Read Uab Meto EZRA 5 Bible Online

EZRA 5 - Uab Meto bible

EZRA 5

¹Anbi tabu nane Mafefa knino nua, Nai Hagai ma Nai Zakharia Nai Ido anmone, sin na'uab natuin Uisneno Israel In kanan neu atoni Yahudi le natua anbi Yehuda ma anbi Yerusalem.

²Leka sin nen a'at na'ko Mafefa knino nua en nane, Nai Zerubabel Nai Sealtiel anmone ma Nai Yesua Nai Yozadak anmone sin nanaoba nafani mepu nahakeb Ume UISNENO anbi Yerusalem, ma Mafefa knino nua en nane antuntaku sin.

³Mes Nai Tatnai, Kumlol propinsi Efrat Neno Tesan, in nok Nai Syetar-Boznai ma sin biaf sin nok lab-lab sin nem neu Yerusalem ma sin natoti atoni Yahudi sin nak, “Sekau es anlenu ki he mihakeb ma mileko Ume Luli Besa i?”

⁴Sin natoti amsa kanaf le antuntaku sin ma nahakeb Ume UISNENO nane.

⁵Mes Uisneno anpanat, naneo ma nahafo ale anakaf atoni Yahudi nane, talantia ale anaet Persia sin nafek he nati' kais naiti sa'-sa' nahun na'ko sin fe kan sonu fa sulat neu Nai Darius ma fe kan simo fa han taes na'ko in.

⁶I lasi le sin ansonu neu Kesel nak,

⁷“Neu Kesel Nai Darius in human in matan. So nati' Usi ho amna' aplenat nok aomina aoleko!

⁸So nati' Usi ho muhin, nak hai amnao milalien meu pah Yehuda ma hai mit nak Ume UISNENO Le Anaet, sin fe nahakeb nafani neki fatu-fatu anaek ma baki lape le an amu nani neki hau. Mepu nane sin anmepu nok matani ma anao nok alekot.

⁹Nalali te hai mitoti ale anakaf na'ko to nane mak, sekau es anfe ki plenat he nati' hi mihakeb mifani Ume Luli Besa nane ma mileko mani.

¹⁰Hai mitoti sin kankenu amsa he nati' hai miton sin neu ko Usi neu sekau es anfani anakaf neu mepu nane.

¹¹Sin natae nak, ‘Hai le i Uisneno Akuasat neno tunan ma pah pinan In ate kai. Hai mepu ma mihakeb mifani Ume UISNENO le afi Kesel Israel apinat mese nahakeb nani ma naleko nani anbi ton-ton ahunut.

¹²Mes natuin hai amaf sin nafena nalali Uisneno Akuasat neno tunan In to'as, es nane te In nana'at sin neu Nai Nebukadnezar in aplenat, kesel Babel na'ko Kasdim in sufan. In nale'un naskuku Ume nane ma naiti neki hai to neu Babel.

¹³Nalali te Nai Kores anfani kesel Babel ma anbi in aplenat ton ahunut, in napoitan plenat he nati' nafena nafani Ume UISNENO nane.

¹⁴Fun anesi na'ko nane amsa in anfe nafani bale mnatu ma noni muti le anpake sin anbi Ume UISNENO in nanan la Nebukadnezar in naiti sin na'ko Yerusalem oke te in natam sin anbi ume le'u in nanan anbi Babel. Ale bale nane Kesel Nai Kores in nana'at sin neu atoni mese in kanan Kesel Nai Sesbazar, le naiti nalali in anfani Kumlol pah Yehuda.

¹⁵Kesel anlenu in naiti ale bale nane ma neki nafani sin neu Ume UISNENO anbi Yerusalem, ma nahakeb nafani Ume nane.

¹⁶Oke te Nai Sesbazar in nem neu Yerusalem ma in nabela fatu naif Ume UISNENO in sukin nane. Na'ko tabu nane talantia neno i mepu nane in nao piut, mes mepu nane fe ka nasopu nani fa amsa.’

¹⁷Leka Usi ho mufetin kai, hai amtoti neu ko he nati' sin antae anbi sulat plenat le nabela sin anbi Babel. Nok nane te hit tahin neu namneo ka Kesel Nai Kores anfe plenat he nahakeb nafani Ume UISNENO anbi Yerusalem i. Nalali te hai amtoti neu ko Usi he hom sonu kai ho lasi tfeka antom lasi nane.”