Read Uab Meto 2 TAWARIKH 32 Bible Online

2 TAWARIKH 32 - Uab Meto bible

2 TAWARIKH 32

¹Leka Kesel Nai Hizkia anmoe natuin lasi-lasi le naton in lasi ki'at neu UISNENO, Nai Sanherib kesel Asyur nape' Yehuda. In anfun natef nan kot-kot mabaki lape ma anfe plenat neu in solalus sin he nati' nasik nani.

²Leka Nai Hizkia nahin nak Nai Sanherib he nape' Yerusalem,

³in nok ale in ameput sin ma in solalus nakaf sin nafek hen ek ale bale oe anbi kot kotin fun sin natenab he nati' atoni-atoni Asyur ka napeni fa oe leka sin anhaumak Yerusalem. Atoni amfau le'uf le anlelu sin hen tobe ale oe mata le ansai anpoi neu kot kotin.

⁵Oke te kesel nahelan kot fun naleko in baki lape, nahakeb ale el-fatu ma nahakeb baki lape bian anbi kot kotin. Nesi na'ko nane te in naleko baki lape le nahakeb anbi afu le anae anbi aon neno saen bale mna kot Yerusalem. In amsa naleko ma anmoe auni ma ben besi tika amfau le'uf.

⁶In naiti ale solalus nakaf hen fani nakaf neu ale atoni anbi kot nanan, ma anlelu sin nabuan anbi mnela eno naek kot matan. Oke te in nak neu sin nak,

⁷“Amhataniom nai ma miteb nai; kaisa hi mimtausan kesel Asyur ai in solalus sin. Amnokat le nok kit in matanin nane anae le'uf kun nesi na'ko sin.

⁸In anmu'i be'it ma matani atoni pah pinan, mes hit mu'i hit UISNENO hen bab ma anmaken anseka kit.” Leka to sin nen kesel in molok nane, to napeni be'it ma matani.

⁹Neno fauk namuni te leka Nai Sanherib nok in solalus sin fe anbi Lakhis, in ansonu haef neu Nai Hizkia ma to Yehuda anbi Yerusalem he natiaba han ba'an in nak,

¹⁰“Au Nai Sanherib kesel Asyur, au lomi he utoti ki nansa' hi fe mitua mibala anbi Yerusalem le anfun natef nalali in.

¹¹Nansa' Nai Hizkia ho mumolok mak ho UISNENO of nafetin ki na'ko hai kuasat? Kais ampalsai in, natuin in al anfuli ki. In of nafetin ki he hi mate anbi amnahas ma meno.

¹²In es nale'un naskuku bale-bale luli besa ma ale baki tulu neu UISNENO, oke te anlelu atoni Yehuda ma Yerusalem naluli ma nabes ma notu atu fomeni al anbi baki tulu mese.

¹³Ai hi ka mihin fa ka neu sa' le au moe ulali ma au amfenu anmoe nalali neu ale uf-uf bian? Ale uisneno teta uf bian fe ka nafetin nit fa in to na'ko kesel Asyur in kuasat!

¹⁴Sekau ka na'ko sin le afi sin anmoe lasi nane? Hi uisneno of ka nafetin nan ki fa!

¹⁵Kais mifetin hi kesel nane hen fuli ki ma namonob ki! Kais ampalsai in! Natuin katit fa uisneno teta uf me amsa le nabe'i he nafetin in to na'ko kuasat kesel Asyur. Namneo hi uisneno nane amsa of ka nafetin ki fa amsa!”

¹⁶Fe anmu'i uab ma molok bian anteni le kesel Asyur in haefenu sin namolok nasi'u UISNENO ma Nai Hizkia ate UISNENO nane.

¹⁷Kesel Asyur amsa antui sulat le anlaban UISNENO, Uisneno le atoni Israel naluli ma nabes neune. Sulat nane in hanan nak on i, “Ale uisneno teta na'ko ale uf bian ka nabe'i fa he nafetin in to sin na'ko au kuasat, onane amsa Uisneno Nai Hizkia ka nabe'i fa he nafetin in to na'ko au kuasat.”

