Read Uab Meto EZRA 4 Bible Online

EZRA 4 - Uab Meto bible

EZRA 4

¹Musu atoni Yahuda ma Benyamin sin anen nak atoni-atoni le afi sin mapolin nane sin nahakeb Ume UISNENO, Israel sin Uisneno.

²Es nane te sin nem neu Nai Zerubabel ma to sin anakaf, oke te sin nak, “Mufetin kai he hai mepu mok mihakeb Ume UISNENO nane, natuin hai amsa miluli ma mibes neu hi Uisneno, papmese on hi al-al ki hai bia ki. Hai mitulu fua tulu piut neu In na'ko afi Nai Esar-Hadon, kesel Asyur neki kai hai aim meu i.”

³Mes Nai Zerubabel, Nai Yesua ma to sin anakaf natae nak, “Hai kam lomi fa he hi ambab kai he mepu mihakeb Ume neu hai UISNENO. Hai of amepu ma mihakeb amese kim ume nane anmatom nok Nai Kores, kesel Persia, in aplenat, neu kai.”

⁴Nalali te tuafen le sin natua a'lo anbi pah nane sin na'oleb atoni Yehuda sin nekan ma anhakatau sin he nati' sin nasnasab mepu nane.

⁵Sin anfe noni mate neu ana' aplenat Persia he nati' sin nale'un atoni Yahudi sin salit nane. Lasi nane nanaobon na'ko Kesel Nai Kores in ana' aplenat talantia Kesel Nai Darius in ana' aplenat.

⁶Anbi tabu Kesel Nai Ahasweros fe in ana' aplenat, musu-musu tuafen Yerusalem ma Yehuda sin antui sulat natlak lasi.

⁷Onane amsa anbi batan Nai Artahsasta, kesel Persia, in ana' aplenat, lasi nane anbol anteni: Nai Bislam, Nai Mitredat, Nai Tabeel, ma in benuf sin antui sulat neu kesel. Sulat nane antui neki uab Aram, ma mes nate'un leka hen so'i sulat nane.

⁸Nai Artahsasta amsa ansimo sulat antom Yerusalem. Kumlol Nai Rehum ma in lultunis propinsi Nai Simsai ma sin biaf sin, esle' afek lasi ma ale ana' aplenat Persia bian le nem na'ko Erekh, Babel ma Susan anbi pah Elam, sin es ansonu sulat nane,

¹⁰fun uf-uf bian le Nai Asnapar Amnanut le neki sin ma anlenu sin he natua nabala anbi kot Samaria ma kot-kot bian anbi propinsi Efrat Neno Tesan.

¹¹Sulat nane in hanan on i, “Neu Kesel Nai Artahsasta in human in matan, na'ko Usi ho ate kai le hai mitua anbi Efrat Neno Tesa. Aomina aoleko.

¹²So nati' Usi ho muhin, nak atoni Yahudi le nasaitan nalali pah-pah bian anbi Usi ho pah, tabu le i sin natua nabala anbi Yerusalem ma sin fe anmepu nahakeb nafani kot amle'ut ma alaban nane. Sin nahakeb anteni baki lape ma ka lo fa anteni of sin nasopu mepu nane.

¹³Leka kot nane sin anmepu ma nahakeb nafani ma in baki lape sin nahakeb nalali, of to kan baen anteni fa noni poni, oke te noni poni of kan tam anteni fa neu plenat.

¹⁴Hai mitus milali lasi alekot neu ko Usi ma hai kam lomi fa he nati' Usi ho mumle'u. Es nane te hai amtoti neu ko Usi,

¹⁵he nati' Usi hom lenu hen tae naleko ho amaf sin sulat plenat le afi sin nabela nani. Na'ko sulat plenat nane in nesan of Usi ho muhin nak Yerusalem namneo alaban ma na'ko batan ahunut sin es nale'un ale kesel ma ana' aplenat anbi propinsi. Taplenat tuafen Yerusalem in susal kun piut. Es nane te nale'un nalali kot nane.

¹⁶Es nane te, hai mihin, nak leka nahakeb nafani kot nane ma nahakeb nalali in baki lape sin, of Usi ho ka mube'i amteni fa he muplenat propinsi Efrat Neno Tesan i.”

¹⁷Kesel ansonu sulat ma natae sin on i, “Neu Kumlol Nai Rehum ma Nai Simsai lultunis propinsi, ma sin biaf sin le natua anbi Samaria ma anbi kot-kot bian anbi propinsi Efrat Neno Tesan. Aomina aoleko.

¹⁸Sulat le hi amsonu neu kau nate'un nalali ma anso'i nalali neu kau.

¹⁹Oke te natuin au plenat antae nalek-leko nalali, ma namneo natonon nak na'ko afi batan ahunut Yerusalem na'ko batan ahunut sin anlaban plenat ale kesel ma namfau na'ko sin tuafen namfau anfani atoni abulalut ma amaufinut.

²⁰Fun afi kesel abe'it ma matani sin naplenat anbi nane ma sin anfani akuasat neu propinsi Efrat Neno Tesan ok-oke ma sin anbaen noni poni ma sin neki atnatas.

²¹Es nane te, mupoitan plenat nai he musanab atoni-atoni nane sin mepu, he nati' kais sin nahakeb nafani kot nane talantia au fe plenat bian anteni.

²²Munaoba nai au plenat nane nok lab-lab he nati' kais ansato au lukit nane nae le'uf anteni!”

²³Leka anso'i nalali sulat na'ko Artahsasta neu Nai Rehum, Nai Simsai ma in biaf sin, sin anfen ma anao neu Yerusalem ma naseke atoni Yahudi ma nasanab mepu nahakeb nafani kot nane.

²⁴Nasanab mepu nahakeb Ume UISNENO ma ka nanaoba anteni fa talantia tabu Nai Darius, kesel Persia, in ana' aplenat ton nua.