Read Uab Meto 2 TAWARIKH 10 Bible Online

2 TAWARIKH 10 - Uab Meto bible

2 TAWARIKH 10

¹Nai Rehabeam in anao neu Sikhem natuin to Israel to ok-oke na'ko aon bian a'li sin nabua anbi nane he naiti in hen fani kesel.

²Anbi tabu nane Nai Yerobeam Nai Nebat anmone in fe anbi Mesir natuin in naen na'ko Kesel Nai Salomo. Leka in nen antom Nai Rehabeam, in anfani neu Israel.

³Fun to anbi aon bian a'li sin anhone Nai Yerobeam, oke te sin nok in anao neu Nai Rehabeam. Ma sin nak,

⁴“Ho ama Nai Salomo anfe neu kai baut mafen le'uf. Kalu Usi hom ha'kaf kai baut mafena nane ma musanut hai nukat, hai of mibes meu ko Usi.”

⁵Nai Rehabeam natae nak, “Au mes utenab fe. Neno tenu namuni te him fain aim amteni.” Fun to nane sin anao anfani.

⁶Oke te Nai Rehabeam natoti fainekat na'ko mnasi-mnasi sin le afi sin anfani afainekat neu Nai Rehabeam in amaf Nai Salomo. Nai Rehabeam natoti sin nak, “Mes au he utae sin onme ka? Ma hi fainekat nane onme ka?”

⁷Sin natae nak, “Leka Usi hom lomi he mo'e lasi alekot neu to, ma amhalin sin nekan mutae sin nok alekot, onane te na aet nok neu Usi ko talantia nabal-bal.”

⁸Mes mnasi-mnasi sin fainekat nane Nai Rehabeam in kan sian nani fa. Mes, in anao neu atoni munif sin le batan nok in ma le fe anbab in.

⁹In natoti sin nak, “Him fainek kau onme he au utae to le natoti he nati' au ha'kaf sin baut mafena nane?”

¹⁰Sin natae nak, “So nati' ho mutae sin mak on i, ‘Maski au ole ma limae, mes au fe ube'i anesi na'ko au ama.

¹¹Au ama anfe neu ki baut mafena, mes au of a'fe teni baut mafena neu ki. Au ama anbeso ki neki ue, mes of au beso ki eki ue besi maskunat!’ ”

¹²Neno tenu namuni te Nai Yerobeam nok ale to nane sin anfani neman neu Kesel Nai Rehabeam, onle afi in naplenat neu sin.

¹³Ka onfa mnasi-mnasi sin fainekat, fun to le nem neu sin nane in na'uab neu sin neki han mafena.

¹⁴Anmatom nok fainekat atoni-atoni munif sin, in nak, “Au ama anfe neu ki baut mafena, mes au of anmo'e baut mafena nane mafen le'uf anteni. In anbeso ki neki ue, mes of au beso ki eki ue besi maskunat!”

¹⁵To sin han totis in kan sian nani fa. Mes lasi nane namneo UISNENO In lomin kun. Sa' le afi UISNENO nakua In a'an nanete natuin Mafefa Knino Nai Ahia na'ko Silo antom Nai Yerobeam Nai Nebat anmone mes anbol.

¹⁶Leka to Israel sin nit nak kesel kan lomi fa he nen sin, sin ankoa nak, “Amlae mok Nai Daud ma in sufan sin! Sin kan mo'e fa sa'-sa' alekot neu kit. Hoi to Israel aim he hit anfani nai! Maut he Nai Rehabeam nane naplenat kun in aon anmes!” To Israel sin anao anfani kun,

¹⁷ma Nai Rehabeam anfani kesel al neu pah Yehuda.

¹⁸Maski onane amsa Kesel Nai Rehabeam in fe anlelu Nai Adoniram, atoni nakaf mese neu mepu maseke, he nati' in anfe tainine neu to. Mes sin anpoli in neki fatu talantia in anmate. Nai Rehabeam in naen nafetinon ma nok lab-lab ansae neu in aklet ma in naen neu Yerusalem.

¹⁹Na'ko nane to Israel anbi aon bian a'li anlaban piut kesel sanut mofut Nai Daud.