Read Uab Meto 2 TAWARIKH 23 Bible Online

2 TAWARIKH 23 - Uab Meto bible

2 TAWARIKH 23

¹Anbi ton hitu Ana' Fuat Knino Nai Yoyada nafek hen laban plenat bi Atalya. In anmo'e lasi tfeka nok solalus nakaf nim, esle' Nai Azarya Nai Yeroham anmone, Nai Ismail Nai Yohanan anmone, Nai Azarya Nai Obed anmone, Nai Maaseya Nai Adaya anmone, ma Nai Elisafat Nai Zikhri anmone.

²Sin anao neu ale kot anbi Yehuda, ma nabuab atoni-atoni Lewi ma ale nakaf nonot sin, oke te neki sin anao neu Yerusalem.

³Sin nabuan anbi Ume UISNENO, ma anmo'e lasi manba'an nok Nai Yoas, kesel anmone nane. Nai Yoyada nak neu sin nak, “I Kesel Nai Ahazia amates in anmone! In mes hen sae neu toko mnatu anbi neno i, natuin UISNENO anmanba'an nalali nak Kesel Nai Daud in sufan sin of sin ana' aplenat nabalah.

⁴Lasi i es mes hit het mo'e tani: Leka ale Ana' fuat knino ma atoni Lewi sin antuthae nalali anbi Neno Snasat, ka nabe'i fa sin hen fani. Bati tenu na'ko sin mes hen pao anbi eno-eno naek Ume UISNENO,

⁵bati tenu anteni anbi kesel sonaf, ma nesin anbi Eno Naek Tu'in. To ok-oke mes nabua anbi Ume UISNENO matan.

⁶Katit fa es amsa nabe'i hen tam neu Ume UISNENO al Ana' fuat knino sin ma atoni Lewi le fe antuthae. Sin nabe'i antam natuin anbeti nateta nalali sin neu UISNENO. Atoni-atoni bian mes he natuin lekat lulut UISNENO ma sin namaika anbi kotin.

⁷Atoni-atoni Lewi sin mes anhake anfun natef nan kesel neki suni le anfaki nani anbi sin niman, ma anpanat ma anpao in anao anbi me amsa. Sekau nahelnon hen tam neu Ume UISNENO, mes namate nani.”

⁸Atoni-atoni Lewi ma to Yehuda ok-oke sin anmo'e natuin plenat Nai Yoyada. Atoni-atoni le sin antuthae nalali anbi Neno Snasat ka nabe'i fa he sin anfani. Es nane te ale solalus nakaf nabe'i sin anlelu atoni ok-oke le antuthae nalali ma le fe nem hen tuthae.

⁹Nai Yoyada in anbati suni ma ben besi tika Kesel Nai Daud ini le nabela sin anbi Ume UISNENO neu ale solalus nakaf sin.

¹⁰Nai Yoyada amsa in nahakeb atoni-atoni le neki suni le anfaki nani anbi sin niman anfun natef Ume UISNENO matan hen panat ma anpao kesel.

¹¹Oke onane te Nai Yoyada neki Nai Yoas anpoi, oke te antao sobe mnatu neu in anakan, ma anfe neune sulat Plenat Uisneno. Onle nane naiti Nai Yoas anfani kesel. Nalali te Ana' Fuat Knino Nai Yoyada nok in anah-anah sin an'op mina lasi nasaeba Nai Yoas anfani kesel, oke te atoni ok-oke anhunun ma ankoa nak, “Kesel anmoni!”

¹²Bi Atalya in nen to anhunun ma ankoa ma sin nauban kesel. In anao lab-lab neu Ume UISNENO anbi bale atoni amfaun sin nabua abnine.

¹³In nit kesel fe'u nane anhake anbi eno hen tam neu Ume UISNENO, anbi bale le nasaeb in anfani kesel, ale solalus nakaf anfun natef nan in ma anfu to'is. Ale to ok-oke anhunun ma ankoa nok amlilat ma anfu to'is, ma ale a'bae heo ma biola anbi Ume UISNENO sin naliatas lasi nasaeba kesel nane neki ale sin bale heo ma biola sin. Nok nek susal bi Atalya anpisu in bale pake ma anbai nak, “Lasi aneb! Lasi aneb!”

¹⁴Nai Yoyada ka nafetin fa he nati' namate bi Atalya anhaumak Ume UISNENO, es nane te in nak neu ale solalus nakaf sin nak, “Meki in anpoi nao nok solalus ahaket aketis sin, ma mimate sekau am sekau le nami he nafetin in.”

¹⁵Sin anheke in, oke te neki in nao neu sonaf. Sin namate in anbi nane anbi Eno Naek Bikase.

¹⁶Ana' Fuat Knino Nai Yoyada antoti Kesel Nai Yoas ma to bua'-bua' nok in anmo'e lasi manba'an nak sin of anfani UISNENO In to.

¹⁷Oke onane te sin al-al sin anfen ma anao ma natseleb ume le'u Baal. Baki fuat ma ale le'u mahuma sin nale'un naskuku nani sin, ma sin namate Nai Matan, Ana' fuat Baal anbi baki-baki fuat nane sin matan.

¹⁸Oke te Nai Yoyada anlek ale Ana' fuat knino ma atoni Lewi he nati' sin anpanat mepu anbi Ume UISNENO natuin mepu le anbati nalali onle Kesel Nai Daud natetab nalali. Sin mes he natulu fua tulu mnotu neu UISNENO — anmatom nok plenat-plenat Nai Musa — neki lasi liatas ma sit pules onle Nai Daud anbati nalali.

¹⁹Nai Yoyada nahakeb apaot anbi eno-eno naek Ume UISNENO, hen panat he nati' atoni le ka nabe'i fa he naluli ma nabes neu UISNENO kaisa antam.

²⁰Ale solalus nakaf, ale atoni makana, ma ale ana' aplenat, ma to ok-oke natuin Nai Yoyada ma sin nauban Kesel Nai Yoas na'ko Ume UISNENO nao neu sonaf. Sin antam na'ko eno naek ahunut oke te kesel antoko anbi toko mnatu.

²¹To ok-oke namlil ma namoke, kot amsa antainine ma bi Atalya sin namate nalali in.