Read Uab Meto 2 TAWARIKH 19 Bible Online

2 TAWARIKH 19 - Uab Meto bible

2 TAWARIKH 19

¹Leka Nai Yosafat Kesel Yehuda in neki anfani nok aomina neu in sonaf anbi Yerusalem,

²Mafefa knino mese kanan Nai Yehu Nai Hanani anmone nem neu in. Mafefa knino nane nak neune nak, “Nabe'i Usi hom bab atoni amle'ut ma hom pesi atoni le an unu to'an neu UISNENO? Ho taos ho mo'et nane Usi antao ma anmo'e UISNENO ma nato'an Usi ko.

³Maski onane amsa anmu'i lasi alekot anbi Usi ko. Ho muneku mulali uisneno teta Fenai Asyera le to ma Usi ho amsa muhelnom mulali he moni mutuin Uisneno In lomin.”

⁴Kesel Nai Yosafat in natua anbi Yerusalem. Mes in anao piut ma nono in to anbi pah ok-oke ma nanoina sin hen fani neu UISNENO, sin amfenu sin Uisneno.

⁵Anbi kot mabaki lape mese-mese anbi Yehuda in naiti alef lasi,

⁶ma anfe plenat i neu sin nak, “Amlefi lasi nok amneot, natuin him lefi lasi nane ka natuin fa mansian pah pinan, mes natuin UISNENO. In anpao ma anpanat ki anbi neno hi amlefi lasi.

⁷Hi mes mimtausan UISNENO, ma amlefi lasi nok lek-leko, natuin hit UISNENO an unu' to'an neu atoni le anmo'e amle'ut, le anlefi lasi anmafen neu aon bian ai le ansimo noni mate.”

⁸Onane amsa anbi Yerusalem, Nai Yosafat in alef lasi sin na'ko atoni-atoni Lewi, Ana' fuat knino, ma mnasi-mnasi na'ko to. Sin nem anlefi ale lasi anmatom nok lasi tanhais UISNENO In Aplenat ma lasi-lasi bian anteni.

⁹Neu ale lasi nane Nai Yosafat anfe lasi i neu sin nak, “Minaoba hi mepu nai nok lasi amtaus neu UISNENO. Mituin In plenat sin anbi sa'-sa' le hi minaoba.

¹⁰Leka hi biafen na'ko kot bian neki nem neu ki lasi mamaten mese, lasi tanhais plenat ai lasi tanhais lekat lulut so nati' him fe neu sin lasi fainekat. Nok lasi nane te sin ka nasanab fa neu UISNENO, ma of ka nato'an ki fa ai neu sin. Anmo'e nai plenat i, onane te of hi ka misanab fa.

¹¹Ana' Fuat Knino Amnanut Nai Amarya au fe kuasat amnanut neu ale lasi le antom nok plenat-plenat lasi knino. Nai Zebaja Nai Ismael anmone, kumlol Yehuda, au fe neune kuasat amnanut anesi neu ale lasi bian ok-oke. Atoni-atoni Lewi sin ansutai hen panat he nati' ale lasi tfeka lefi lasi nanaoba nani. Mituin nai lasi-lasi i ma mepu nai nok amneot. So nati' UISNENO anhake nok atoni le anmo'e lasi amneot!”