Read Uab Meto EZRA 6 Bible Online

EZRA 6 - Uab Meto bible

EZRA 6

¹Oke onane te natuin plenat Kesel Nai Darius sin nanaoba mepu antae anbi bale bela sulat plenat le nabela sin anbi Babel.

²Mes sin napeni tuis antom lasi nane kan bi fa Babel, so mak anbi kot Ahmeta anbi pah Media. Tuis nane antui nani anbi sulat manunu mese ma in hanan nak on i,

³“Anbi ton ahunut Kesel Nai Kores in ana' aplenat, in napoitan plenat he nati' Ume UISNENO anbi Yerusalem nahakeb nafani on bale atoni neki fua tulu ma notu fua tulu. Ume nane in amnanun neki sae mes meter 27 ma in meunuan meter 27 amsa.

⁴In aklipin sin mes nahakeb nani on i: anbi fatu kuni tenu in fafon mes nahakeb anteni hau kuni mese anteni. Ma mepu in upan of aplenat es anbaen na'ko kas.

⁵Onane amsa ale bale mnatu ma noni muti le anpake anbi Ume UISNENO ma le Kesel Nai Nebukadnezar naiti sin na'ko Yerusalem ma neki sin neu Babel, mes neki sin anfani neu afi sin balan.”

⁶Nalali te Nai Darius ansonu sulat ma natae sin on i, “Neu Nai Tatnai, Kumlol propinsi Efrat Neno Tesan, ma Nai Syetar-Boznai, ma ale anaet anbi Efrat Neno Tesan. Kais hi mi'aunu atoni-atoni Yahudi nane,

⁷ma kais hi mieka' sin he sin nahakeb sin Ume Luli besa. Mifetin Kumlol Yehuda ma ale to Yahudi sin anakef sin he nahakeb nafani Ume nane.

⁸Ma au fe plenat neu ki he hi amtuntaku sin anbi sin mepu nahakeb Ume nane, nao nok lanan i: Ale noni neu he nahakeb Ume nane mes maiti na'ko noni poni anbi propinsi Efrat Neno Tesan ma mes ambaen noni nane neu atoni-atoni nane ka nabe'i fa he mitnanib lasi nane.

⁹Anesi na'ko nane te sa' le ale Ana' fuat knino anbi Yerusalem sin antoti, onle bijae keso tipu, bibi kase ma bibi he sin natulu fua tulu neu Uisneno Akuasat anbi neno tunan, onane amsa ane kase, mes hi amfe neu sin neno-neno ka nabe'i fa he hi amnikan lasi nane.

¹⁰Hi minaoba ale lasi nane he nati' sin nabe'i natulu ma natnat fua tulu le anhalin Uisneno Akuasat anbi neno tunan, ma he nati' sin antoti tetus neu kau ma neu ale au anmone sin.

¹¹Fun au fe plenat amsa he nati' sin le antanhai ale plenat le i ambok man ni mese na'ko in ume, am ini mi'aikan in panan, oke te mipau atoni nane ambol ambati in aon. Ma in ume mes ampukai mani ma anmo'e in balan anfani bale polin maklafu.

¹²So nati' Uisneno le anbeti nalali Yerusalem on bale luli besa neu In, so nati' In nale'un ale kesel ai uf le hen tanhai plenat i ma le he nale'un naskuku Ume UISNENO anbi Yerusalem nane. Au, Nai Darius kau, au es a'fe ulali plenat i. Minaoba mani nai nok alekot.”

¹³Fun Nai Tatnai, Kumlol Efrat Neno Tesan, ma Nai Syetar-Boznai ma in biaf sin, sin nanaoba plenat na'ko Kesel Nai Darius nok alekot.

¹⁴Ma Mafefa Knino Nai Hagai ma Nai Zakharia, ma to Yahudi sin anakaf sin anmatuntakun ma nanaoba mepu nahakeb Ume UISNENO nane anao piut. Sin nasopu mepu nane labah anmatom nok Uisneno Israel In aplenat ma plenat Nai Kores, Nai Darius ma Nai Artahsasta, ale kesel Persia nane.

¹⁵Fun sin nasopu mepu Ume UISNENO nane anbi funan Adar antam neno tenu anbi ton ne tabu Kesel Nai Darius in ana' aplenat.

¹⁶Nalali te to Israel, ale Ana' fuat knino, ale atoni Lewi ma ale atoni le afi anpolin sin nok amlilat ma amoket sin naki'ab Ume UISNENO nane.

¹⁷Anbi lasi amlilat ma amoket nane sin natulu neu UISNENO bijae keso 100, bibi kase keso 200 ma bibi kase tipu 400. Ma tulu sako sanat, sin natulu bibi keso 12, uf mese te bibi kase mese.

¹⁸Nalali te tuthaes neu Ume UISNENO sin anbati ale Ana' fuat knino ma atoni Lewi pukan mese-mese natuin lekat lulut le matui anbi Nai Musa in sulat.

¹⁹Anbi neno bo'es am ha fun mese ton amnemat, atoni-atoni le anfani nem nalali na'ko bale mapolin, sin naliatas Paskah.

²⁰Ale Ana' fuat knino ma atoni Lewi sin anmo'e nalali lekat lulut naknino'on he nati' sin naknino. Nalali te atoni Lewi anlolo ale mu'it neu fua tulu Paskah ma neu ale Ana' fuat knino, ma neu sin ma neu ale atoni bian le afi mapolin.

²¹Ale atoni-atoni Israel le sin anfani nem nalali na'ko bale mapolin ma tuafen pah nane le nasaitan nalali monit asanat ma sin nem he naluli nabes neu UISNENO, Israel sin Uisneno, sin al-al sin anbukae ale fua tulu nane.

²²Neno hitu sin naliatas Tolas Utunu' Kan Pake fa Lalu haef nok amlilat ma amoket. Sin anmalin anae le'uf natuin UISNENO In neknon anmo'e kesel Asyur talantia in nalile in nek amnaut neu sin ma antuntaku sin anbi mepu nahakeb nafani Ume UISNENO atoni Israel.