Read Uab Meto EZRA 10 Bible Online

EZRA 10 - Uab Meto bible

EZRA 10

¹Leka Nai Ezra fe an onen toti ma ankae nok ma an au sanat anbi Ume UISNENO matan, atoni Israel amfau le'uf le sin nem ma nabua, leko atoni, ma bife ma li'ana nok. Sin anfun natef nan in ma sin ankae nok hanan anae le'uf.

²Nalali te Nai Sekhanya Nai Yehiel anmone na'ko Nai Elan sufan, in nak neu Nai Ezra nak, “Hai misanab milali neu UISNENO natuin hai mafe bife uf bian. Maski onane fe anmu'i panet ma afnekan neu Israel.

³Aim he hit atmo'e lasi supat neu Uisneno, nak of hit atli'u ale bife nane nok sin anah sin. Hai of mituin ale ho fainekat ma fainekat na'ko bian anteni le naliatas Uisneno In aplenat. Hai of mituin Uisneno In aplenat.

⁴Ho of es he munaoba lasi nane. Ma hai of amtuntaku ko nok matani. Munaoba lasi nane nai nok matani talantia namsopu nok alekot.”

⁵Ma onane te Nai Ezra in nanaoba lasi supat. In anlenu ale Ana' fuat knino nakaf, ale atoni Lewi ma atoni Israel bian anteni sin ansup nak sin of anmo'e natuin lasi le Nai Sekhanya natiaba nane.

⁶Leka sin ansup nalali, Nai Ezra in anfen ma in anao na'ko Ume UISNENO matan ma in antam neu Nai Yohanan Nai Elyasib anmone balan ma antup anbi nane. In kan lomi fa he nah ai he ninu natuin in nekan antu' in natenab taos mo'et ale atoni mapolin nane.

⁷Nalali te in napoitan lasi etus tonas mese neu Yerusalem ok-oke ma Yehuda ma neu ale atoni le sin anfani nem na'ko bale mapolin, he nati' sin nabua anbi Yerusalem.

⁸Sekau am sekau le sin ka nen fa anbi neno tenu, of nasik nani ale in amaus ma of ka maso'ik anteni fa on to. Ale to sin anakaf antui nani sin kanak anbi lasi etus tonas nane.

⁹Leka neno tenu namsopu, anbi fun sio neno bo'nua ale atoni le natua anbi pah Yehuda ma Benyamin sin nem neu Yerusalem ma sin nabua anbi po'an Ume UISNENO. Anbi tabu nane ulan ansanu nok anae le'uf kun. Atoni ok-oke anlilitai natuin manikin ma natuin lasi buat nane matani kun.

¹⁰Nalali te Nai Ezra anhake ma namolok neu sin. In nak, “Hi misanab milalien ma amsato Israel sin sanat natuin hi mafe bife uf bian.

¹¹Es nane te so hi am au hi sanat neu UISNENO, Uisneno le hi amfenu naluli nabes neune, ma amtao mituin ale sa' le anhalin In nekan. Ambetiom na'ko uf-uf le natua anbi hit pah ma amli'u ale hi fe sin le na'ko uf bian nane.”

¹²Atoni-atoni nane sin al-al sin natae nok hanan anaek nak, “Hai of mituin ho fainekat.”

¹³Oke te sin na'uab anteni nak, “Mes hai le mibua ambi i amfau le'uf ma ulan anae le'uf kun. Hai kam hake mibe'i fa ambi kotin on i. Anesi anteni amsa mepu i ka mepu le he talali anbi neno mese ai nua, natuin hai amfau le'uf esle' hai amtam ambi sanat i.

¹⁴Mufetin hai nakaf sin he sin natua anbi Yerusalem ma sin nafek lasi nane. Oke te atoni mese-mese anbi hai kot, le anmafe bife na'ko uf bian, mes sin nem anbi tabu le natetab, nok ale nakaf sin ma ale alef lasi anbi sin kot mese-mese. Nok nane te Uisneno of ka nato'an kit fa anteni natuin lasi nane.”

¹⁵Katit fa es amsa le he neki mafena neu lasi nane, al Nai Yonatan Nai Asael anmone ma Nai Yahzeya Nai Tikwa anmone, sin es anlaban lasi nane, nok atoni Lewi nua le anhake nok sin, esle' Nai Mesulam ma Nai Sabetai.

