Read Uab Meto 2 TAWARIKH 6 Bible Online

2 TAWARIKH 6 - Uab Meto bible

2 TAWARIKH 6

¹Kesel Nai Salomo in onen toti nak, “Koi UISNENO, Hom lomi amnesi he mutua anbi nope mesokan in nanan.

²Fun au uhakeb neu Ko ume alekot ma amasat, he Ho mutua ambine talan te nabal-bal.”

³Leka in onen toti nalali te, kesel naklel'on neu to ok-oke le fe sin anhake anbi nane, oke te in antoti tetus Uisneno neu sin.

⁴In namolok nak, “UISNENO afi anmanba'an nalali nok au ama Nai Daud nak on i, ‘Na'ko tabu Au eki Au to anpoi na'ko Mesir talan te neno i, katit fa kot mese anbi Israel amsa le Au beti anfani bale neu he nahakab ume hen fani bale luli besa neu Kau, ma Au ka beti fa atoni mese amsa he naplenat Au nonot Israel. Mes neno i Au beti Yerusalem anfani bale luli besa neu Kau. Ma ho, Daud, Au beti ko he muplenat Au nonot.’ Pules ma liatas neu UISNENO atoni Israel sin Uisneno le In nanokab nalali In lasi manba'an nane!”

⁷Nai Salomo in namolok anteni nak, “Au ama Nai Daud anmu'i nalali salit he nahakeb ume bale luli besa neu UISNENO atoni Israel sin Uisneno.

⁸Mes UISNENO nakua a'an neune nak, ‘Ho tenab nane leko.

⁹Mes, ka ho fa, somak ho anmone es of nahakeb Au ume nanae.’

¹⁰Tabu le i UISNENO nanokab nalali In lasi manba'an nane. Au fani ulali Kesel Israel ma au seka au ama, ma au uhakeb ulali ume amsa ma anfani bale luli besa neu UISNENO, atoni Israel sin Uisneno.

¹¹Anbi Ume UISNENO nane au uloitan ma ubalab ulali bale neu Peti Fef Bela le matua nok fatu manba'an anbi UISNENO nok nonot Israel.”

¹²Nai Salomo anmo'e baki tulu niti molo mese anbi po'an Ume UISNENO in atnanan. Amnanun ma menuan meter 2 ma centi bo'nua, ma amnanun nekin sae meter mese ma centi bo'tenu. Anbi to sin matan le nabua anbi nane, Nai Salomo ansae neu baki mnanu nane, ma anhake anbaina neu baki tulu. Ale atoni sin nit in ok-oke. Nalali te in anli'tu, ma na'aiti in niman nua sin ma antopan sin neu neno tunan ma in onen toti nak,

¹⁴“Koi UISNENO, atoni Israel sin Uisneno! Anbi neno tunan ai anbi pah pinan amsa katit fa es on Ho! Ho munokab Ho lasi manba'an ma mulile Ho manekam neu Ho nonot sin le na'ki ma natuin nok sin nekan ok-oke neu Ko.

¹⁵Ho munokab mulali Ho lasi manba'an neu au ama Nai Daud. Sa' le Hom manba'an le nane neno i Ho munokab mulali.

¹⁶Ho amsa amba'an mulali neu au ama mak leka in sanut mofut sin namneo-namneo natuin Au plenat on in, onane te es na'ko in sufan of naplenat on kesel anbi Israel talantia nabal-bal. Es nane te, koi UISNENO atoni Israel sin Uisneno, munokab nai amsa ale sa' le Hom ba'an mulali neu au ama Nai Daud, Ho ate nane.

¹⁸Mes, koi Uisneno, namneo Hom lomi ka he mutua ambi pah pinan i mok atoni pah pinan ka? Neno tunan in menuan ok-oke amsa kan tia fa neu Ko, sa' anteni ume luli besa le au uhakeb le i!

¹⁹Koi UISNENO, au Uisneno, Ho ate es kau! Mes so nati' amnen fa au onen totis, ma amsimo fa au sananet.

²⁰So nati' Ho muneo ma muhafo ume i anbi manas ma anbi fai nok le Hom beti mulali on bale luli besa neu Ko. So nati' na'ko Ho bale amnanut anbi sonaf neno tunan Hom nen hai onen totis ma amsako au sanat ma nonot Israel, Ho nonot nane sin sanat leka hai aim meu Ko anbi ume i ma am onen toti neu Ko.

²²Leka es nasanab neu in biaf ma neki in neu Ho baki tulu anbi Ho Ume i neu hen sup nak in ka nasanab fa,

²³koi UISNENO, so nati' Hom nen in anbi sonaf neno tunan ma amlefi Ho ate-ate i sin lasi. Musanab sin le nasanab ma mufetin sin le ka nasanab fa.

