Read Uab Meto 2 TAWARIKH 34 Bible Online

2 TAWARIKH 34 - Uab Meto bible

2 TAWARIKH 34

¹Nai Yosia in uan ton 8 leka in anfani Kesel Yehuda, ma in naplenat ton 31 in a'lon anbi Yerusalem.

²In anmo'e lasi alekot le anhalin UISNENO In nekan; in natuin monit na'ko in amfenu Nai Daud, ma in natuin ale plenat Uisneno nok in nekan ok-oke.

³Leka Nai Yosia anfani kesel nan ton 8, anbi neno in fe munif kun, Nai Yosia in naluli ma nabes neu Uisneno le in amfenu Kesel Nai Daud naluli ma nabes neune. Ton ha namuni te in anfatan ma nale'un naskuku bale-bale luli besa neu uisneno teta, le'u mahuma-le'u mahuma uisneno teta Fenai Asyera, ma uisneno teta-uisneno teta bian anteni.

⁴Le'u mahuma-le'u mahuma ma ale uisneno teta nane Nai Yosia in ate sin nale'un naskuku nani sin, oke te askukun nane sin ankifun sin neu naukel atoni-atoni le natulu fua tulu neu ale uisneno teta nane. Ale baki fuat Baal ma ale baki fuat atu fomeni le anbi bale nane sin natseleb nani sin.

⁵Nalali te Nai Yosia in notu ale nuif na'ko ale Ana' fuat le antuthae ale uisneno teta nane anbi baki fuat nane in tunan. Nok lasi nane te in anmo'e Yehuda ma Yerusalem maota anteni he naluli ma nabes neu UISNENO.

⁶Lasi papmese onane amsa in nanaoba nani amsa anbi kot-kot ma bale-bale le nale'un nalali sin anbi pah Manasye, Efraim, ma Simeon ma anao neu Naftali aon bian a'li.

⁷Ale baki fuat ma ale le'u mahuma uisneno teta Fenai Asyera anbi Plenat A'li Nai Yosia natseleb nani sin oke te ale le'u mahuma sin ma baki fuat atu fomeni in nale'un naskuku nani sin. Nalali te Nai Yosia in anao anfani neu Yerusalem.

⁸Anbi ton bo'es am fanu Nai Yosia in ana' aplenat, leka in naknino Ume UISNENO ma pah ok-oke na'ko lasi fuat neu uisneno teta, in ansonu atoni 3 he naknino Ume UISNENO. Atoni tenu en nane es Nai Safan Nai Azalya anmone, Nai Maaseya kumlol Yerusalem, ma Nai Yoah Nai Yoahas anmone, atoni ameput anaet mese.

⁹Atoni-atoni Lewi le sin anpao Eno Ume UISNENO, sin nana'at noni le sin nabuab nalali neu Ana' Fuat Knino Amnanut Nai Hilkia. Noni nane na'ko atoni Efraim ma Manasye, ma na'ko to bian anteni anbi Plenat A'li ma na'ko to Yehuda, Benyamin ma Yerusalem.

¹⁰Oke te noni nane Ana' Fuat Knino Amnanut Nai Hilkia in nana'at anteni sin neu atoni tenu en le anfe nalali sin mepu hen panat mepu nakelo Ume UISNENO nane. Ma anesi na'ko nane te sin anfe noni nane

¹¹neu ale apakaet he apakae hau ma apakae fatu le mes sin ansos fatu ma hau he naleko ale ume maus le ale Kesel Yehuda anpolin sin talantia namle'u ok-oke.

¹²Atoni-atoni le anmepu mepu nane sin anmepu nok nek alekot. Atoni Lewi 4 es anfani nakaf neu sin: Nai Yahat ma Nai Obaja, na'ko ume Nai Merari, fun Nai Zakharia ma Nai Mesulam na'ko ume Nai Kehat. Atoni-atoni Lewi le sin al-al sin nabae nahin heo ma biola,

¹³anfe neu sin mepu hen panat mnaiti fatu ma hau, anfani nakaf neu ale ameput huma-huma, anmepu mepu tui sulat, ma anpanat eno.

¹⁴Leka sin napoitan noni buat nane na'ko bale le antao anbine, Nai Hilkia napeni Sulat Plenat UISNENO, fun ale plenat le Uisneno anfe neu Nai Musa.

¹⁵Nai Hilkia nak neu Nai Safan nak, “Au upeni ufani UISNENO In Sulat Plenat anbi Ume UISNENO,” oke te in anfe sulat nane neu Nai Safan.

