Read Uab Meto 2 TAWARIKH 13 Bible Online

2 TAWARIKH 13 - Uab Meto bible

2 TAWARIKH 13

¹Anbi ton bo'es amfanu Kesel Nai Yerobeam in ana' aplenat anbi Israel, Nai Abia anfani Kesel Yehuda,

²ma naplenat ton tenu anbi Yerusalem. In ainaf bi Mikhaya Nai Uriel na'ko kot Gibea anfeto. Nalali te makenat anbol anbi Nai Abia ma Nai Yerobeam.

³Nai Abia in neki solalus 400.000, ma Nai Yerobeam in neki solalus 800.000.

⁴Solalus pukan nua en nane anhake anmabaina neun anbi neten Efraim. Nai Abia ansae neu Tubu Zemaraim tunan ma ankoa neu Nai Yerobeam ma atoni Israel, nak, “Amnen nai!

⁵Hi mihin milali nak UISNENO, atoni Israel sin Uisneno, In anfutun nalali lasi manba'an nok Nai Daud nak in ma in sanut mofut sin of naplenat Israel talantia nabal-bal. Fun lasi manba'an nane ka nabe'i fa he nale'un.

⁶Maski onane amsa, Nai Yerobeam Nai Nebat anmone anlaban Nai Salomo, in kesel.

⁷In nabuab atoni ka asian noina pukan mese ma sin neki sin a lomin ma naseke Nai Rehabeam Nai Salomo anmone le anbi tabu nane in fe munif ma fe ka nahin fa leko neu hen malaban.

⁸Neno i hi mitenab mak nabe'i him laban kuasat le UISNENO anfe nalali neu Nai Daud in sufan sin natuin hi solalus amfau le'uf ma hi mu'i ale bijae mnatu le'u mahuma le Nai Yerobeam anmo'e sin anfani hi uisneno teta.

⁹Ai hi kam li'u fa ale Ana' fuat knino UISNENO Nai Harun sufan sin ma atoni-atoni Lewi sin ok-oke hi kam li'u milali fa sin ka? Ma him seka sin meki sekau le in anlomi hen fani Ana' fuat knino, so al in neki bijae mese ai bibi kase hitu hi maiti sin anfani Ana' fuat knino ka neu fa Uisneno, natuin onle nane uf-uf bian sin naiti sin Ana' fuat knino. Mes hai ka mo'e fa onane.

¹⁰Haim atenom piut neu UISNENO ma hai ka misaitan fa In. Hi Ana' fuat knino sin le nane Nai Harun in sufan sin nabalah, ma atoni-atoni Lewi sin anbab sin piut.

¹¹Fun nok-noka ma neno anmabe sin notu fomeni ma sin natulu fua tulu mnotu neu UISNENO, ma nabalab utunu' atnatas. Ma leka anfai te sin napina ale paku anbi paku mnatu haen. Hai mituin piut UISNENO In aplenat sin, mes hi misaitan milali In.

¹²Hai atomatas nane Uisneno kun ma In Ana' fuat knino sin nok kai es i. Sin naloitan nalali hen fu to'is anfani ataka neu kai hem nao mat ma amaken mok ki. Hoi atoni Israel, kais him laban UISNENO, hai amaf sin Uisneno! Hi of ka mis ma kam be'u fa!”

¹³Fun Nai Yerobeam ansonu in solalus bian hen eka solalus Yehuda na'ko koti, ma bian anteni na'lau sin na'ko mat.

¹⁴Leka solalus Yehuda sin nit nak musu anfun natef nan sin, sin anbai neu UISNENO hen bab sin. Ale Ana' fuat knino sin anfu knit,

¹⁵oke te solalus Yehuda sin anhunun neki han koa makenat ma sin anao mat anbi makenat, fun Nai Abia in es ana' ma antopu sin. Leka sin fe anhunun ma ankoa, Uisneno In nis ma anbe'u Nai Yerobeam ma solalus Israel talantia sin naen ok-oke.

¹⁶Uisneno anmo'e atoni Yehuda talantia sin nis ma anbe'u sin.

¹⁷Nai Abia nok in solalus sin anbe'u to Israel lo nae le'uf kun; sin solalus alekot 500.000 esle' anmate.

¹⁸To Yehuda sin nis ma anbe'u, natuin sin ansonlaitok neu UISNENO, sin amfen sin Uisneno.

¹⁹Leka Nai Abia anli'u Nai Yerobeam in solalus sin, in nasik nan kot fauk-fauk nok kuan-kuan le anhaumak anbi nane. Kot-kot nane esle' Betel, Yesana ma Efron.

²⁰Anbi tabu Nai Abia in ana' aplenat, Nai Yerobeam ka nabe'i anteni fa he naleko in aplenat. Namsopu te UISNENO namate in.

²¹Mes, Nai Abia in plenat nahel piut. In fenai 14, in anmone 22 ma in anfeto 16.

²²Lasi bian antom Nai Abia, ma antom in uab in molok ma in taos in mo'et antui nalali sin anbi Mafefa Knino Nai Ido in Sulat Anaof.