Read Uab Meto 2 TAWARIKH 36 Bible Online

2 TAWARIKH 36 - Uab Meto bible

2 TAWARIKH 36

¹To Yehuda sin anbeti ma naiti Nai Yoahas anfani kesel anbi Yerusalem anseka Nai Yosia, in amaf,

²Nai Yoahas in uan ton 23 leka in anfani Kesel Yehuda, ma in naplenat funan tenu anbi Yerusalem.

³Nai Nekho Kesel Mesir anheke nan in ma neki Nai Yoahas anao neu Mesir, oke te in anlelu Yehuda anbaen noni tnatas noni muti kilo 3.400 ma mnatu kilo 34. Nalali te in naiti Nai Elyakim Nai Yoahas in biaf anfani kesel, ma nabaina in kanan Elyakim anfani Yoyakim. Nalali te naiti neki Nai Yoahas anao neu Mesir.

⁵Nai Yoyakim in uan ton 25 leka in anfani Kesel Yehuda, ma in ana' aplenat ton 11 anbi Yerusalem. In nasanab neu in UISNENO.

⁶Leka Nebukadnezar kesel Babel nasik nan Yehuda, in anheke Nai Yoyakim ma neki anao nok makolen besi neu Babel.

⁷Bale maupa bian anbi Ume UISNENO Nebukadnezar naiti neki sin ma antao sin anbi in sonaf anbi Babel.

⁸Lasi nu'un bian antom Nai Yoyakim, fun ale in taos mo'et amanisit sin ma ale in lasi le'uf bian antui nalali sin anbi Sulat Anaof na'ko ale Kesel Israel ma Yehuda. In anmone Nai Yoyakin anfani kesel anseka in.

⁹Nai Yoyakin in uan ton 18 leka in anfani Kesel Yehuda, ma in naplenat funan 3 ma neno 10 anbi Yerusalem. In nasanab neu UISNENO amsa.

¹⁰Anbi ton namsopu, Kesel Nai Nebukadnezar naiti neki Nai Yoyakin anao neu Babel onle nis nan in anbi makenat, ma ale bale maupa anbi Ume UISNENO neki sin amsa. Nalali te Nai Nebukadnezar naiti Nai Zedekia, Nai Yoyakin in babaf, anfani kesel neu Yehuda ma Yerusalem.

¹¹Nai Zedekia in uan ton 21 leka in anfani Kesel Yehuda. In naplenat ton 11 a'lon anbi Yerusalem.

¹²In nasanab neu in UISNENO amsa. In kan lomi fa he nabaun in aon ma in ka natuin fa a'an na'ko UISNENO le Mafefa Knino Nai Yeremia natiaba neune.

¹³Nebukadnezar naseke nalali Nai Zedekia hen sup anbi Uisneno kanan nak in of na'ki neu Nai Nebukadnezar. Mes namuni te Nai Zedekia anlaban Nai Nebukadnezar. Nai Zedekia in ana' nakfatu neu UISNENO, atoni Israel sin Uisneno. In kan lomi fa he nasaitan in sanat-sanat sin ma kan lomi fa he nate'un neu UISNENO.

¹⁴Anesi na'ko nane, ale nakaf Yehuda sin, ale Ana' fuat knino sin, ma to, sin nale'un Ume UISNENO le UISNENO anbeti nateta nalali neu In aon kun, natuin sin nok anbi fuat neu uisneno teta ma sin natuin monit asanat na'ko uf-uf le anfun natef nan sin.

¹⁵UISNENO, sin amfenu sin Uisneno, ansonu in haef sin piut-piut he namnauba In nonot, natuin In nek namnau sin ma In nek namnau In Ume.

¹⁶Mes sin nasi'u Uisneno In haefen nane, ma anmanis In Mafefa knino sin ma sin kan sian fa sin uab sin molok sin. Ma amsoput nane UISNENO In nato' anae le'uf neu sin talantia kan mu'i fa lanan anteni neu sin he nafetnok na'ko In kasat nane.

¹⁷UISNENO nafena kesel Babel in nekan he nati' nape' sin. Kesel nane namate atoni munif Yehuda sin, fun sin le anbi Ume UISNENO. In ka nek ma namnau fa atoni mese amsa, mnasi ai he munif, atoni ai bife, amenat ai aomina. Uisneno nana'at sin ok-oke neu kesel Babel.

¹⁸Ale maus Ume UISNENO ma bale maupa sin le maosa, fun kesel in maus sin amsa ma ale in ameput sin ini, kesel Babel nasik nan sin ok-oke oke te neki sin anao neu Babel.

¹⁹In anpukai baki lape Yerusalem, ma notu kot nane, Ume UISNENO amsa ma sonaf ok-oke nok ale bale maupa sin le fe anbi sonaf nane.

²⁰To le nafetnon na'ko lasi nane naiti neki sin anao neu Babel. Anbi nane sin anfani ate neu in ma ate neu in sufan sin talantia batan kesel Persia ana' aplenat.

²¹Onle nane lasi nane anbol onle a'an UISNENO naton nalali nanete natuin Nai Yeremia nak pah nane of anhufui ton 70 in a'lon anseka ton-ton Snasat le sin ka natuin nani fa.

²²Anbi ton ahunut Nai Kores, kesel Persia, in ana' aplenat, UISNENO nanaoba In a'an le In naton nalali nanete natuin Mafefa Knino Nai Yeremia. UISNENO es nafena Kesel Nai Kores nekan he napoitan plenat mese le anso'i anbi in plenat ok-oke.

²³In hanan nane nak on i: “Nai Kores, kesel Persia, in aplenat esle' i! UISNENO, akuasat neno tunan In nasaeba kau fani kesel neu pah pinan ok-oke, anlek kau he uhakeb ume mese neu In anbi Yerusalem anbi pah Yehuda. Es nane te, hi al-al ki oke le amfani nonot Uisneno hi mes amnao amfani meu bale nane. So nati' hi UISNENO In naneo ma nahafo ki.”