Read Uab Meto 2 TAWARIKH 26 Bible Online

2 TAWARIKH 26 - Uab Meto bible

2 TAWARIKH 26

¹Leka Nai Amazia anmate nalali, to Yehuda ok-oke anbeti in anmone Nai Uzia anfani kesel. Anbi tabu nane in uan ton 16. In ainaf kanan bi Yekholya, bife na'ko Yerusalem. Nai Uzia in ana' aplenat anbi Yerusalem ton 52 in a'lon. In es nasik nan ma nahakeb nafani kot Elot.

⁴Papmese on in amaf, Nai Uzia amsa anmo'e lasi alekot le anhalin UISNENO nekan.

⁵Nai Zakharia anfani afainekat antom lasi smanaf. Leka Nai Zakharia fe anmoni, Nai Uzia nok aki'at naluli ma nabes neu UISNENO talantia UISNENO anfe neune tetus.

⁶Nai Uzia anmaken anlaban atoni Filistin. In natseleb baki lape kot Gat, Yabne, ma Asdod, oke te nahakeb kot-kot mabaki lape anhaumak Asdod ma anbi bale bian anbi Filistin.

⁷Uisneno anbab in ma in nis ma anbe'u atoni Filistin, ma atoni Arab le natua anbi Gur-Baal ma atoni Meunim.

⁸Atoni Amon anbaen noni poni neu Nai Uzia. In kuasat anae le'uf talantia in mateka antia pah Mesir.

⁹He nati' nahelan kot Yerusalem, Nai Uzia nahakeb el-fatu anbi Eno Naek Si'uf anbi Eno Naek Nonof ma anbi baki lape tali'an.

¹⁰In amsa nahakeb el-fatu mabaki lape anbi mnela, ma anhani oe mata amfaun natuin in mu'it amfau le'uf, hen bi neten ai hen bi mnela anbi aon neno tesan. Natuin in antao in nekan neu mepu lene, in anmu'i anmepu lene amfaun le anmepu lene tua min kase anbi bale neten, ma hen anmepu lene anbi bale-bale le maafa.

¹¹Nai Uzia anmui solalus amfau le'uf le napoitan sin piut hen makenan. Sin anbation pukan-pukan le sin amfauken kesel in lultunis nua sin, Nai Yeiel ma Nai Maaseya nok sin anakaf Nai Hananya, na'ko kesel in ana' aplenat mese sin antui nani pukan-pukan solalus nane.

¹²In ana' aikan nane ok-oke solalus 307.500 ma le anfani nakaf neu sin solalus nakaf 2.600. Sin al-al sin anmu'i be'it ma matani anaek hen maken ma anbab kesel hen be'u musu.

¹⁴Nai Uzia na'ikab in solalus sin neki ben besi tika, auni, sobe besi, sobalu besi, as'anef, ma fatu finu.

¹⁵Ale in amahinet besi aikan anbi Yerusalem sin anmo'e bale manuat le nabe'i nafetin as'anef ma fatu-fatu naek na'ko el-fatu nanan ma na'ko baki lape kot in si'uf-si'uf sin. Nai Uzia in kanan mateka anbi me-me, ma in kuasat anae le'uf kun natuin Uisneno anbab in nok matani.

¹⁶Leka Kesel Nai Uzia in nahel, in nanaebon, ma lasi nane es anmo'e talantia in namle'u. In antanhai in UISNENO In aplenat sin natuin in antam neu Ume UISNENO hen notu atu fomeni anbi baki tulu atu fomeni in fafon.

¹⁷Mes Ana' Fuat Knino Nai Azarya in nok Ana' fuat knino 80 bian anteni le nabe'i ma anmatani sin

¹⁸natuin in hen laban in mo'et nane. Sin nak, “Usi Apinat! Usi ho ka nabe'i fa he motu atu fomeni neu UISNENO. Nane mepu Ana' fuat knino sin na'ko Nai Harun sufan, natuin sin es anbeti nateta sin neu mepu nane. So nati' Usi ho musaitan bale knino le i! Usi hom laban mulali UISNENO, ma ho ka mupeni amteni fa In tetus.”

¹⁹Anbi tabu nane Nai Uzia fe in anhake anhaumak baki tulu atu fomeni anbi Ume UISNENO nok bale mnotu atu fomeni anbi in niman. In nato'an ale Ana' fuat knino nane, ma nok askeken men poko manisit anpoi anbi in ilan.

²⁰Nai Azarya ma Ana' fuat knino bian anteni sin ankiso in nok lasi sanmakat anae le'uf, oke te sin naseke in he nati' in anpoitan nasaitan Ume UISNENO. In anpoi nok lab-lab natuin UISNENO anfe nalali kasat neu in.

²¹Talantia neno Kesel Nai Uzia anmate in ka naleko nit fa na'ko menas nane. Sin nateta in anbi ume mese ma ka nafetin fa in anteni hen tam neu Ume UISNENO. Nasnasab in na'ko ale mepu, ma in anmone Nai Yotam naplenat to on ababat neu in.

²²Lasi bian anteni antom aplenat Kesel Nai Uzia, Mafefa Knino Nai Yesaya Nai Amos anmone antui nalali sin.

²³Leka in anmate, ansub Nai Uzia anbi bale anhaumak kesel sin naukel, mes kan bi fa naukel nane nanan, natuin in namen men poko manisit. In anmone Nai Yotam anfani kesel anseka in.