¹⁸Haefen na'ko Asyur nane sin anhunun neki han anaek naton ale lasi nane anbi uab Ibrani he neki haka taus ma he naipu to Yerusalem sin nekan le sin anbi baki lape kot tunan, he nati' sin nasik nan kot nane nok manoe.

¹⁹Sin namolok antom Uisneno le Israel naluli ma nabes neune anbi Yerusalem, papmese onle le'u mahuma uisneno teta uf bian, le anmoe sin neki nimaf atoni pah pinan.

²⁰Es nane te Kesel Nai Hizkia ma Mafefa Knino Nai Yesaya Nai Amos anmone sin onen toti. Sin anbai ma antoti neu Uisneno he nati' anbab sin.

²¹Oke te UISNENO ansonu ahake neno tunan mese le namate ale solalus ma solalus nakaf na'ko Asyur nane. Kesel Asyur anfani neu in pah neki lasi mae anae le'uf. Anbi neno mese leka in fe anbi in uisneno teta ume, fauk-fauk na'ko in anah sin nem ma namate in neki suni.

²²Onle nane UISNENO nafetin Kesel Nai Hizkia ma tuafen anbi Yerusalem na'ko kuasat Nai Sanherib kesel Asyur, ma na'ko ale sin musu bian sin. UISNENO anfe neu sin monit tainine natuin pah-pah le anhaumak sin ka naunu fa sin.

²³Atoni namfau le nem neu Yerusalem neki fua tulu neu UISNENO ma ale atnatas neu Nai Hizkia, talantia na'ko neno nane ale uf antola in.

²⁴Oni anbi neno nane Kesel Nai Hizkia anmofu menas. In menas nane matani le'uf talantia al akle'o te in anmate. In onen toti, oke te UISNENO anfe takaf neune nak in of naleko.

²⁵Mes natuin in nanaebon, in ka nasaeba fa pules ma liatas neu UISNENO anmatom nok lasi aomina le UISNENO anfe nalali neune. Es nane te UISNENO nato'an Yehuda ma Yerusalem.

²⁶Mes namuni te Nai Hizkia ma to Yerusalem sin nabaun sin aokenu, es nane te leka Nai Hizkia fe anmoni kasat nane ka nanaoba fa.

²⁷Kesel Nai Hizkia in amu'in anae le'uf, ma ale atoni antola in. In anmoe ale ke'an he nabela ale in amaus sin esle': mnatu, noni muti, fatu-fatu maupa, ale atu fomeni, ben besi tika ma bale' maupa bian anteni.

²⁸In anmu'i ume-ume maus neu pah in afan onle: ane kase, tua mina mtasa, ma mina bub fua mina; ma o'of neu ale in bijae ma ale in bibi kase sin le amfau le'uf nane.

²⁹Ma anesi na'ko nane in nahakeb kot namfau amsa. Mu'if le Uisneno anfe neune anae le'uf kun.

³⁰Kesel Nai Hizkia nane in es an ek oe mata le ansai na'ko Gihon, ma nasaib nanate natuin nete oe sain anao nok nain apinan neu kot Yerusalem nanan. Ale sa' le Nai Hizkia anmoe neki alekot kun.

³¹Ma anbi neno haefen na'ko Babel sin nem he natoti in antom in naleko na'ko menas natuin lasi mkakan, UISNENO nafetin Nai Hizkia he in anmoe anmese kun, he nati' nabe'i ansu' in nekan.

³²Lasi nu'un bian antom Kesel Nai Hizkia, ma antom lasi in nek ma namnau UISNENO antui nalali sin anbi Sulat Mamata na'ko Uisneno Neu Mafefa Knino Nai Yesaya Nai Amos anmone, ma anbi Sulat Anaof ale Kesel Yehuda ma Israel.

³³Nai Hizkia nasaebon, oke te ansub in anbi bnapaf anbi bale naukel kesel sin. To Yehuda ma Yerusalem ok-oke sin natola in anae le'uf anbi tabu in nasaebon. In anmone Nai Manasye anfani kesel anseka in.