Read Uab Meto 2 TAWARIKH 25 Bible Online

2 TAWARIKH 25 - Uab Meto bible

2 TAWARIKH 25

¹Nai Amazia anfani kesel leka in uan ton 25, ma in naplenat anbi Yerusalem ton 29 in a'lon. In ainaf bi Yoadan na'ko Yerusalem.

²Nai Amazia anmo'e lasi alekot le anhalin UISNENO nekan, mes ka nok fa nekan ok-oke.

³Leka in atokon nahel, in namate ale ameput-ameput le namate in amaf.

⁴Mes ameput-ameput nane sin anah-anah sin in ka namate fa sin fun in natuin UISNENO In aplenat anbi in Sulat Nai Musa le nahan nak, “Kais mumate mnasi natuin lasi amle'ut le sin anah sin anmo'e, ma kais mumate sin anah sin natuin lasi amle'ut le sin amaf sin anmo'e. Fun namate sekau am sekau am sekau natuin lasi amle'ut le in nekinon anmo'e.”

⁵Kesel Nai Amazia nabuab ale atoni uf Yehuda ma Benyamin oke te anlelu sin anhake natuin sin amfenu mese-mese, natuin solalus nakaf nifun mese ma solalus nakaf natun mese. Nalali te in anbeti ale munif le sin uan ton 20 neki ansae le anmaken nahin ma anpake nahin auni ma ben besi tika. Sin amfauken atoni 300.000.

⁶Ma nesi na'ko nane in anseb solalus 100.000 na'ko Israel neki baen noni muti oni kilo 3.400.

⁷Mes Mafefa knino mese nem neu kesel ma nak, “Kais hom pake Israel in solalus sin, natuin UISNENO kan bab fa to Israel na'ko Plenat aon bian A'li nane.

⁸Mes kalu Usi hom pake sin amsa, Uisneno of nafetin ko ma musu of nis ma anbe'u ko maski Usi ho solalus sin nabe'i ma anmatani. Natuin al Uisneno kun es anmu'i kuasat hen fe mnisat ai ka mnisat fa.”

⁹“Mes onme ka nok ale noni muti le au fe ulali sin nane?” Nai Amazia natoti onane. Mafefa knino nane natae nak, “UISNENO nabe'i anfe nafani ko sin Usi anesi na'ko nane!”

¹⁰Es nane te Nai Amazia nafetin ale solalus mabaen en nane ma anlelu sin anfani neu sin pah. Sin anao anfani, mes nok nek to'as anae le'uf.

¹¹Nai Amazia anhatanion ma neki in solalus sin neu Nonof Min Mali. Sin anmakenan anbi nane ma sin namate solalus Edom 10.000.

¹²Nifun bo'mese bian anteni anheke sin ma neki sin. Neki sin neu tubu fatu tunan anbi kot Sela oke te anpolin nasanut sin na'ko fatu tunan talantia anmate ok-oke.

¹³Mes solalus-solalus Israel le Nai Amazia anlelu sin anfani, ma ka nok fa sin hen maken, sin nape' kot-kot Yehuda anbi Samaria ma Bet-Horon atnanan. Sin namate atoni 3.000 ma nasik bale' amfau le'uf.

¹⁴Leka anbe'u nalali solalus Edom, Nai Amazia anfani ma in neki uisneno teta le'u mahuma atoni Edom ma antao sin anbi Yehuda. Oke te in notu atu fomeni neu ale le'u mahuma nane ma naluli nabes neune.

¹⁵In taos in mo'et nane anmo'e UISNENO ma nato'. UISNENO ansonu Mafefa knino mese neu Nai Amazia. Mafefa knino nane nak neune nak, “Nansa' Usi ho mululi ma mubes neu uisneno teta le ka nabe'i fa he nafetin in to na'ko Usi ho kuasat?”

¹⁶“Mutena,” Nai Amazia nak onane, “Kalu ho ka mutena fa, of hai mimate ko! Hai ka maiti mit ko fa hem fani afainekat neu kesel!” Es nane te Mafefa knino nane in natena, mes nahunu na'ko nane in fe namolok nak, “Tabu le i au uhin ulali nak Uisneno nafek nalali he nale'un ko natuin Usi ho mo'et nane, ma natuin Usi ho kam nen fa au fainekat.”

¹⁷Nai Amazia Kesel Yehuda nok ale in afainekat sin anmalokin lasi hen laban Israel. In ansonu haef neu Nai Yoas Kesel Israel, Nai Yoahas anmone, Nai Yehu upuf, hen laban in anbi makenat.

¹⁸Mes Kesel Nai Yoas ansonu han taes i nak, “Anbi tabu neotes kisan anbi Neten Libanon ansonu lasi seke i neu aijob Libanon nak, ‘Hoi hau aijob, amfe kau ho anfeto neu au anmone hen fani in fenai.’ Mes nalali te mu'it fui mese anfini nao nok nane ma anteli nale'un kisan nane.

¹⁹Ho, Amazia, ho mumolok mumo'e mak au is ma be'u ulali atoni Edom, mes leko anesi ho mumaika mubalah ambi ho ume. Neu sa' ho mami ale lasi le'uf le al nale'un ho aom ma ho to?”

²⁰Mes Nai Amazia, Kesel Yehuda in ka nen fa Nai Yoas Kesel Israel in hanan. Ma namneo Uisneno anlomi he nati' nis ma anbe'u Nai Amazia natuin in naluli ma nabes neu le'u mahuma atoni Edom.

²¹Es nane te Nai Yoas anfen ma anao nok in solalus sin neu Bet-Semes ma anmaken nok Nai Amazia anbi nane.

²²Sin nis ma anbe'u solalus Yehuda ma in solalus sin naen anfani neu sin ume mese-mese.

²³Nai Yoas anheke Nai Amazia ma neki in neu Yerusalem, oke te in natseleb baki lape kot nane amnanun oni anesi na'ko meter 200, naubon na'ko Eno Naek Efraim talantia Eno Naek Si'uf.

²⁴Ale mnatu ma noni muti ma ale ba'le' ok-oke le sin napeni anbi Ume UISNENO ma le Nai Obed-Edom anpao sin, ma ale a'maus anbi sonaf nanan, nok atoni fauk-fauk le natokob sin anbi nane natuin lasi Nai Yoas neki sin anao neu Samaria.

²⁵Leka Nai Yoas Kesel Israel anmate, Nai Amazia Kesel Yehuda fe anmoni ton 15 anteni.

²⁶Na'ko tabu Nai Amazia nasaitan UISNENO atoni anmalokin lasi piut ma anlaban in anbi Yerusalem. Es nane te, in naen neu kot Lakhis, mes in musu-musu sin anli'u in anbi nane ma namate in. Sin nasaeb in aon ta'un neu bikase neki neu Yerusalem, oke te ansub in anbi naukel kesel sin anbi Nai Daud in Kot. Lasi bian antom Kesel Nai Amazia na'ko ahunut talantia in aplenat namsopu antui nalali sin anbi Sulat Anaof na'ko ale Kesel Yehuda ma Israel.