Read Uab Meto 2 TAWARIKH 16 Bible Online

2 TAWARIKH 16 - Uab Meto bible

2 TAWARIKH 16

¹Anbi ton bo'tenu am ne Kesel Nai Asa ana' aplenat anbi Yehuda, Nai Baesa Kesel Israel anfen ma anlaban Yehuda ma in namepan kot Rama hen ek namate lanan Yehuda hen tam ma anpoi nokan.

²Es nane te Kesel Nai Asa in naiti mnatu ma noni mut na'ko maus anbi Ume UISNENO ma kesel sonaf, oke te ansonu neu Damsyik neu Nai Benhadad kesel Siria neki a'at i,

³“Aum nai he hit taiti lasi mafutus sob leko on afi hit amfen anmo'e nalali. Fun au sonu neu ko mnatu ma noni muti anfani on atnatas, ma au toti ko he Usif ho mufek lasi malutas mok Nai Baesa Kesel Israel, he nati' in anhel nafani in solalus sin na'ko au pah.”

⁴Nai Benhadad anlomi ma ansimo han totis nane oke te in anlelu ale in solalus nakaf nok solalus sin anfen ma anao ma nape' kot-kot Israel. Sin nis ma anbe'u Iyon, Dan, Abel-Bet-Maakha ma ale kot-kot bale bukae anbi Naftali.

⁵Leka Kesel Nai Baesa in nen lasi nane in nasnas na'ko nahelan kot Rama ma nasaitan kot nane.

⁶Oke te Kesel Nai Asa anlelu atoni na'ko Yehuda ok-oke he naiti ale fatu ma ale hau le Nai Baesa anpake anbi Rama he nahelan kot nane. Ale fatu ma hau nane Nai Asa anpake he nahelan kot Geba ma Mizpa.

⁷Anbi tabu nane Mafefa Knino Nai Hanani in nem neu Kesel Nai Asa ma nak neune nak, “Natuin hom sonlaitom neu Siria, ma kan sonlaitom fa neu ho UISNENO, es nane te lasi sona namneku na'ko ko he hom mis ma ambe'u solalus Kesel Israel.

⁸Ai Sudan ma Libia sin kan mu'in fa pukan ana' aikan anaek nok aklet makenat amfaun ma solalus asae bikase? Maski onane amsa UISNENO anfe neu ko lasi mnisat neu sin, natuin hom sonlaitom meu In.

⁹UISNENO anpao ma anpanat pah pinan ok-oke hen fe In be'in In matanin neu sin le na'ki neu In. Ho mo'e mulali lasi amonot, es nane te naubon na'ko neno i ho of mueku ma mutef mok makenat piut.”

¹⁰Lasi le Mafefa Knino Nai Hanani naton nane anmo'e Nai Asa in nato' anae le'uf talantia in natam Mafefa knino nane neu o'of nanan. Ma anbi neno nane amsa Nai Asa anhamu'i atoni fauk-fauk na'ko in to.

¹¹Ale lasi le anbol anbi plenat Nai Asa na'ko ahunut talantia namsopu antui nalali sin anbi Sulat Anaof Kesel Yehuda ma Israel.

¹²Anbi ton bo'tenu am sio Nai Asa in ana' aplenat in napeni menas le mafen le'uf anbi in haen nua sin. Maski onane amsa in kan toti fa he UISNENO anbab in, mes in antoti apalolit hen bab in.

¹³Ton nua namuni te in nasaebon.

¹⁴Sin anpaloli in aon ta'un neki fobona ma fomeni, oke te ansub in anbi kesel sin naukel anbi Nai Daud in Kot. Ma fun hen fe neune lasi tola onane te to napina ai tupu nae le'uf mese neune.