Read Uab Meto EZRA 1 Bible Online

EZRA 1 - Uab Meto bible

EZRA 1

¹Anbi ton ahunut Nai Kores kesel Persia in ana' aplenat, UISNENO nanaoba In a'an le In natiab nalali nao nok Mafefa Knino Nai Yeremia. UISNENO nafena Nai Kores in nekan he napoitan plenat mese le hen so'i nani anbi in pah ok-oke. Plenat nane nahan nak on i:

²“Nai Kores, kesel Persia in aplenat esle' i. UISNENO, Akuasat neno tunan ma pah pinan In naiti nalali kau fani kesel neu pah pinan ok-oke, ma anlenu kau he uhakeb ume mese neu In anbi Yerusalem anbi pah Yehuda.

³So nati' Uisneno naneo ma nahafo ki ok-oke le hi amfani In to. Hi mes hem fani meu Yerusalem ma mifena mifani Ume UISNENO, Israel sin Uisneno, le natua anbi Yerusalem.

⁴Leka anmu'i atoni mese na'ko In nonot anbi bale mapolin i antoti tuntakus neu hen fani, onane te ale ume toko le natnoe nokan mes hen fe tuntakus neu atoni nane. Sin mes hen fe neune noni muti ma mnatu, bukae anbi lanan ma mu'it le he nasaeba baut, atnatas-atnatas bian amsa neu Ume UISNENO anbi Yerusalem.”

⁵Nalali te nakaf na'ko uf Yehuda ma Benyamin, ale Ana' fuat knino ma atoni Lewi sin, ma atoni mese-mese le Uisneno nafena in nekan, sin naloitan ma nabalab hen fani neu Yerusalem ma nahakeb nafani Ume UISNENO.

⁶Ale ume toko le natnoe nok sin antuntaku sin fun anfe neu sin ale bale' onle ale bale pake noni muti ma mnatu, bukae anbi lanan, mu'it neu he nasaeba baut, amaus bian anteni ma ale atnatas neu Ume UISNENO.

⁷Nai Kores napoitan ale a'mako ma ale klas mninut le afi anpake sin anbi Ume UISNENO nanan anbi Yerusalem. Ale bale' nane afi Kesel Nai Nebukadnezar in naiti nalali sin ma antao sin anbi ume le'u in uisneno teta sin.

⁸Nai Kores nana'at mepu ale amaus nane neu Nai Mitredat, nakaf ana' amaus anbi pah in nanan. Nalali te Nai Mitredat anmo'e sulat amaus na'ko ale bale' nane neu Nai Sesbazar, Kumlol Yehuda.

⁹Sin amfaukenu onle i: mako-mako mnatu neu luli besa fua tulu — 30 mako-mako noni muti neu luli besa fua tulu — 1.000 mako-mako bian anteni — 29 mako-mako ana' na'ko mnatu — 30 mako-mako ana' na'ko noni muti — 410 bale bian anteni — 1.000

¹¹Anso'i sin ok-oke 5.400 nane esle' klas matu ma noni muti ma bale' bian anteni. Ale bale' nane ok-oke Nai Sesbazar in neki nani sin leka in ma atoni mapolin bian anfen na'ko Babel ma sin anao neu Yerusalem.