Read Uab Meto 1 TAWARIKH 5 Bible Online

1 TAWARIKH 5 - Uab Meto bible

1 TAWARIKH 5

¹Nai Ruben es anmone anaet na'ko Nai Yakub. Mes natuin Nai Ruben nale'un in amaf hala tupa nok in amaf fenai kliko mese, onane te in kanan anaet nane natnanib nani ma anfe nani neu Nai Yusuf. Maski onane amsa abe'it anbi sanut mofut Nai Yakub nane ka uf Nai Yusuf fa mes uf Yehuda. Fun nesi na'ko nane te ahun-hunut le anfani kesel neu nonot Israel ok-oke nane na'ko uf Yehuda amsa.

³Nai Ruben Nai Yakub anmone anaet anmu'i anmone ha: Nai Henokh, Nai Palu, Nai Hezron ma Nai Karmi.

⁴I Sanut mofut na'ko Nai Yoel: Nai Semaya, Nai Gog, Nai Simei, Nai Mikha, Nai Reaya, Nai Baal ma Nai Beera. Nai Beera nane nakaf uf Nai Ruben leka Nai Tiglat-Pileser kesel Asyur anheke in, ma neki neu bale polin.

⁷Anbi sanut mofut antui amsa nakaf-nakaf uf anbi uf Nai Ruben: Nai Yeiel, Nai Zakharia,

⁸ma Nai Bela Nai Azas anmone, Nai Sema upuf na'ko Nai Yoel. Uf Nai Ruben sin natua anbi Aroer ma anbi pah le anfatnon na'ko Aroer anao neu aon bian a'li talantia Nebo ma Baal-Meon.

⁹Sin anmu'i mu'it namfau anae le'uf anbi pah Gilead. Es nane te, sin natua pah aon neno saen talantia mnela snaen le in meunuan a'lon namnes nok Noe Efrat.

¹⁰Anbi batan Kesel Nai Saul, uf Ruben sin anmaken ma nis atoni Hagri anbi aon neno saen Gilead, oke te sin antoko pah nane.

¹¹Anbi neno aon bian a'li uf Nai Ruben in pah uf Nai Gad sin natua anbi pah Basan talantia Salkha anbi aon neno saen.

¹²Na'ko uf Nai Gad nane Nai Yoel nane amaf atomatas kun, ma Nai Safam nane amaf le natuin in. Nai Yaenai ma Nai Safat nane amaf neu uf-uf bian anbi Basan.

¹³Atoni bian anbi uf Nai Gad nane uf hitu anmaakatuin on i: Nai Mikhael, Nai Mesulam, Nai Syeba, Nai Yorai, Nai Yakan, Nai Ziya ma Nai Eber.

¹⁴Sin sanut mofut Nai Abihail Nai Huri anmone. Sin sanut mofut na'ko pinan ansae neu fafon nane on i: Nai Abihail, Nai Huri, Nai Yaroah, Nai Gilead, Nai Mikhael, Nai Yesisai, Nai Yahdo, Nai Bus.

¹⁵Nakaf neu sin es Nai Ahi Nai Abdiel anmone, Nai Guni upuf.

¹⁶Sin natua anbi pah Basan ma Gilead, ma kot-kot anbi pah nane ma ale mnela hun alekot anbi Saron.

¹⁷Sin likin ma sin pe'an i anmo'e nani anbi batan Nai Yotam Kesel Yehuda, ma Nai Yerobeam Kesel Israel.

¹⁸Anbi uf Nai Ruben, Nai Gad ma uf Manasye le anbi aon neno saen Yordan anmu'i solalus 44.760 le nanoina sin ma anpake nahin ben besi tika, suni ma aklaot.

¹⁹Sin anmaken ma anlaban uf Yetur, Nafis, ma Nodab, nane uf-uf anbi atoni Hagri.

²⁰Ale solalus nane sin nateb neu Uisneno ma antoti he nati' In anbab sin, ma Uisneno ansimo sin onen totis ma anfe neu sin lasi mnisat talantia sin nis atoni-atoni Hagri nane nok in atuntakus sin.

²¹Fun makenat nane anbol natuin Uisneno In lomin, onane te sin namate musu amfaun. Sin amsa anheke nan atoni 100.000, ma nasik nan bikase paha snaen 50.000, bibi kase 250.000 ma bikase luke mnanu 2.000. Oke te sin nabalah anbi pah nane talantia batan anheke to Israel ma neki sin neu bale polin.

²³Uf Manasye bian sin natua anbi pah Basan talantia aon bian a'li Baal-Hermon, Senir ma Tubu Hermon. Fun sin namfau.

²⁴Sin nakaf sin esle' i: Nai Hefer, Nai Yisei, Nai Eliel, Nai Azriel, Nai Yeremia, Nai Hodawya ma Nai Yahdiel. Sin le nane ok-oke solalus-solalus abe'it ma matani.

²⁵Atoni Israel sin ka na'ki fa neu Uisneno le sin amfenu naluli ma nabes neune. Sin nasaitan In ma naluli ma nabes neu ale uisneno teta uf-uf le Uisneno anli'u sin na'ko Kanaan.

²⁶Es nane te Uisneno nafena Nai Pul kesel Asyur nekan, ma in anao ma nape' pah nane. Nai Pul amsa nahin in amsa on Nai Tiglat-Pileser. Oke te uf Nai Ruben, Nai Gad ma Nai Manasye le sin anbi aon neno saen Yordan naiti sin on atoni le anheke sin oke te anpolin sin neu Halah, Habor, Hara ma neu bale mese anteni anhaumak Noe Gozan. Anbi nane sin natua ma nabalah talantia neno i.