Read Uab Meto EZRA 9 Bible Online

EZRA 9 - Uab Meto bible

EZRA 9

¹Leka nanaoba nalali ale lasi nane, nakaf Israel sin fauk-fauk nem neu kau. Sin naton neu kau nak to Israel, ma ale Ana' fuat knino ma ale atoni Lewi sin kan beti fa sin aoken na'ko uf-uf le natua anhaumak anbi nane, uf Amon, Moab, Mesir, Kanaan, Het, Feris, Yebus ma Amori. Fun ale Ana' fuat knino ma atoni Lewi sin anmo'e onle nane. Sin al-al sin anmo'e taos mo'et mainisit le uf-uf nane sin anmo'e.

²Atoni Yahudi anmafe nok bife uf bian, talantia nonot mabeti UISNENO ini ka naknino anteni fa. Fun nes-nesi le anmo'e nahunun lasi nane es ale anakaf ma anaet Israel.

³Leka au nen lasi nane, au uto' nae le'uf talantia au pisu au bale pake ma au bok au nakak funun ma au konok, oke te au toko nok nekaf le anoe nani kun.

⁴Au toko piut onane talantia natulu fua tulu neno anmabe. Oke te sin al sin nem anfun natef nan kau. Sin namtau natuin sin namnau Uisneno Israel ansako ale sanat na'ko atoni le anfani nem na'ko bale polin nane.

⁵Leka natulu fua tulu neno anmabe, au fen u'ko bale au nekak ansus nane ma nok bale pake le natpisu, au li'tu ma au utnopan au nimak sin neu UISNENO au Uisneno.

⁶Ma au ak, “Koi au Uisneno, au umaebok he aiti au nakak anbi Ho humam ma Ho matam. Hai sanat natupu anfin-fin anbi hai nakam talantia neno tunan.

⁷Na'ko batan hai amfenu talantia neno i, Ho nonot kai hai misanab neu Ko. Es nane te ale uf pah-pah sin nis ma anbe'u kai, hai uisfenu ma hai Ana' fuat knino sin. Namate kai, nasik kai ma naiti neki kai on atoni le anheke nan sin. Fun sin nakle'at kai nae le'uf, onle hai monim anbi neno i.

⁸Mes tabu i, koi UISNENO hai Uisneno, Ho fe amnek mumnau kai. Ho mufetin atoni fauk-fauk na'ko kai na'ko monit ate he nati' hai moni nok amlilat ma amoket anbi bale le Ho ambeti muteta i. Ho amfe neu kai monit fe'u.

⁹Anbi tabu hai fe anmoni ambi lasi ate, Ho ka musaitan kai fa. Ho amtao ma anmo'e talantia usif-usif Persia sin nek ma namnau kai ma mufetin kai he hai moni ma mihakeb mifani Ho Ume le al fatu tutnae nane. Ho muneo ma mufaho kai anbi i, anbi Yehuda ma Yerusalem.

¹⁰Mes tabu i, koi UISNENO, leka ale lasi nane anbol nalali hai he mak sa' amteni ka? Hai misaitan milali ale Ho plenat sin anteni,

¹¹le Ho amfe neu kai natuin ale Ho ate Mafefa knino sin. Sin naton neu kai nak pah le hai mitua nane ka naknino fa natuin sin tuakenu na'ko tu'an bian neu tu'an bian sin anmo'e amle'ut ma mainisit.

¹²Ale Mafefa knino nane sin nakain kai he nati' kais hai mafe ma mamone mok atoni-atoni nane, ai amtuntaku sin he sin moni nok aomina ma ao leko. Leka hai mituin, hai mes amfani atoni abe'it ma matani ma hai miah pah nane in afan ma hai amfe mani neu hai anah-anah sin talan nabal-bal.

¹³Hai misanab milali neu Ko ma amtanhai Ho plenat sin, ma Ho amkas mulali kai. Mes hai mihin, koi hai Uisneno, nak Ho kasat le Ho amfe neu kai nane in mafenan nane ka natai fa nok le hai hem simo, mes Ho mufetin man kai.

¹⁴Es nane te, onme ka hai fe amtanhai ale Ho plenat sin anteni ma amafe ma mamone mok ale atoni-atoni amle'ut nane? Leka hai amtao ma anmo'e, namneo-namneo of Ho muto' talantia mule'un kai ok-oke ma ka mufetin fa es amsa he anmoni.

¹⁵Koi UISNENO, Israel sin Uisneno, Ho amneot Ko, maski onane Ho mufetin kai he hai anmoni. Hai am au ale hai sanat sin neu Ko; hai kam tam fa ota hem hake ambi Ho humam ma Ho matam.”