Read Uab Meto 2 TAWARIKH 29 Bible Online

2 TAWARIKH 29 - Uab Meto bible

2 TAWARIKH 29

¹Nai Hizkia anfani Kesel Yehuda leka in uan ton 25, ma in ana' aplenat anbi Yerusalem ton 29 in a'lon. In ainaf kanan bi Abia Nai Zakharia in anah.

²Nai Hizkia anmo'e lasi alekot le anhalin UISNENO nekan on in anmuf Nai Daud.

³Anbi fun mese ton ahunut in ana' aplenat Nai Hizkia nasoitan eno-eno Ume UISNENO ma anlelu atoni ma naleko sin.

⁴Ana' fuat knino-ana' fuat knino ma atoni Lewi anlelu sin nabua anbi Ume UISNENO po'an aon neno saen,

⁵ma in namolok nok sin anbi nane. In nak neu sin nak, “Hi, atoni Lewi, mes ambeti miteta hi aom neu UISNENO, ma miknino Ume UISNENO, hi amfenu sin Uisneno. Ale sa' le neki hanisit neu ume nane mes hi mineku mani.

⁶Hi amfenu ka na'ki fa neu hit UISNENO ma sin anmo'e lasi amle'ut le kan halin fa In nekan. Sin ka nen fa In ma kan sian fa In Ume.

⁷Sin an ek eno-eno Ume UISNENO ma namate In paku-paku sin. Sin ka notu fa atu fomeni anbi Ume UISNENO, ma ka natulu fa fua tulu mnotu neu Uisneno le to Israel naluli ma nabes neune.

⁸Oke te UISNENO anbi In to'as nanan anfe kasat neu atoni Yehuda ma Yerusalem. Ma hi al-al ki mihin neu UISNENO In kasat nane anmo'e ale to naskek ma namtau.

⁹Hit amaf sin anmate anbi makenat nanan, ma hit anah sin ma hit fenai sin naiti neki sin on atoni le nis nan sin anbi makenat.

¹⁰Neno i au lomi he mo'e lasi manba'an nok UISNENO, Uisneno Israel, he nati' In kais nato'an anteni kit.

¹¹Au anah-anah ki, kaisa him polin tabu anteni, natuin UISNENO es anbeti ki neu he miluli ma mibes meu In ma motu atu fomeni ma amhel to he naluli ma nabes neu In.”

¹²Atoni Lewi le sin nok anbi tabu nane esle': Na'ko ume Nai Kehat: Nai Mahat Nai Amasai anmone, Nai Yoel Nai Azarya anmone Na'ko ume Nai Merari: Nai Kish Nai Abdi anmone, Nai Azarya Nai Yehaleleel anmone Na'ko ume Nai Gerson: Nai Yoah Nai Zima anmone, ma Nai Eden Nai Yoah anmone Na'ko ume Nai Elisafan: Nai Zimri ma Nai Yeiel Na'ko ume Nai Asaf: Nai Zakharia ma Nai Matanya Na'ko ume Nai Heman: Nai Yehiel ma Nai Simei Na'ko ume Nai Yedutun: Nai Semaya ma Nai Uziel.

¹⁵Nalali te sin nabuab atoni Lewi bian anteni ma sin al-al sin naknino sin aokenu. Oke onane te, anmatom nok kesel in aplenat, ale Ana' fuat knino sin antam neu Ume UISNENO in nanan ma sin naknino nani natuin UISNENO In aplenat sin. Ale amle'ut ok-oke sin neki anpoi neu po'an Ume UISNENO. Ma na'ko nane atoni Lewi sin neki neu Nonof Kidron anbi kot kotin.

¹⁷Mepu nane sin anmepu na'ko fun mese antam neno mese. Ma antam neno fanu te sin naknino nasopu Ume UISNENO in po'an matan talantia in eno matan. Nalali te anbi neno fanu anteni te sin naknino ume nane ok-oke talantia nalali nani ok-oke anbi funan nane antam neno bo'es am ne.

¹⁸Oke te atoni-atoni Lewi nane sin natonan Kesel Nai Hizkia nak, “Hai miknino milali Ume UISNENO ok-oke, nok baki tulu fua tulu mnotu, mei neu utunu' atnatas, ma ale in bale' sin ok-oke.

¹⁹Hai amsa hai maiti mifani ale bale' le Kesel Nai Ahas napoitan sin anbi neno in kan sian fa UISNENO anbi in aplenat. Ale bale' nane haim beti miteta sin anteni neu UISNENO, ma tabu le i sin es baki tulu in matan.”

