Read Uab Meto 2 TAWARIKH 35 Bible Online

2 TAWARIKH 35 - Uab Meto bible

2 TAWARIKH 35

¹Nalali te Nai Yosia naliatas Paskah anbi Yerusalem he naliatas UISNENO. Bibi kase neu neno naek nane anlolo anbi fun mese antam neno 14.

²Nai Yosia anbati mepu neu ale Ana' fuat knino le sin he nanaoba mepu anbi Ume UISNENO, ma in nak neu sin he nati' sin anmepu nok alekot.

³Atoni Lewi le anbeti nateta nalali sin neu UISNENO, ma le anfani anoina neu Israel sin napeni plenat i na'ko Nai Yosia nak, “Amtao Peti Fef Bela UISNENO knino anbi Ume UISNENO le Kesel Nai Salomo Nai Daud anmone nahakeb nane. Ka nabe'i fa hi mitnanib peti nane piut-piut anteni. Amtuthae hi UISNENO ma to Israel In nonot nai.

⁴Miloitan ambi Ume UISNENO natuin hi pukan mese-mese, anmatom nok mepu le Kesel Nai Daud ma in anmone Usikesel Nai Salomo anbati neu ki.

⁵Amlek hi pukan ameput sin maakatuin onle nane talantia anmu'i piut na'ko ki le anbab ale pukan to Israel anbi Ume UISNENO.

⁶Hi mes amlolo bibi kase neu Neno Naek Paskah. Es nane te miloitan hi aom nai he nati' maota anbi lasi luli besa neu UISNENO, ma miloitan ale fua tulu nai neu UISNENO, he nati' nok nane te to Israel bian nabe'i nanaoba sa' le UISNENO anfe neu Nai Musa.”

⁷He nati' to Israel le sin nabua anbi Neno Naek Paskah nane nabe'i natulu fua tulu Paskah, Kesel Nai Yosia anfe na'ko in mu'it kun bibi kase 30.000, bibi kase tipu ma bibi tipu, ma bijae keso 3.000.

⁸Nai Yosia in ameput sin amsa anfe tnatas neu ale Ana' fuat knino, ma atoni Lewi na'ko to ok-oke. Ameput-ameput le anfe neu sin sutais neu Ume UISNENO, es Ana' Fuat Knino Amnanut Nai Hilkia, Nai Zakharia, ma Nai Yehiel, sin tenu sin anfe bibi kase tipu 2.600 ma bibi tipu, ma bijae keso 300 neu ale Ana' fuat knino neu he natulu sin anbi neno naek nane.

⁹Ale nakaf atoni Lewi, sin le nane es: Nai Konanya, Nai Semaya ma Nai Netaneel in biaf, Nai Hasabya, Nai Yeiel, ma Nai Yozabad, sin anfe bibi kase tipu 5.000, bibi tipu ma bijae keso 500 neu atoni Lewi he natulu sin anbi neno naek nane.

¹⁰Leka sin naloitan nalali ale nane ok-oke neu he naliatas Neno Naek Paskah, ale Ana' fuat knino ma pukan-pukan na'ko atoni Lewi sin anhake anbi sin balken mese-mese onle kesel anlek nalali.

¹¹Oke te sin anlolo mu'it neu he naliatas Neno Naek Paskah; atoni Lewi anpu' mu'it sin pasu ma ale Ana' fuat knino sin anpisil na' na'ko mu'it nane neu baki tulu in fafon.

¹²Fun pukan ume mese-mese le sin nabua anbi nane sin napeni mu'it mese na'ko mu'it-mu'it le of natulu sin on fua tulu mnotu. Nok nane te sin nabe'i natulu fua tulu natuin lekat lulut le matui anbi Sulat Plenat Nai Musa.

¹³Oke te atoni-atoni Lewi sin anse'i fua tulu Paskah nane anbi ai, anmatom nok lekat lulut, ma nahan ale fua tulu le anbeti nateta sin anbi tasu in nanan, na'i ma tasu naek, nalali te anbati sisi nane lab-lab neu to sin.

