Read Uab Meto 2 TAWARIKH 8 Bible Online

2 TAWARIKH 8 - Uab Meto bible

2 TAWARIKH 8

¹Nai Salomo in nahakeb Ume UISNENO ma kesel in sonaf anbi ton bo'nua in a'lon.

²Kot-kot le Kesel Nai Hiram anfe neune in nahakeb nafani sin, oke te anlelu atoni Israel ma natua anbi nane.

³In nasik nan pah Hamat ma Zoba

⁴ma in namepan kot Tadmor anbi mnela snaen, oke te nahakeb nafani ma ale kot bale bukae anbi Hamat.

⁵Kot Bet-Horon-Fafon ma Bet-Horon-Pinan in nahakeb nafani sin anfani kot mabaki lape nok eno naek makusat.

⁶In nahakeb nafani kot Baalat amsa ma ale kot bale bukae, ma kot-kot aklet sin ma in bikase sin anhake anbine. Ale in salit he nafena anbi Yerusalem, Libanon ma ale in pah plenat ok-oke in anmepu nalali sin.

⁷Ale sanut mofut uf Kanaan le atoni Israel ka namate nalali fa sin leka sin antoko pah nane, Nai Salomo naplenat sin hen mepu nok aseke. Sin le nane atoni Het, Amori, Feris, Hewi ma Yebus. Sin sanut mofut fe anfani ate talantia neno i.

⁹Kan lenu fa atoni Israel hen mepu nok aseke; mes anfe neu sin mepu on solalus, on solalus nakaf, solalus nakaf aklet makenat, ma solalus asae bikase.

¹⁰Ameput natun nua am bo'nim anfe neu sin sutais he sin panat atoni-atoni le sin anmepu nok aseke anbi bale-bale le nafena mepu.

¹¹Nai Salomo natnanib in fenai, Kesel Mesir in anfetnai, na'ko Kot Nai Daud neu ume le in nahakeb neune. Natuin Nai Salomo natenab nak, “Au fenai ka nabe'i fa he natua anbi Nai Daud in sonaf, Kesel Israel, natuin ale bale' le afi Peti Fef Bela antao anbine nane bale' knino kun.”

¹²Nai Salomo natulu fua tulu mnotu neu UISNENO anbi baki tulu le in nahakeb anbi Ume UISNENO matan.

¹³Ale fua tulu nane in natulu natuin Plenat Nai Musa neu neno naek mese-mese: Neno Snasat, Neno Naek Fun Fe'u ma neno naek tenu anbi ton mese, esle' Neno Naek Utunu' Kan Pake fa Lalu haef, Neno Naek Sekit, ma Neno Naek La' Hau No'.

¹⁴Matom nok lekat lulut in amaf Nai Daud, Nai Salomo anlek mepu neno-neno neu ale Ana' fuat knino ma neu atoni Lewi le mes hen si sit pules neu UISNENO ma anbab ale Ana' fuat knino he nanaob ale lasi luli besa. Onane amsa ale apaot anbi Ume UISNENO anbati sin anbi pukan-pukan neu eno naek mese-mese, anmatom nok lekat lulut Nai Daud ate Uisneno.

¹⁵Ale lekat lulut Nai Daud neu ale Ana' fuat knino ma atoni Lewi neu ale ume-ume maus ma lasi bian-bian anteni, in natuin nani nok alekot.

¹⁶Fun Nai Salomo in mepu le in natenab nani he nahakeb Ume UISNENO in nasopu nani nok alekot na'ko ume in sukin talantia mepu ume nane namsopu ok-oke.

¹⁷Oke te Nai Salomo in anao neu Ezion-Geber ma anao neu Elot, kot-kot anbi Tasi Akaba ninen anbi pah Edom bale bnao anhake anbine.

¹⁸Kesel Nai Hiram ansonu neu Nai Salomo ale bnao le Nai Hiram in ate sin neki nok ale ameput mahine anbi bnao. Sin anlak tasi anao neu pah Ofir nok Nai Salomo in ate sin ma sin naiti mnatu na'ko nane mnatu kilogram 15.000 oke te sin neki neu Nai Salomo.