Read Uab Meto 2 TAWARIKH 11 Bible Online

2 TAWARIKH 11 - Uab Meto bible

2 TAWARIKH 11

¹Leka Kesel Nai Rehabeam in nem antia Yerusalem, in nabuab in solalus 180.000 le alekot anesit na'ko uf Yehuda ma uf Benyamin hen maken nok atoni Israel ma he naleko in aplenat neu uf-uf anbi Israel aon bian a'li.

²Mes UISNENO anlenu Mafefa Knino Nai Semaya

³natiaba UISNENO In a'an neu Nai Rehabeam ma neu to ok-oke anbi uf Yehuda ma Benyamin nak,

⁴“Kais haim ken hi biafen atoni Israel! Amfani nai! Sa' le anbol nalali nane Au lomik.” Fun sin al-al sin natuin plenat UISNENO ma sin ka nao fa hen ken Nai Yerobeam.

⁵Nai Rehabeam natua anbi Yerusalem ma anlelu atoni ma nahakeb baki lape neu kot-kot anbi pah Yehuda ma Benyamin, esle':

⁶kot Betlehem, Etam, Tekoa,

⁷Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon ma Hebron.

¹¹In nahelan kot-kot mabaki lape nane ma antao solalus nakaf mese anbi kot nane mese-mese. Kot nane mese-mese in naloitan nani neki bukae, mina bub fua mina ma tua mina mtasa,

¹²ma ben besi tika ma auni. Nok nane te pah Yehuda ma Benyamin nabal anbi in aplenat.

¹³Ana' fuat knino-ana' fuat knino ma atoni Lewi na'ko pah Israel ok-oke sin anao ma nabua nok Nai Rehabeam.

¹⁴Atoni-atoni Lewi nane sin nasaitan sin mnela hun ma sin afu ma sin natnani neu Yehuda ma Yerusalem, natuin Nai Yerobeam ma ale kesel le anseka in kan fe fa sin hen mepu on Ana' fuat knino UISNENO.

¹⁵Nai Yerobeam in naiti kun in ana' fuat neu in aon kun hen tuthae anbi bale-bale fuat neu hau le'u ma fatu le'u ma he naluli nabes neu ale nitu ma bijae le'u mahuma le in anmo'e anmese kun.

¹⁶Fun al sin le na'ko ale uf Israel le namneo-namneo anlomi he naluli ma nabes neu UISNENO, atoni Israel sin Uisneno, sin natnani neu Yerusalem, sin natuin atoni Lewi sin he nati' nabe'i sin natulu fua tulu neu UISNENO, le sin amaf sin nausi neune.

¹⁷Nok nane te plenat pah Yehuda in anmatani anesi kun. Ton tenu sin antuntaku Nai Rehabeam Nai Salomo anmone in aplenat nane, ma anmoni onle batan plenat Kesel Nai Daud ma Kesel Nai Salomo.

¹⁸Nai Rehabeam anmafe nok bi Mahalat; bi Mahalat amaf es Nai Yerimot Nai Daud anmone ma in ainaf es bi Abihail Nai Eliab anfeto, Nai Isai upuf.

¹⁹Sin anmu'i anmone tenu: Nai Yeus, Nai Semarya ma Nai Zaham.

²⁰Nalali te Nai Rehabeam anmafe anteni nok bi Maakha Nai Absalom anfeto. Sin napeni anmone ha: Nai Abia, Nai Atai, Nai Ziza ma Nai Selomit.

²¹Nai Rehabeam in fenai 18 ma in fenai kliko 60, anmone 28 ma anfeto 60. Na'ko ale in fenai ma in fenai kliko nane, le in anek nisan esle' bi Maakha.

²²Es nane te Nai Abia bi Maakha anmone in anlomi nesi neune na'ko ale in anah bian sin, talantia in anbeti Nai Abia amsa hen seka in anfani kesel.

²³Nok nek mahine Nai Rehabeam anfe mepu neu in anmone sin ma antao sin anbi kot-kot mabaki lape anbi pah Yehuda ma Benyamin. In anfe neu sin bukae nathoe anfin-fini, ma in naloitan bifel namfau neu sin on sin fenai.