¹⁴Oke onane te atoni Lewi sin naloitan pa' neu sin aoken ma neu ale Ana' fuat knino na'ko Nai Harun in sufan sin. Natuin, talantia anfai ale Ana' fuat knino nane sin anmepu piut natulu ale mu'it on fua tulu mnotu, ma notu baluf na'ko ale fua tulu nane.

¹⁵Ale ahin sit heo ma biola na'ko ume Nai Asaf anbi uf Lewi sin anhake anbi bale tuthae le Kesel Nai Daud anlek nalali neu sin. Sin kankenu esle' i: Nai Asaf, Nai Heman, ma Nai Yedutun, Mafefa knino mese le in anmepu neu kesel. Ale apaot le anpao eno-eno naek ka nabe'i fa he nasaitan sin balken, natuin nabe'i sin naliatas Neno Naek Paskah anbi sin bale nok tuntakus atoni Lewi bian sin.

¹⁶Anbi neno nane sin anmo'e nani ale sa'-sa' le Kesel Nai Yosia anlek nani neu sin neu he naliatas Neno Naek Paskah, nok ale fua tulu anbi baki tulu.

¹⁷Neno hitu in a'lon to Israel sin nabua anbi nane naliatas Neno Naek Paskah ma Tolas Utunu' Kan Pake fa Lalu haef.

¹⁸Tolas Paskah onle nane ka naliatas fa na'ko afi batan Mafefa Knino Nai Samuel fe anmoni. Katit fa kesel mese amsa na'ko ale kesel le nahunun in he naliatas Neno Naek Paskah papmese onle Nai Yosia naliatas,

¹⁹leka Nai Yosia in ana' aplenat ton bo'es am fanu, kesel nane in naliatas nani nok ale Ana' fuat knino, atoni Lewi, to Yehuda ma Israel, ma tuafen Yerusalem.

²⁰Leka Kesel Nai Yosia in nanaoba nalali ale nane ok-oke neu Ume UISNENO; Nai Nekho Kesel Mesir in neki in solalus sin hen maken anbi Karkemis anhaumak Noe Efrat. Nai Yosia nahelnon hen ake in,

²¹mes Nai Nekho ansonu a'at i neu Nai Yosia nak, “Makenat i kan tom fa neu ko, Kesel Yehuda! Au ka aum fa neu he laban ko, mes au he laban au musu-musu sin, ma Uisneno anlelu kau he unaoba lasi nane nok lab-lab. Uisneno anhake nok kau, es nane te kais hom eka In, natuin leka hom eka In onane te In mes nale'un ko.”

²²Mes Nai Yosia nahelnon neu hen laban in, ma in kan lomi fa he natuin sa' le Uisneno nakua a'an neune nanete natuin Kesel Nai Nekho. Nai Yosia nabaina in human oke te in antam neu makenat anbi mnela Megido.

²³Anbi makenat nane aklaoten naklao antoman Kesel Nai Yosia. Oke te in nak neu in ate-ate sin he neki in anpoi na'ko makenat in nanan natuin in napeni papa' mafena.

²⁴Sin naiti in na'ko in aklet ma natnanib in neu aklet bian le anbi nane, nalali te neki anao neu Yerusalem. In nasaebon anbi nane ma ansub in anbi kesel sin naukel. To ok-oke na'ko Yehuda ma Yerusalem sin ankulu ma ankae neu in nasaebon.

²⁵Mafefa Knino Nai Yeremia antui sit kulut kaet mese neu Kesel Nai Yosia. Ale asit sin atoni ma bife, sin anpake sit nane anbi Israel talantia neno i anbi neno mnaut kulut kaet neu Nai Yosia. Sit nane sin natam nalali anbi sit-sit kulut kaet le sin nabuab nani.

²⁶Lasi nu'un bian antom Nai Yosia, antom lasi in nek ma namnau UISNENO, ma in lasi ki'at neu UISNENO In plenat sin,

²⁷fun, antom in monin ok-oke na'ko ahunut talantia amsoput antui nalali sin anbi Sulat Anaof na'ko ale Kesel Israel ma Yehuda.