²⁴Leka ale musu anbe'u Ho nonot Israel natuin sin nasanab, oke te sin an au sin sanat ma naluli nabes anteni neu Ko on UISNENO, nalali te sin nem neu Ho Ume i ma sin onen toti he Hom sako sin sanat,

²⁵so nati' Hom nen sin na'ko sonaf neno tunan. So nati' Hom sako nonot i sin sanat, ma meki sin anfani neu pah le Hom fe mulali neu sin ma neu sin amaf sin.

²⁶Leka Ho nonot sin nasanab neu Ko ma Hom fe neu sin kasat fun kan fe neu sin fa ulan, oke te nate'un na'ko sin sanat ma naluli nabes neu Ko on UISNENO, nalali te sin nem neu Ko anbi ume i ma sin onen toti neu Ko,

²⁷koi UISNENO anbi sonaf neno tunan, so nati' Hom nen sin onen totis. So nati' Ho munoina sin he nati' sin anmo'e sa' le namneo. Oke onane te, koi UISNENO, musanut ulan neu Ho pah i, pah le Hom fe neu Ho nonot sin hen fani sin bale bela talantia nabal-bal.

²⁸Leka anmu'i amnahas ai menas anbi pah le i, ai manas maputu nale'un ale luat, pena, ane no molo natuin men luat, ai fokat ma a'kelo nale'un luat, ai leka musu nale'un Ho nonot, ai leka menas antoman Ho nonot,

²⁹so nati' Hom nen sin onen totis. Kalu leka anmu'i es na'ko Ho nonot le nok nek susal in onen toti neu Ko ma antopan in niman an ali Ho Ume le i,

³⁰so nati' Ho ambi Ho bale amnanut anbi sonaf neno tunan Hom nen ma am au sin sanat. Al Ho kum es Ho muhin nekaf atoni pah pinan. Es nane te so nati' amseunbanin es-es anmatom nok in taos in mo'et,

³¹he nati' Ho to namtausan Ko ma natuin Ko piut-piut leka sin fe natua anbi pah le Hom fe hai amaf sin.

³²Leka anao amnemat mese na'ko pah a'lot in nen Ho kanam anaet ma Ho be'im Ho matanim, ma Hom lomi hem tuntaku ma ambab, oke te in nem anbi Ho Ume i in nanan ma antoti neu Ko,

³³so nati' na'ko Ho bale amnanut anbi sonaf neno tunan Hom nen in onen totis ma amsimo in han totis. Nok nane ale uf-uf anbi pah pinan ok-oke sin nahin Ko ma namtausan Ko on Ho nonot Israel. Sin of nahin nak ume le au uhakeb le i anfani bale luli besa neu Ko.

³⁴Leka Ho muplenat Ho to neu he nao hen maken anlaban musu, oke te sin he anbi me amsa, sin anbaina an ali neu Ho kot le Hom beti i ma an onen an ali neu Ume i le au uhakeb ulali neu Ko,

³⁵so nati' na'ko sonaf neno tunan Hom nen sin onen totis nane, ma amfe lasi mnisat neu sin.

³⁶Leka Ho nonot nasanab neu Ko — fun namneo katit fa esle' ka nasanab fa — oke te natuin Ho to'as Ho mufetin sin ma musu nis ma anbe'u sin ma neki sin neu pah a'lot ai apaumakat,

³⁷so nati' Hom nen sin onen totis. Kalu anbi pah nane sin nasaitan ale sin sanat, ma sin onen toti neu Ko ma sin an au nak sin anmo'e nalali sanat ma amle'ut, so nati' Hom nen sin onen totis, koi UISNENO.

³⁸Kalu anbi pah nane nok sin nekan oke ma namneo-namneo nasaitan ale sin sanat-sanat sin, ma sin onen toti neu Ko ma anbaina neu pah i le Hom fe neu hai amaf sin, anbaina neu kot le Hom beti mulali ma ume luli besa le au uhakeb ulali neu Ko i,

³⁹fun na'ko Ho bale amnanut anbi sonaf neno tunan so nati' Hom nen sin onen totis ma amnek ma mumnau sin. Amsako Ho nonot sin sanat ok-oke nai.

⁴⁰Es nane te, koi au UISNENO, amkiso kai fa ma amnen fa ale hai onen totis le hai misaeba neu Ko na'ko bale i.

⁴¹Amfen nai esle' i, koi UISNENO. Ma Ho mok Ho Peti Fef Bela le anfani ataka neu Ho kuasat nane so nati' Hom tam meu Ho Ume i ma mutua ambi i talantia nabal-bal. Amfe tetus neu ale mepu Ho Ana' fuat knino sin, ma so nati' Ho nonot napeni ua alekot natuin Ho lasi alekot neu sin.

⁴²UISNENO kais Hom tite kesel le Hom beti mulali i. Mumnau nai Ho manekam neu Ho ate Nai Daud.”