Read Uab Meto 2 TAWARIKH 24 Bible Online

2 TAWARIKH 24 - Uab Meto bible

2 TAWARIKH 24

¹Nai Yoas in uan ton 7 anbi tabu in anfani Kesel Yehuda, ma in ana' aplenat anbi Yerusalem ton 40 in a'lon. In ainaf kanan bi Zibya na'ko kot Bersyeba.

²Leka Ana' Fuat Knino Nai Yoyada fe anmoni, Nai Yoas anmo'e lasi-lasi alekot le anhalin UISNENO nekan.

³Nai Yoyada anbeti fenai nua anfani Nai Yoas in fenai sin, ma na'ko sin Nai Yoas napeni anmone ma anfeto.

⁴Leka in naplenat tabu fauk a'lon, Nai Yoas nafek he naleko Ume UISNENO.

⁵In anfe plenat neu ale Ana' fuat knino ma atoni Lewi he nao neu tuafen anbi kot-kot Yehuda ma nabuab noni na'ko ale to he naleko Ume UISNENO anbi ton-ton. In anlelu sin he nanaoba mepu nane nok manoe, mes atoni Lewi sin fe nania'on.

⁶Es nane te in no'en Ana' Fuat Knino Nai Yoyada, sin anakaf, oke te in nak, “Ai Nai Musa ate UISNENO nane kan lelu fa to hen baen noni poni ai beo he nati' anpanat Um-ume UISNENO? Tabu i, nansa' Ama ho ka museke atoni-atoni Lewi nane he nabuab noni poni ai beo na'ko to anbi Yehuda ma Yerusalem?” (

⁷Atuin-atuin bi Atalya, bife amle'ut nane, in nale'un nalali Ume UISNENO, ma namfau na'ko bale'-bale' le anbeti nateta nalali sin neu Uisneno sin anpake nalali sin he nabes neu Baal.)

⁸Es nane te kesel anfe plenat he nati' atoni Lewi anmo'e peti noni mese ma antao anbi eno naek Ume UISNENO matan.

⁹Anbi Yerusalem ma Yehuda ok-oke sin anfe lasi etus ma tonas nak atoni ok-oke he fe noni poni ai beo neu UISNENO, onle Nai Musa anlek nani.

¹⁰Lasi etus ma tonas nane anhalin to nekan ma ale sin nakaf sin. Sin bua'-bua' natam noni poni ai beo neu peti nane in nanan.

¹¹Neno-neno atoni Lewi nane sin neki peti nane neu kesel in ameput sin hen tae peti nane. Leka peti nane nahenu lulutunis pah ma ababat Ana' Fuat Knino Amnanut napoitan noni anbi peti nane in nanan oke te antao nafani peti nane neu in balan. Onle nane sin nanaoba neno-neno, ma sin nabuab noni amfau le'uf.

¹²Nalali te kesel ma Nai Yoyada sin nana'at noni nane neu nakaf he naleko Ume UISNENO nane. Oke te atoni-atoni nane sin anbaen apakae fatu, apakae hau, ma apakae noni molo hen mepu ale mepu nane.

¹³Es nane te apakaet-apakaet nane sin anfatan mepu naleko Ume UISNENO nane. Sin al-al sin anmepu onle nane talantia namuni te Ume nane nahel anfani ma leko anfani on afi un-unu.

¹⁴Leka mepu nane namsopu te, mnatu ma noni muti le anesi nane sin nana'at neu kesel ma Nai Yoyada. Oke te mnatu ma noni muti nane anpake he mo'e bale'-bale' neu Ume UISNENO, bian esle': bale'-bale' neu lasi luli besa, neu fua tulu mnotu, pika'-pika' neu atu fomeni, ma mako'-mako'. Leka Ana fuat knino Nai Yoyada fe anmoni, sin natulu piut fua tulu mnotu anbi Ume UISNENO.

¹⁵Nai Yoyada in napeni ua mnanu a'lo le'uf kun ma in anmate leka in uan ton 130.

¹⁶Ansub in anbi kesel-kesel sin naukel anbi Nai Daud in Kot he natola in lasi alekot-lasi alekot sin neu Uisneno, neu Ume UISNENO ma neu to Israel.

¹⁷Leka Nai Yoyada anmate nalali, ale nakaf-nakaf Yehuda anfuli ma anpaitan Nai Yoas talantia in ka natuin anteni fa Nai Yoyada in noina.

¹⁸Es nane te to ka naluli ma nabes anteni fa anbi Ume UISNENO, sin amaf sin Uisneno, mes sin naluli ma nabes neu uisneno teta ma le'u mahuma-le'u mahuma uisneno teta Fenai Asyera. Sin sanat nane es anmo'e talantia UISNENO nato'an Yehuda ma Yerusalem.

¹⁹UISNENO ansonu Mafefa knino he natonan sin he nati' sin anfani ma nausi neu UISNENO, mes to kan lomi fa he nen sin.

²⁰Oke te Uisneno In Smanan Knino anpake Nai Zakharia Ana' Fuat Knino Nai Yoyada anmone. Nai Zakharia anhake anbi to matan, oke te anhunun nak, “UISNENO nakua a'an nak, ‘Nansa' hi ka mituin fa Au plenat-plenat sin ma mile'un hi aomen. Hi kam sian Kau fa, onane amsa Au ka sian ki fa!’ ”

²¹Mes to anmalokin lasi ma anlaban Nai Zakharia, ma Kesel Nai Yoas in nok amsa anbi malokin lasi nane. In ka namnau fa ale lasi alekot ma lasi ki'at Nai Yoyada, Nai Zakharia in amaf. Natuin kesel in aplenat, sin anpoli Nai Zakharia talantia anmate anbi po'an Ume UISNENO. Anbi tabu Nai Zakharia hen mate, in anhunun nak, “So nati' UISNENO In nit hi taos hi mo'et ma anseunbanin ki!”

²³Anbi ton nane amsa, anbi ton anmaseka, solalus Siria anfen nem ma nape' Yehuda ma Yerusalem. Sin namate ale nakaf-nakaf sin, ma sin nasik ma naiti neki bale masikat neu Damsyik.

²⁴Solalus Siria ka namfau fa, mes UISNENO nafetin sin ma sin nis ma anbe'u solalus Yehuda le namfau anesi, natuin atoni Yehuda kan sian fa sin amfenu sin UISNENO. Nok lasi nane UISNENO anfe kasat neu Kesel Nai Yoas.

²⁵Nai Yoas in napeni papa' mafena. Leka solalus musu anao, in ate atoni nua sin anmalokin lasi. Sin namate in anbi in bale tupa anfani seunbanit neu afi namate Ana' Fuat Knino Nai Yoyada anmone. Ansub Kesel Nai Yoas anbi Nai Daud in Kot, mes kan bi fa kesel-kesel sin naukel. (

²⁶Atoni-atoni le anmalokin lasi ma anlaban in es kanan Nai Zabad bi Simeat bife Amon anmone, ma es anteni in kanan Nai Yozabad bi Simrit bife Moab anmone.)

²⁷Lasi bian antom Nai Yoas in anah sin, antom lasi beno le ka naleko fa neu in, ma antom lasi onme in naleko Ume UISNENO, ale nane ok-oke antui nalali sin anbi Sulat Etus tonas na'ko ale Kesel sin. Nai Amazia, Nai Yoas anmone anfani kesel anseka in amaf.