²⁰Fun in kan pao fa lo anteni Kesel Nai Hizkia nabuab atoni makana sin na'ko to, oke te sin al-al sin anao neu Ume UISNENO.

²¹Neu fua tulu sako sanat antom kesel ume nanan ma to Yehuda, ma he naknino Ume UISNENO, sin neki bijae keso 7, bibi kase keso 7, bibi keso tipu 7, ma bibi keso 7. Kesel anlelu Ana' fuat knino sin na'ko Nai Harun sufan sin natulu mu'it-mu'it nane anbi baki tulu fafon on fua tulu mnotu.

²²Sin anlolo ale bijae nane oke te Ana' fuat knino sin anlisin na' nane neu baki tulu. Nalali te sin anmo'e onane amsa neu bibi kase ma bibi kase tipu hitu en nane.

²³Ameput sin naiti bibi-bibi nane ma neki sin neu kesel ma to le fe naluli ma nabes anbi nane, oke te sin al-al sin antao sin nimkenu neu bibi-bibi nane.

²⁴Oke te Ana' fuat knino sin anlolo bibi-bibi nane ma an'op sin na' neu baki tulu on fua tulu sako sanat neu to ok-oke. Sin anmo'e lasi nane natuin kesel anfe nalali plenat he nati' sin nanaoba fun tulu mnotu ma fua tulu sako sanat neu to Israel ok-oke.

²⁵Matom nok lekat lulut le UISNENO anfe nani neu Nai Daud nanete natuin Mafefa Knino Nai Gad, le anmepu neu kesel ma nanete natuin Mafefa Knino Nai Natan, kesel antao atoni Lewi sin anbi Ume UISNENO he na'bae biola ma a'heo,

²⁶onle Nai Daud anpake. Onane amsa antao Ana' fuat knino le neki to'is anbi nane amsa.

²⁷Nai Hizkia anfe taka' he nati' luli besa tulu fua tulu nane anfatan nai. Ma leka sin fe natulu fua tulu, ale to ansi naliatas UISNENO, ma ale asit sin anfu to'is ma ale bian anteni.

²⁸Kesel Nai Hizkia ma ale to le nabua anbi nane sin anli'tu ma nabes neu UISNENO fun ale asit sin ansi piut ma ale a'bae heo' ma biola na'bae ma ansi talantia fua tulu nane notu nalali nani.

³⁰Kesel Nai Hizkia ma ale atoni makana sin anlelu atoni Lewi hen si sit aliatas neu UISNENO le Nai Daud ma Mafefa Knino Nai Asaf antui nani sin. Ale to ansi nok amlilat ma amoket anae le'uf fun sin anli'tu ma nabes neu Uisneno.

³¹Oke onane te Nai Hizkia nak, “Natuin anbeti nateta ki neu UISNENO, es nane te anfani on hi tulu aliatas, hi mes meki fua tulu neu Ume UISNENO.” Oke te ale to le nabua anbi nane sin neki ale fua tulu nane, fun anesi na'ko nane anmu'i bian le nok sin nek lomit sin neki mu'it he natulu on fua tulu mnotu.

³²Sin neki bijae keso 70, bibi kase 100, ma bibi kase tipu 200, ma natulu nani sin on fua tulu mnotu neu UISNENO.

³³Fun sin neki amsa bijae keso 600 ma bibi kase 3.000 he natulu sin ma sin al-al sin le nabua anbi nane sin anbukae ok-oke.

³⁴Ana' fuat knino le naknino nalali sin aokenu ka namfau fa neu hen pu' ale mu'it-mu'it nane sin pasu. Es nane te atoni Lewi anbab sin, natuin atoni Lewi sin naknino sin aokenu. Sin antuntaku piut talantia Ana' fuat knino namfau le naknino sin aokenu.

³⁵Nesi na'ko fua tulu mnotu, ale Ana' fuat knino nane amsa sin natulu mu'it balun na'ko fua tulu aliatas le to anbukae. Sin amsa natulu tua mina mtasa le an'op nabuab nok fua tulu mnotu nane. Onle nane luli besa anbi Ume UISNENO sin nanaoba anteni.

³⁶Kesel Nai Hizkia nok to sin nekan anmalin natuin anbi tabu le ka lo fa Uisneno anbab nalali sin he nanaoba ale nane ok-oke.