Read Uab Meto 2 TAWARIKH 31 Bible Online

2 TAWARIKH 31 - Uab Meto bible

2 TAWARIKH 31

¹Leka naliatas nalali neno naek nane, to ok-oke anao neu kot-kot anbi Yehuda, oke te nale'un naskuku ale ni fatu uisneno teta, ma natseleb ale le'u mahuma le nahakeb sin neu uisneno teta Fenai Asyera, ma nale'un ale baki fuat ma ale bale luli besa neu uisneno teta. Sin anmo'e onane amsa neu bale bian anbi Yehuda, ma anbi pah Benyamin, Efraim ma Manasye. Oke te sin al-al sin anfani neu sin bale mese-mese.

²Kesel Nai Hizkia natetab nafani ale Ana' fuat knino pukan-pukan ma atoni Lewi natuin sin mepu le anbati nalali neu sin. Mepu-mepu nane esle': natulu fua tulu mnotu ma fua tulu halan, tuthae lasi luli besa anbi Ume UISNENO, ma anpules ma naliatas UISNENO anbi ale bale anbi Ume UISNENO In nanan.

³Na'ko kesel in mu'it kun kesel anfe ale mu'it neu fua tulu mnotu anbi nok-noka ma anbi neno anmabe, ma neu fua tulu le natulu anbi Neno Snasat, anbi Neno Naek Funan Fe'u, ma anbi neno naek bian onle anlek nani anbi UISNENO In aplenat sin.

⁴Anesi na'ko nane kesel anlelu tuafen Yerusalem neki fua tulu le anlek nani neu ale Ana' fuat knino ma atoni Lewi, he nati' sin anhatanion anbi mepu tuthaes anbi Ume UISNENO onle antui nalali anbi UISNENO In aplenat.

⁵Leka naton nalali plenat nane, to Israel neki sin atnatas neu Ume UISNENO na'ko pah in afan ahunut, esle' ut, tua mina mtasa, mina bub fua mina, oni hau ma pah in afan bian anteni. Sin amsa na'ki tulu bati bo na'ko sa' le sin anmui.

⁶Ale to le sin natua anbi kot-kot Yehuda sin neki bati bo' na'ko sin mu'it sin bijae ma sin bibi kase sin, ma ale atnatas bian namfau anteni, oke te sin natulu sin ok-oke neu sin UISNENO.

⁷Fun ale atnatas nane ansai nem na'ko ale bale anbi fun tenu, ma ansai nem piut talantia fun hitu.

⁸Kesel Nai Hizkia nok ale in ameput sin leka sin nit ale atnatas le amfaun onle nane, sin naliatas UISNENO ma naliatas In nonot to Israel.

⁹Leka kesel namolok nok ale Ana' fuat knino ma atoni Lewi antom ale atnatas nane,

¹⁰fun Ana' Fuat Knino Amnanut Nai Azarya na'ko ume Nai Zadok nak, “Na'ko afi to sin neki ale sin fua tulu neu Ume UISNENO, hai kam nuk fa mnahat, so mak hai mnahat nane anesi kun, talantia hai mnahat fe nabal esan. Fun haim simo ale nane natuin UISNENO anfe nalali In tetus neu In to.”

¹¹Natuin kesel in aplenat, sin naloitan ma nabalab ume maus anfun natef Ume UISNENO,

¹²oke te sin napan ma nabela ale atnatas ma bati bo' nane anbi ale ume maus nane sin nanan. Atoni Lewi mese in kanan Nai Konanya, anlek in anfani apaot, ma in olif Nai Simei anfani in ababat.

¹³Anmu'i atoni Lewi 10 anteni le anlek sin neu mepu nane esle': Nai Yehiel, Nai Azazya, Nai Nahat, Nai Asael, Nai Yerimot, Nai Yozabad, Nai Eliel, Nai Yismakhya, Nai Mahat, ma Nai Benaya. Ale lasi nane natetab sin natuin lekat lulut Kesel Nai Hizkia ma Ana' Fuat Knino Amnanut Nai Azarya.

¹⁴Nai Kore Nai Yimna anmone, atoni Lewi mese le anfani nakaf anbi Eno Naek Neno Saen anbi Ume UISNENO, anfe neune lasi sutais hen simo ale atnatas le natulu neu UISNENO, oke te anbati ale atnatas nane.

¹⁵Anbi kot-kot bian bale ale Ana' fuat knino natua anbine, atoni Lewi bian anbab Nai Kore sin le nane esle': Nai Eden, Nai Minyamin, Nai Yesua, Nai Semaya, Nai Amarya, ma Nai Sekhanya. Ale amnahat nane anbati namnes-nes anbi uf Lewi ok-oke he mnasi ka ai he munif ka natuin sin mepu mese-mese.

¹⁶Ale atoni le sin uan ton bo'tenu nekin sae, le napeni mepu tuthaes neno-neno anbi Ume UISNENO, anfe neu sin pa' mese-mese natuin sin mepu ma natuin sin pukan.

¹⁷Antui ale Ana' fuat knino natuin sin ume, ma atoni Lewi le sin uan ton 20 nekin sae antui sin natuin mepu ma sin pukan.

¹⁸Antui sin al-al sin nok sin anah ma sin fenai, ma bian anteni anbi sin ume nanan, natuin sin me he naloitan anbi ale tabu he nanaoba sin mepu mese-mese le anbeti nateta nalali sin neu UISNENO.

¹⁹Anbi ale Ana' fuat knino le natua anbi kot-kot le anlek sin neu Nai Harun in sufan sin, ai anbi ale mnela anhaumak kot-kot nane, anlek ameput-ameput hen bati ale mnahat nane neu ale atoni anbi Ana' fuat knino ume nanan, ma neu ale atoni le matui anbi uf Nai Lewi in sulat.

²⁰Kesel Nai Hizkia nanaoba lasi amneot, ma anmo'e lasi amnonot, le anhalin in UISNENO In nekan anbi Yehuda ok-oke.

²¹In nis, fun natuin ale sa' le in anmo'e neu Ume UISNENO ai he natuin ale plenat na'ko UISNENO, in nanaoba sin nok in nekan ok-oke ma nok in nekan amanekat neu in UISNENO.