Read Uab Meto NEHEMIA 1 Bible Online

NEHEMIA 1 - Uab Meto bible

NEHEMIA 1

¹Nai Nehemia Nai Hakhalya anmone naton ale lasi-lasi le in anmepu. Anbi funan Kislew anbi ton bo'nua Nai Artahsasta in ana' aplenat on kesel anbi Persia, au Nai Nehemia, au bi Susan kot ainaf pah nane.

²Anbi tabu nane, Nai Hanani au biaf, in nem na'ko Yehuda nok atoni fauk-fauk. Oke te au utoti sin antom Yerusalem ma ale atoni-atoni Yahudi le sin anfani nalali na'ko pah mapolin Babel.

³Sin naton neu kau nak ale atoni-atoni le afi mapolin nane le sin anfani nalali neu sin pah, sin anmoni anbi susal nukat natuin uf-uf le anhaumak sin nasi'u sin. Ma anesi na'ko nane, ale baki lape Yerusalem fe naskuku nasan'on ma ale in eno naek sin fe ka naleko fa sin na'ko afi notu sin anbi tabu afinit.

⁴Leka au nen lasi nane, au toko ma au kae. Anbi neno fauk-fauk in a'lon au nekak antu' ma nasusbon piut. Au unahok piut ma au onen toti neu Uisneno ak,

⁵“Koi UISNENO Akuasat neno tunan. Ho Uisneno Naek Ko ma hai aim meu Ko nahenu nok lasi amtaus. Ho mu'ki piut neu kai ma Ho amna' Ho fef bela neu atoni le in nek namnau Ko ma natuin Ho plenat.

⁶So Ho amkiso fa Ho ate kau koi UISNENO, ma so Ho amnen fa au onen totis le au usaeb neu Ko anbi manas ma fai antom Ho nonot Israel, ale Ho ate-ate nane. Au onen toti ma au hai sanat nak hai, nonot Israel, hai misanab milalien; au ma au amfenu hai misanab milalien amsa.

⁷Hai mo'e milali sanat anaek neu Ko ma amtanhai ale Ho plenat-plenat sin. Hai ka mituin fa ale Ho plenat-plenat sin, le Ho amfe mulali sin neu kai nao nok Ho ate Nai Musa nane.

⁸Koi UISNENO, so mumnau fa Ho a'am le Nai Musa natiaba nani neu kai natuin Ho lekat, nak leka hai, nonot Israel, hai ka mi'ki fa meu Ko, Ho of misitab ma musana kai neu uf-uf bian.

⁹Mes leka hai amfani aim meu Ko anteni ma mituin ale Ho plenat sin, mes hai le misan'om milali nane of Ho amnibun mubua kai anteni, maski hai ambi pah-pah in tu'an. Oke te Ho of meki kai amfani neu ale bale luli besa neu Ko.

¹⁰Koi UISNENO, hai le i Ho ate-ate kai, Ho to le Ho mufetin mulali meki Ho kuasat ma Ho be'im le matani kun.

¹¹So Ho amnen au onen totis nai ma onen totis na'ko ale Ho ate bian, le anlomi he naliatas Ko. So Ho ambab kau nai he nati' anbi neno le i Ho ate au upeni kesel in manekan.” Anbi batan nane au es amepu kesel in tua min kase.