UISNENO, hai Uisneno, ale bale' maupa i hai mibuab sin anbi i neu he mihakeb ume mese neu Ko he nati' nabe'i hai miliatas Ho kanam aknino. Mes ale nane ok-oke haim simo na'ko hai Usi ko ma nane Ho ini kun.

¹⁷Au uhin Hom su' mese-mese in nekan ma Hom lomi atoni nek aknino. Nok nek amneot ma nek amalinat au utulu ale i ok-oke neu Ko. Au saksi ulali neu Ho nonot le nabua anbi i neki sin a tulu neu Ko nok nekaf amalinat.

¹⁸Koi UISNENO, le hai amaf sin, Nai Abraham, Nai Ishak ma Nai Yakub naluli ma nabes neune, so nati' Hom panat Ho nonot he nati' Ho nonot sin nek namnau Ko piut onle anbi tabu i ma ambab Ho nonot sin he nati' sin na'ki neu Ko talan te nabal-bal.

¹⁹Amfe nai neu Nai Salomo, au anmone, lasi sinmakat namneo-namneo he natuin ale Ho plenat ma he nati' nahakeb ume luli besa nane le au unaoba ulali in loitan balab sin.”

²⁰Leka in onen toti nalali onane te, Nai Daud nak neu to ok-oke le sin nabua anbi nane nak, “Miliatas UISNENO hi Uisneno nai!” Fun to ok-oke anpules ma naliatas UISNENO, Uisneno le sin amaf sin naluli ma nabes neune. Oke te sin anli'tu ma nabes neu UISNENO ma kesel.

²¹Fun neno noka fa sin anlolo mu'it he natulu on fua tulu neu UISNENO, oke te anbati neu to ok-oke. Anesi na'ko nane te sin anlolo ma antunu mu'it anbi baki tulu nane bijae keso 1.000, bibi kase 1.000 ma bibi keso tipu 1.000 sin amsa natulu tua mina mtasa le natetab nani neu tulu tnatas nane.

²²Neno nane sin anbukae ma ninu nok amlilat anbi UISNENO In human ma In matan. Oke te i hae nua le sin naiti ma namepan anteni Nai Salomo anfani kesel. Anbi UISNENO In kanan, in namepan sin anfani sin kesel ma Nai Zadok anfani Ana' fuat knino.

²³Fun on aseka le anseka in amaf Nai Daud, Nai Salomo antunon anbi toko plenat le UISNENO anlek nani. In kesel le nis ma anbe'u kun ma to Israel ok-oke namtausan in.

²⁴Ale ana' aplenat ma ana' aikan talan te Nai Daud in anmone bian sin amsa ansimo ma nataim Nai Salomo in aplenat on kesel.

²⁵UISNENO anmo'e to ok-oke namtausan Kesel Nai Salomo ma anmo'e in anfani kesel le matain le'uf kun na'ko kesel ma amsa le afi naplenat Israel.

²⁶Nai Daud Nai Isai anmone naplenat Israel ok-oke

²⁷ton bo'ha. Anbi Hebron in naplenat ton 7 ma anbi Yerusalem in naplenat ton 33 in a'lon.

²⁸In namsen nok a mu'if ma kan apinat ma nasaebon anbi uan amnaun le'uf. In anmone Nai Samolo anfani kesel anseka in.

²⁹Kesel Nai Daud in a monin na'ko neno ahunut talan te in a monin namsopu fun antui nalali sin anbi Mafefa Knino Nai Samuel in sulat, Mafefa Knino Nai Natan in sulat ma Mafefa Knino Nai Gad in sulat.

³⁰Anbi sulat nane naton neu in aplenat, in kuasat, neu Israel ma pah-pah bian anfun natef Israel.