Read Uab Meto 2 TAWARIKH 7 Bible Online

2 TAWARIKH 7 - Uab Meto bible

2 TAWARIKH 7

¹Leka Kesel Nai Salomo in onen toti nalali te, ai ansanu na'ko neno tunan ma notu nani ale fua tulu le natulu sin neu UISNENO. Oke te UISNENO In pinan nahenu Ume UISNENO nane,

²talantia ale Ana' fuat knino sin ka nabe'i fa hen tam neu Ume nane.

³Leka to Israel sin nit ai ansanu na'ko neno tunan ma UISNENO In pinan nahenu Ume UISNENO, sin anbentok neu nain oke te sin naluli nabes ma naliatas Uisneno, natuin In leko kun ma In manekan nane nabal-bal talantia nabal-bal.

⁴Oke te Kesel Nai Salomo ma ale to le nabua anbi nane sin natulu fua tulu neu UISNENO.

⁵Antom fua tulu halan Nai Salomo natulu bijae 22.000 ma bibi kase 120.000. Onle nane kesel ma ale to ok-oke anmo'e lasi luli besa nana'at ume luli besa nane neu UISNENO.

⁶Ale Ana' fuat knino sin anhake anbi bale le anlek nani neu sin; anmabaina nok atoni Lewi le naliatas UISNENO neki a'heo ma biola ma bian anteni le Kesel Nai Daud anmo'e sin, ma ansi sit nak, “In Manekan Nabal-bal talantia Nabal-bal!” anmatom nok lekat lulut Nai Daud. Ale Ana' fuat knino sin anfu to'is ma to ok-oke sin anhake.

⁷Oke te Nai Salomo nana'at po'an atnanan Ume UISNENO nane in matan neu UISNENO. Nalali te in natulu anbi nane fua tulu mnotu, fua tulu ane kase ma mu'it in balun neu fua tulu halan. In natulu ale fua tulu nane ok-oke anbi nane natuin baki tulu niti molo le in anmo'e nalali nane na'bau kun neu ale fua tulu ok-oke.

⁸Nai Salomo ma ale nonot Israel ok-oke sin naliatas Neno Naek La' Hau No' neno hitu. Atoni amfau le'uf le nabua neu neno naek nane. Sin nem na'ko pah Lanan Hamat anbi aon bian a'li talantia nakat nok Mesir anbi aon bian a'ne'u.

⁹Neno hitu sin nabua neu lasi luli besa namepan ma naki'ab baki tulu UISNENO, nalali te neno hitu anteni neu Neno Naek La' Hau No'. Anbi neno amsoput sin anmo'e fesat amsoput,

¹⁰ma noka fa anbi fun hitu neno 23, Nai Salomo anlelu ale to ok-oke sin neki anfani. Sin namlile ma namoke neu ale lasi alekot le UISNENO anmo'e neu uf Israel In nonot, neu Nai Daud ma neu Nai Salomo.

¹¹Leka Nai Salomo anmepu nalali Ume UISNENO ma kesel in sonaf anmatom nok in salit,

¹²UISNENO nalil'on anteni neune anbi fai. UISNENO nakua a'an neune nak, “Au nen ulali ho onen totis ma Au simo ume i on bale teta mese he mitulu fua tulu neu Kau.

¹³Leka Au ka usanut fa ulan ai Au sonu a'fokat he neku nani pah in afan ai Au fe lasi menas neu Au to,

¹⁴oke te Au nonot sin le sin anpake Au kanak nane sin na'baun sin aoken, ma sin onen toti ma sin nem neu Kau ma nasaitan sin taos sin mo'et amle'ut, onane te na'ko sonaf neno tunan of Au nen sin onen totis. Of Au sako ale sin sanat sin ma Au mo'e sin pah anfani alekot anfani.

¹⁵Of Au kiso piut Au Ume i ma Au lomi he nen sin onen totis le sin nasaeb na'ko bale i.

¹⁶Ale lasi nane of Au mo'e ani natuin bale i Au beti ulali ma Au uteta ani anfani bale luli besa neu Kau talantia nabal-bal. Of Au panat ma pao ma uneo ma umafo ani anbi ale tabu.

¹⁷Kalu ho, on ho ama Nai Daud, ho moni mutuin Au lomik ma hom tao mutuin Au plenat sin le Au fe ani sin neu ko,

¹⁸onane te of Au unokab ani Au lasi manba'an neu ho ama Nai Daud nak of anmu'i na'ko in sufan le anfani kesel piut anbi Israel.

¹⁹Mes kalu ho ma ho to him tanhai ale Au plenat ma Au a'ak, ma hi miluli mibes neu ale uisneno teta,

²⁰onane te of Au upoitan ki na'ko pah le Au fe ulali neu ki. Au amsa of usaitan ume i le Au mutetab mulali hen fani bale luli besa neu Kau. Ume i of nasi'u ma anmanis in anbi me-me.

²¹Ume luli besa i tabu i natola nisan, mes anbi neno nane es-es le anao nok bale nane of sin namkak leka sin ankiso in. Sin of nak, ‘Nansa' UISNENO anmo'e onane neu pah ma ume i?’

²²Oke te ataes mes natae nak, ‘Natuin sin nasaitan UISNENO, le neki sin amaf sin anpoi na'ko Mesir. Sin naluli nabes ma anmantaen he na'ki nabalah neu ale uisneno teta sin. Es nane te UISNENO anfe lasi amle'ut i neu sin.’ ”