¹⁶Atoni-atoni mapolin le anfani nem nalali nane sin he nanaoba lasi nane piut, es nane te Ana' Fuat Knino Nai Ezra anbeti sin fauk na'ko to sin anakaf, oke te antui sin kankenu.

¹⁷Anbi funan tenu in nanan sin nafek nasopu lasi ale atoni le sin anmafe nok bife na'ko uf bian nane.

¹⁸Le i kanaf na'ko atoni-atoni le sin anmafe nok bife uf bian nane: Ale Ana' fuat knino, matui nok sin ini sin: Nonot Nai Yesua nok in biaf sin, Nai Yozadak in anah-anah sin: Nai Maaseya, Nai Eliezer, Nai Yarib ma Nai Gedalya.

¹⁹Sin anmanta'en he nafetin sin fe sin, oke te sin natulu bibi kase keso neu fua tulu sako sanat neu sin sanat.

²⁰Na'ko nonot Nai Imer: Nai Hanani ma Nai Zebaja.

²¹Na'ko nonot Nai Harim: Nai Maaseya, Nai Elia, Nai Semaya, Nai Yehiel ma Nai Uzia.

²²Na'ko nonot Nai Pasyhur: Nai Elyoenai, Nai Maaseya, Nai Ismael, Nai Netaneel, Nai Yozabad, ma Nai Elasa.

²³Atoni-atoni Lewi: Nai Yozabad, Nai Simei, Nai Kelaya (antek sin amsa nak Nai Kelita), Nai Petahya, Nai Yuda ma Nai Eliezer.

²⁴Ale asit sin: Nai Elyasib. Ale apaot eno naek Ume UISNENO: Nai Salum, Nai Telem ma Nai Uri.

²⁵Atoni-atoni Israel bian anteni: Na'ko nonot Nai Paros: Nai Ramya, Nai Yezia, Nai Malkia, Nai Miyamin, Nai Eleazar, Nai Malkia ma Nai Benaya.

²⁶Na'ko nonot Nai Elam: Nai Matanya, Nai Zakharia, Nai Yehiel, Nai Abdi, Nai Yeremot ma Nai Elia.

²⁷Na'ko nonot Nai Zatu: Nai Elyoenai, Nai Elyasib, Nai Matanya, Nai Yeremot, Nai Zabad ma Nai Aziza.

²⁸Na'ko nonot Nai Bebai: Nai Yohanan, Nai Hananya, Nai Zabai ma Nai Atlai.

²⁹Na'ko nonot Nai Bani: Nai Mesulam, Nai Malukh, Nai Adaya, Nai Yasub, Nai Seal ma Nai Yeramot.

³⁰Na'ko nonot Nai Pahat-Moab: Nai Adna, Nai Kelal, Nai Benaya, Nai Maaseya, Nai Matanya, Nai Bezaleel, Nai Binui, ma Nai Manasye.

³¹Na'ko nonot Nai Harim: Nai Eliezer, Nai Yisia, Nai Malkia, Nai Semaya, Nai Simeon, Nai Benyamin, Nai Malukh ma Nai Samarya.

³³Na'ko nonot Nai Hasum: Nai Matnai, Nai Matata, Nai Zabad, Nai Elifelet, Nai Yeremai, Nai Manasye ma Nai Simei.

³⁴Na'ko nonot Nai Bani: Nai Maadai, Nai Amram, Nai Uel, Nai Benaya, Nai Bedeya, Nai Keluhu, Nai Wanya, Nai Meremot, Nai Elyasib, Nai Matanya, Nai Matnai, Nai Yaasai.

³⁸Na'ko nonot Nai Binui: Nai Simei, Nai Selemya, Nai Natan, Nai Adaya, Nai Makhnadbai, Nai Sasai, Nai Sarai, Nai Azareel, Nai Selemya, Nai Semarya, Nai Salum, Nai Amarya ma Nai Yusuf.

⁴³Na'ko nonot Nai Nebo: Nai Yeiel, Nai Matica, Nai Zabad, Nai Zebina, Nai Yadai, Nai Yoel ma Nai Benaya.

⁴⁴Ale atoni-atoni nane sin anmafe nalali nok bife na'ko uf bian. Ma bife-bife nane sin anpolin sin ma anli'u sin nok ale sin anah-anah sin.