Read Uab Meto 2 TAWARIKH 17 Bible Online

2 TAWARIKH 17 - Uab Meto bible

2 TAWARIKH 17

¹Nai Yosafat anfani Kesel Yehuda anseka in amaf Nai Asa, ma in anhatani in aon hen laban Israel.

²In antao solalus anbi ale kot mabaki lape ok-oke anbi Yehuda, ma anbi kot-kot le in amaf nasik nan sin anbi pah Efraim.

³UISNENO anfe tetus neu Nai Yosafat fun in natuin in amaf haen nobin; in ka nabes fa neu Baal,

⁴mes in naluli nabes neu Uisneno. In natuin ale plenat Uisneno, ma in monin ka onfa kesel-kesel Israel.

⁵UISNENO anfe neu Nai Yosafat toko plenat le namep on Kesel Yehuda. To ok-oke anfe neune tnatas ma in anfani amu'it ma antola in nok matani.

⁶Nok in nek lomit matani in natuin UISNENO In aplenat ma nale'un naskuku ale bale fuat uisneno teta ma ale le'u mahuma uisneno teta Fenai Asyera anbi Yehuda.

⁷Anbi ton tenu leka in ana' aplenat in ansonu in nakaf-nakaf amnanut sin he nanoina to antom plenat-plenat UISNENO anbi kot-kot Yehuda. Sin le nane es: Nai Benhail, Nai Obaja, Nai Zakharia, Nai Nataneel ma Nai Mikha.

⁸Atoni sio na'ko atoni Lewi ma Ana' fuat knino nua sin nok sin. Atoni-atoni Lewi nane es Nai Semaya, Nai Netanya, Nai Zebaja, Nai Asael, Nai Semiramot, Nai Yonatan, Nai Adonia, Nai Tobia, ma Nai Tob-Adonia. Ana fuat knino nua en nane es Nai Elisama ma Nai Yoram.

⁹Sin neki Sulat Plenat-plenat UISNENO sin anao neu me-me anbi kot Yehuda ok-oke ma sin nanoina to anbi nane.

¹⁰UISNENO anfe hakataus neu ale plenat pah-pah anfun natef Yehuda talantia sin namtau hen maken ma anlaban Uiskesel Nai Yosafat.

¹¹Na'ko atoni Filistin in ansimo noni muti namfau ma tnatas bian-bian anteni, ma na'ko atoni Arab in ansimo bibi kase 7.700 ma bibi 7.700.

¹²Onle nane Nai Yosafat in kuasat anfonat ma anao mat piut. Anbi Yehuda ok-oke in nahakeb kot-kot mabaki lape ma kot-kot le nabela bukae anbine.

¹³In nabuab bukae anae le'uf anbi kot-kot nane. Anbi Yerusalem in antao ale in solalus nakaf sin le nabe'i ma anmatani,

¹⁴es-es nok in pukan solalus kun nok in matanin natuin sin amfenu. Nai Adna in anfani solalus nakaf neu Yehuda in-ini sin. In naplenat solalus 300.000.

¹⁵Ma atoni le natuin in es Nai Yohanan; in naplenat solalus 280.000.

¹⁶Ma le natuin anteni Nai Yohanan es Nai Amasia Nai Zikhri anmone; in naplenat solalus 200.000. (Nai Amazia nane atoni mese le natuin kun in nek lomit in nana'at in aon neu UISNENO.)

¹⁷Solalus nakaf anbi uf Benyamin es Nai Elyada, atoni amabe'ut mese le matani. In anfani nakaf neu solalus 200.000 le sin neki aklaot ma ben besi tika.

¹⁸Atoni le natuin Nai Elyada es Nai Yosabad; in anfani nakaf neu solalus 180.000 le sin neki kun sin bale manuat.

¹⁹Sin es anmepu anbi Yerusalem. Fun anesi na'ko nane, kesel antao pukan solalus bian anbi kot-kot mabaki lape anbi pah Yehuda.