Read Uab Meto EZRA 3 Bible Online

EZRA 3 - Uab Meto bible

EZRA 3

¹Anbi fun hitu, atoni Israel sin natua nalali sin kot mese-mese. Anbi funan nane antam neno mese sin nabua anbi Yerusalem,

²oke te Nai Yesua Nai Yozadak anmone nok in biaf sin Ana' fuat knino ma Nai Zerubabel Nai Sealtiel anmone ma in biaf sin, sin nahakeb nafani baki tulu Uisneno Israel. Nok nane te sin nabe'i notu fua tulu anbi in fafon, matom nok lekat lulut le matui anbi Sulat Plenat Nai Musa, Uisneno In ate.

³Maski sin namtausan tuafen anbi pah nane, mes sin nahakeb baki tulu nane amsa anbi afi in bale ahunut. Oke te sin anfatan anteni natulu fua tulu mnotu, anbi nok-noka ma anbi neno anmabe.

⁴Sin amsa naliatas Neno Naek La' Hau No', anmatom nok lekat lulut; ma neno-neno sin natulu fua tulu le anlek nani neu neno nane.

⁵Anesi na'ko nane sin natulu fua tulu mnotu nok alekot ma fua tulu anbi Neno Naek Funan Fe'u, ma ale neno naek bian anteni le anmo'e nani he naluli ma nabes neu UISNENO. Sin amsa natulu fua tulu natuin sin nek lomit neu UISNENO.

⁶Maski Ume UISNENO fa ka nahakeb nafani fa, mes antam neno mese anbi fun hitu nane te sin notu nalali fua tulu neu UISNENO.

⁷To anfe noni hen baen apakae fatu ma apakae hau. Sin amsa ansonu amnahat, amninut ma mina bub fua mina neu kot-kot Tirus ma Sidon he anseunbanin neki hau aijob Libanon na'ko kot-kot nane. Neki hau nane neu Yafo nao natuin tasi. Ale nane ok-oke to es anmepu natuin Nai Kores, kesel Persia, in es nafetin sin.

⁸Anbi fun nua antam ton nua leka atoni Israel sin anfani neu Yerusalem, sin anfatan mepu nahakeb nafani Ume UISNENO nane. Nai Zerubabel, Nai Yesua ma in biaf sin, Ana' fuat knino sin, atoni Lewi sin, ale atoni le anfani nem na'ko bale le anpalin sin anmepu ok-oke. Atoni-atoni Lewi le in nan ton bo nua nekin sae au lun sin hen panat mepu nafena Ume UISNENO nane.

⁹Es nane te Nai Yesua, atoni Lewi nane, nok in anah sin ma in biaf sin ma Nai Kadmiel amsa nok in anah sin (Nai Hodawya in anah sin) sin al-al sin anpanat mepu nahakeb Ume UISNENO nane. Atoni Lewi na'ko Nai Henadad in anah sin antuntaku sin anbi mepu nane.

¹⁰Leka ameput-ameput anfatan mepu hen tao Ume UISNENO in sukin ale Ana' fuat knino sin anpake sobalu betkone ma sin ana' to'is ma anhake anbi sin bale mese-mese. Atoni Lewi na'ko Nai Asaf in anah sin amsa anhake anbi nane ma sin ana' ale a'sene an-ana. Sin naliatas UISNENO anmatom nok lekat lulut le anlek nani na'ko afi batan Kesel Nai Daud.

¹¹To ansi sit pules liatas neu UISNENO, ma ansi anten-teni sit in amsopun, in hanan nane on i, “UISNENO nane In lo leko kun; ma In manekan neu Israel nabal-bal talan nabal-bal.” To ok-oke anhunun ma ankoa ma naliatas UISNENO, natuin Ume UISNENO in sukin nane sin antao nalali.

¹²Amfaun na'ko ale Ana' fuat knino, atoni Lewi ma to sin anakaf le sin namnasien mes sin nit Ume UISNENO ahunut. Leka sin ansaksi neu nahakeb Ume UISNENO in sukin le i, sin ankae nok hanan anaek. Mes atoni bian le sin nok anbi nane sin anhunun ma ankoa nok amlilat anaek,

¹³talantia kat beti tahin fa anteni me es a'baf amlilat ma amoket ma me es han kaet. Hanaf na'aik kun nok matani, talantia bale a'lot amsa sin anen.