Read Uab Meto 2 TAWARIKH 22 Bible Online

2 TAWARIKH 22 - Uab Meto bible

2 TAWARIKH 22

¹Leka pukan asikat atoni Arab sin nale'un Yehuda ma nasik Nai Yehoram in sonaf, in anah sin ma in fenai sin, al Nai Ahazia in anmone kliko muni nane es ka namate fa in. Es nane te Yerusalem tuaken naiti Nai Ahazia anfani kesel anseka in amaf.

²Nai Ahazia anfani kesel leka in uan ton 22, ma in naplenat anbi Yerusalem ton mese in a'lon. Nai Ahazia amsa anmoni papmese on Kesel Nai Ahab ume nanan, natuin in ainaf bi Atalya anfainek in hen mo'e ale lasi amle'ut. Bi Atalya nane anfetnai na'ko Kesel Nai Ahab, Nai Omri Kesel Israel in upuf.

⁴Nai Ahazia nasanab neu UISNENO papmese on Nai Ahab in ume nanan, natuin sin anfani afainekat neu in leka in amaf nasaebon. Afainekat-afainekat sin le nane esle' nale'un in.

⁵Natuin sin fainekat, in nabua nok Nai Yoram Kesel Israel hen maken ma anlaban Nai Hazael Kesel Siria. Sin anmakenan anbi Ramot, pah Gilead. Nai Yoram napap anbi makenat nane,

⁶oke te in anfani neu kot Yizreel hen paloli in, ma Nai Ahazia in anao ma ankiso in anbi nane.

⁷Uisneno anlek nalali nak Nai Ahazia of anmate leka in nem ma ankiso Nai Yoram. Fun anbi lasi masenut nane Nai Ahasia ma Nai Yoram napeni manuat na'ko atoni mese kanan Nai Yehu Nai Nimsi anmone, le UISNENO anbeti nalali in he nale'un Nai Ahab in ume nanan.

⁸Leka Nai Yehu fe nanaoba UISNENO In kasat neu Nai Ahab ume nanan sin, in natef nok anaet Yehuda pukan mese ma Nai Ahazia in tatfen anmone sin le sin nok anbi masenut nane. Nai Yehu in namate sin ok-oke.

⁹Nalali te in anlelu ma nami Nai Ahazia le anbi tabu nane in fe natolo' anbi Samaria. Leka sin napeni Nai Ahazia, sin neki in nem neu Nai Yehu oke te namate in. Maski onane amsa sin ansub in natuin sin natola Kesel Nai Yosafat, Nai Ahazia in na'if le namtausan UISNENO nok in nekan oke. Na'ko Nai Ahazia ume nanan katit fa esle' nabe'i he naiti nan nafani aplenat.

¹⁰Leka bi Atalya nahin nak Kesel Nai Ahazia in anah anmate nalali in anfe plenat he nati' namate kesel anbi pah Yehuda in ume nanan sin.

¹¹Nai Ahazia anmu'i fetof mese in kanan bi Yoseba le in anmamone nok Ana' fuat knino mese kanan Nai Yoyada. Fun nok atol-tolo' bi Yoseba in naiti nan Nai Ahazia anmone mese kanan Nai Yoas na'ko kesel in naimnuke sin le bi Atalya he namate sin. In natolo' li'ana nane nok in apanat anbi ke'an mese in nanan anbi Ume UISNENO. Onle nane bi Yoseba in nafetin li'ana nane na'ko lasi maten talantia bi Atalya ka namate nan fa in.

¹²Ton ne in a'lon natolo' Nai Yoas anbi Ume UISNENO anbi neno bi Atalya naplenat on kesel fenai.