¹⁶Nai Safan ansimo sulat nane oke te in nao neu kesel ma in nak, “Ale sa' le Usi ho muplenat nane hai minaoba milalien.

¹⁷Hai maiti milali noni le nabela sin anbi Ume UISNENO, ma hai mina'at milali sin neu ale ameput ma neu ale apao mepu sin.”

¹⁸Nalali te in namolok anteni nak, “Nai Hilkia anfe sulat i neu kau.” Oke te Nai Safan anso'i sulat nane neu kesel.

¹⁹Leka in nen sulat nane in hanan, kesel anpisu in bale pake natuin in nekan antu'.

²⁰Oke te kesel anfe plenat i neu Nai Hilkia, Nai Ahikam Nai Safan anmone, Nai Abdon Nai Mikha anmone, Nai Safan lultunis pah ma neu Nai Asaya solalus nakaf le anpanat kesel, nak,

²¹“Amnao nai mitoti UISNENO antom kau ma neu to le fe anbi Israel ma Yehuda antom a'an le anbi sulat i. UISNENO nato'an kit natuin hit amfenu ka nanaoba fa ale plenat le antui anbi in nanan.”

²²Fun Nai Hilkia, Nai Ahikam, Nai Abdon, Nai Safan ma Nai Asaya sin anao ma antoti fainekat na'ko fenai mese kanan bi Hulda. In Mafefa knino mese le natua anbi kuan fe'u anbi Yerusalem. In mone kanan Nai Salum Nai Tikwa anmone Nai Harhas upuf. In es anmepu ale bale pake anbi Ume UISNENO. Leka bi Hulda in nen ale uab,

²³in anlelu sin anfani neu kesel ma natiaba neune a'at i nak, “UISNENO, atoni Israel sin Uisneno le sin naluli ma nabes neune nakua a'an nak,

²⁴“Of Au fe kasat neu Yerusalem ma ale in tuafen eki ale sukat le matui anbi sulat nane le anso'i nalali neu kesel.

²⁵Sin nasaitan nalali Kau ma sin natulu fua tulu neu ale uisneno teta. Ale sa' le sin anmo'e nane nafena Au to'as. Au uto'an Yerusalem, ma Au to'as nane kan sanu nit fa.

²⁶Mes antom Kesel Nai Yosia, Au a'ak neune esle' i, UISNENO atoni Israel: Leka hom nen mulali sa' le matui anbi sulat nane,

²⁷ho mute'un ma mubaun ho aom anbi Au humak ma Au matak. Au sali ulali he fe kasat neu Yerusalem ma in tuafen, mes leka hom nen Au salit nane ho amkae ma ampisu ho bale pake sin anfani a'taka neu ho nekam nasusbon. Au nen ulali ho onen totis,

²⁸es nane te kasat neu Yerusalem of Au ka usanut ani fa leka fe ho amoni. Au of ufetin ko talantia ho musaebon nok halan ma aomina.’ ” Fun haefen nane sin anfani neu kesel ma sin natiaba a'an nane neu kesel.

²⁹Kesel Nai Yosia no'en nakaf Yehuda ma Yerusalem,

³⁰oke te in nok sin anao neu Ume UISNENO. Fun ale Ana' fuat knino, atoni Lewi ma to ok-oke he amamu'it ma amu'it sin anao nok kesel amsa. Anbi sin human ma sin matken ok-oke, anbi bale le anbeti nateta neu kesel, kesel anhake ma anso'i nok hanan anaek ale sulat fef bela le napeni anbi Ume UISNENO. Nalali te kesel anmo'e lasi manba'an nok UISNENO he na'ki neu In ma nanaoba nani nok nekan ok-oke ma nok smanan ok-oke ale aplenat ma In lekat lulut sin, ma nanokab lasi manba'an anbi UISNENO nok in to le matui anbi sulat nane.

³²In anlelu ale atoni Benyamin ma atoni bian le anbi Yerusalem he nati' sin anmo'e lasi manba'an ma na'ki neu ale lasi manba'an nane. Fun atoni Yerusalem sin na'ki ma natuin ale lekat lulut anbi lasi manba'an nane, fun lasi manba'an anbi sin nok sin amfenu sin Uisneno.

³³Uisneno teta-uisneno teta le neki manisit, le fe anmu'i anbi bale-bale pah natoni Israel, Kesel Nai Yosia in nale'un nani sin ok-oke. Oke te in anlelu in to he naluli ma nabes neu UISNENO, sin amfenu sin Uisneno. Es nane te leka Nai Yosia in fe anmoni, to na'ki nabalah neu UISNENO.